ಇದೇ ಮೊದಲು ಬೀಜಿಂಗ್‌ನಲ್ಲಿ ಮಾತುಕತೆ

Team Udayavani, Feb 23, 2023, 5:35 AM IST

ಹೊಸದಿಲ್ಲಿ: ಭಾರತ-ಚೀನ ಗಡಿಯ ವಾಸ್ತವಿಕ ನಿಯಂತ್ರಣ ರೇಖೆಗೆ(ಎಲ್‌ಎಸಿ) ಸಂಬಂಧಿಸಿದ ಸಮಸ್ಯೆಗಳ ಬಗ್ಗೆ ಚರ್ಚಿಸಲು ಇದೇ ಮೊದಲ ಬಾರಿಗೆ ಚೀನ ರಾಜಧಾನಿ ಬೀಜಿಂಗ್‌ನಲ್ಲಿ ಉಭಯ ದೇಶಗಳ ನಿಯೋಗ ಮಟ್ಟದ ಮಾತುಕತೆ ಬುಧವಾರ ನಡೆಯಿತು.

ಭಾರತ-ಚೀನ ಗಡಿಗೆ ಸಂಬಂಧಿಸಿದಂತೆ 2012ರಲ್ಲಿ ಉಭಯ ದೇಶಗಳ ನಿಯೋಗ ರಚನೆಯಾಯಿತು. ಲಡಾಖ್‌ನಲ್ಲಿ ಭಾರತ ಮತ್ತು ಚೀನ ಸೈನಿಕರ ನಡುವಿನ ಸಂಘರ್ಷದ ಅನಂತರ ಬಹುತೇಕ ಗಡಿ ಪ್ರದೇಶಗಳಲ್ಲೇ ಇದುವರೆಗೂ ನಿಯೋಗ ಮಟ್ಟದ ಮಾತುಕತೆ ನಡೆದಿತ್ತು.

18ನೇ ಸುತ್ತಿನ ಮಾತುಕತೆಯು ಬೀಜಿಂಗ್‌ನಲ್ಲಿ ನಡೆಯುವ ಮೂಲಕ ಮುಕ್ತ ಮತ್ತು ರಚಾನಾತ್ಮಕ ರೀತಿಯಲ್ಲಿ ಗಡಿ ವಿವಾದ ಬಗೆಹರಿಸಲು ಮುಂದಡಿ ಇಡಲಾಗಿದೆ. “ಮಾತುಕತೆ ವೇಳೆ ಭಾರತ-ಚೀನ ಗಡಿಯ ಪಶ್ಚಿಮ ಸೆಕ್ಟರ್‌ನ ಎಲ್‌ಎಸಿಯಲ್ಲಿನ ಪರಿಸ್ಥಿತಿ ಅವಲೋಕಿಸಲಾಯಿತು. ಅಲ್ಲದೇ ಗಡಿ ಉದ್ದಕ್ಕೂ ಶಾಂತಿ ನೆಲಸುವ ನಿಟ್ಟಿನಲ್ಲಿ ಹಾಗೂ ಉಭಯ ದೇಶಗಳ ನಡುವಿನ ಬಾಂಧವ್ಯವನ್ನು ಉತ್ತಮಗೊಳಿಸುವ ನಿಟ್ಟಿನಲ್ಲಿ ರಚಾನಾತ್ಮಕ­ವಾಗಿ ಮಾತುಕತೆ ನಡೆಯಿತು’ ಎಂದು ಭಾರತದ ವಿದೇಶಾಂಗ ಸಚಿವಾಲಯ ತಿಳಿಸಿದೆ.