ಕ್ಯಾನ್ಸರ್‌ಕಾರಕ ಬಿಪಿ ಮಾತ್ರೆ ಹಿಂಪಡೆದ ಕಂಪನಿ

Team Udayavani, Aug 12, 2018, 6:00 AM IST

ನವದೆಹಲಿ: ರಕ್ತದೊತ್ತಡ ಮತ್ತು ಹೃದಯ ಕಾಯಿಲೆಗಳಲ್ಲಿ ಚಿಕಿತ್ಸೆಗಾಗಿ ಬಳಸುತ್ತಿದ್ದ ಹೀಟೆರೋ ಡ್ರಗ್ಸ್‌ ಉತ್ಪಾದಿಸಿದ ವಾಲ್ಸಾರ್ಟನ್‌ ಮಾತ್ರೆಗಳ ಕೆಲವು ಬ್ಯಾಚ್‌ಗಳನ್ನು ಕಂಪನಿ ವಾಪಸ್‌ ಪಡೆದುಕೊಂಡಿದೆ. ಈ ಮಾತ್ರಗಳು ಕ್ಯಾನ್ಸರ್‌ ಹರಡುವ ಅಪಾಯವನ್ನು ಹೊಂದಿದೆ ಎಂದು ತನಿಖೆ ವೇಳೆ ತಿಳಿದುಬಂದಿತ್ತು.

ಚೀನಾ ಝೆಜಿಯಾಂಗ್‌ ಹುಆಹೈ ಫಾರ್ಮಾಸುಟಿಕಲ್ಸ್‌ ಕಂಪನಿಯು ತಯಾರಿಸಿದ ವಾಲ್ಸಾರ್ಟನ್‌ ಮಾತ್ರೆಯಲ್ಲಿ ಎನ್‌ ನೈಟ್ರೋಡೊಡಿಮೆಥಿಲಮೈನ್‌ ಎಂಬ ಕ್ಯಾನ್ಸರ್‌ಕಾರಕ ಅಂಶಗಳಿವೆ ಎಂಬುದಾಗಿ ಅಮೆರಿಕದ ನಿಯಂತ್ರಕಗಳು ವರದಿ ಮಾಡಿದ ನಂತರದಲ್ಲಿ ಹಲವು ಕಂಪನಿಗಳು ಈ ಮಾತ್ರೆಗಳನ್ನು ಮಾರುಕಟ್ಟೆಯಿಂದ ವಾಪಸ್‌ ಪಡೆಯುತ್ತಿವೆ.

ಭಾರತದಲ್ಲಿ ಈಗಾಗಲೇ ಚೀನಾದಿಂದ ಆಮದು ಮಾಡಿಕೊಳ್ಳುವ ವಾಲ್ಸರ್ಟನ್‌ ಮೇಲೆ ನಿಷೇಧ ಹೇರಲಾಗಿದೆ. ಈ ಹಿಂದೆ ನೊವಾರ್ಟಿಸ್‌ ಕಂಪನಿಯು ಈ ಮಾತ್ರೆಗಳನ್ನು ಚೀನಾದಿಂದ ಆಮದು ಮಾಡಿಕೊಂಡು ಡಿಯೋವಾನ್‌ ಎಂಬ ಹೆಸರಿನಲ್ಲಿ ಮಾರಾಟ ಮಾಡುತ್ತಿತ್ತು. ಆದರೆ ಪೇಟೆಂಟ್‌ ಮುಗಿದಿದ್ದರಿಂದ, ಇತರ ದೇಶಗಳಲ್ಲಿ ತಯಾರಾಗುತ್ತಿರುವ ಜೆನರಿಕ್‌ ಔಷಧಗಳನ್ನು ಖರೀದಿಸಿ ಮಾರುತ್ತಿದೆ.