ಮೊದಲ ಸೌರಶಕ್ತಿ ಚಾಲಿತ ರೈಲಿಗೆ ಚಾಲನೆ

Team Udayavani, Jul 15, 2017, 4:35 AM IST

ಹೊಸದಿಲ್ಲಿ: ದೇಶದ ಪ್ರಥಮ ಸೌರಶಕ್ತಿ ಚಾಲಿತ ರೈಲಿಗೆ ಶುಕ್ರವಾರ ರೈಲ್ವೇ ಸಚಿವಾಲಯ ಚಾಲನೆ ನೀಡಿದೆ. ವಿದ್ಯುಚ್ಛಕ್ತಿ ಬೇಡುವ ದೀಪ, ಫ್ಯಾನ್‌, ಟೀವಿಗಳೂ ಸೌರಶಕ್ತಿಯನ್ನು ಬಳಸಿಕೊಂಡೇ ಕೆಲಸ ಮಾಡುತ್ತವೆ ಎಂಬುದು ಈ ರೈಲಿನ ವಿಶೇಷ. ದಕ್ಷಿಣ ದಿಲ್ಲಿಯ ಸಫಾªರ್ಜಂಗ್‌ ರೈಲು ನಿಲ್ದಾಣದಲ್ಲಿ ರೈಲ್ವೇ ಸಚಿವ ಸುರೇಶ್‌ ಪ್ರಭು ಈ ರೈಲಿಗೆ ಚಾಲನೆ ನೀಡಿದ್ದಾರೆ. ಮತ್ತೂಂದು ವಿಶೇಷವೆಂದರೆ, ಸೂರ್ಯನ ಬೆಳಕು ಇಲ್ಲದಿದ್ದಾಗ ಮತ್ತು ಇತರೆ ತುರ್ತು ಸಂದರ್ಭಗಳ ವೇಳೆ ಅನುಕೂಲವಾಗುವ ನಿಟ್ಟಿನಲ್ಲಿ 72 ಗಂಟೆಗಳಿಗೆ ಆಗುವಷ್ಟು ಬ್ಯಾಟರಿ ಬ್ಯಾಂಕ್‌ ಇದರಲ್ಲಿದೆ. ಈ ಡೆಮೊ (ಡೀಸೆಲ್‌ ಎಲೆಕ್ಟ್ರಿಕ್‌ ಮಲ್ಟಿಪಲ್‌ ಯುನಿಟ್‌) ರೈಲಿನಲ್ಲಿ ಸೋಲಾರ್‌ ವಾಹಕಗಳನ್ನು ರೈಲಿನ ಛಾವಣಿಗೆ ಅಳವಡಿಸಲಾಗಿದೆ.

ಇದರ ಬೋಗಿಗಳನ್ನು ಚೆನ್ನೈನಲ್ಲಿರುವ ಕೋಚ್‌ ಫ್ಯಾಕ್ಟರಿಯಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ರೈಲ್ವೇ ಇಂಧನ ವಿಭಾಗವು ಸೌರಫ‌ಲಕಗಳನ್ನು ತಯಾರಿಸಿದೆ. ದಿಲ್ಲಿಯ ಸಬ್‌ಅರ್ಬನ್‌ನಲ್ಲಿ ಈ ರೈಲು ಓಡಾಟ ನಡೆಸಲಿದೆ. ಆದರೆ ಇನ್ನೂ ಮಾರ್ಗ ನಿರ್ಧಾರವಾಗಿಲ್ಲ. ಈ ರೈಲಿನಿಂದ ವರ್ಷಕ್ಕೆ 12 ಲಕ್ಷ ರೂ.ಗಳಷ್ಟು ಡೀಸೆಲ್‌ ವೆಚ್ಚ ಉಳಿತಾಯವಾಗಲಿದೆ. 21 ಸಾವಿರ ಲೀಟರ್‌ ಡೀಸೆಲ್‌ ಉಳಿತಾಯ ಆಗಲಿದೆ.