India’s ಮೊದಲ ಮರುಬಳಕೆ ರಾಕೆಟ್‌ ಲಾಂಚ್‌ಯಶಸ್ವಿ : ಮರುಬಳಕೆ ಹೇಗೆ?

Team Udayavani, Aug 25, 2024, 6:25 AM IST

ಚೆನ್ನೈ: ತಮಿಳುನಾಡು ಮೂಲದ ಸ್ಟಾರ್ಟ್‌­ಅಪ್‌ ಸ್ಪೇಸ್‌ಝೋನ್‌ ಇಂಡಿಯಾ ತಯಾರಿಸಿರುವ ಭಾರತದ ಮೊದಲ ಮರು­ಬಳಕೆ ರಾಕೆಟನ್ನು ಯಶಸ್ವಿಯಾಗಿ ಉಡಾವಣೆ ಮಾಡಲಾಗಿದೆ. ಇದನ್ನು ಸಂಚಾರಿ ಲಾಂಚ್‌ಪ್ಯಾಡ್‌ನಿಂದ ಉಡಾ­ವಣೆ ಮಾಡಲಾಗಿದ್ದು, ಈ ರೀತಿ ಉಡಾವ­ಣೆಗೊಂಡ ವಿಶ್ವದ ಮೊದಲ ರಾಕೆಟ್‌ ಎಂಬ ಖ್ಯಾತಿಗೂ ಇದು ಪಾತ್ರವಾಗಿದೆ.

ಈ ರಾಕೆಟ್‌ಗೆ ರೂಮಿ-2024 ಎಂದು ಹೆಸರಿಡಲಾಗಿದೆ. ಚೆನ್ನೈಯ ಈಸ್ಟ್‌ ಕೋಸ್ಟ್‌ ರಸ್ತೆ ಬಳಿಯಿಂದ ಈ ರಾಕೆಟನ್ನು ಶನಿವಾರ ಬೆಳಿಗ್ಗೆ 7.25ಕ್ಕೆ ಉಡಾವಣೆ ಮಾಡಲಾಯಿತು. ಈ ಮೊದಲು 7 ಗಂಟೆಗೆ ಉಡಾವಣೆಯನ್ನು ಯೋಜಿಸಿದ್ದರೂ ಸಹ ಗಾಳಿಯ ಪ್ರಮಾಣ ಹೆಚ್ಚಿದ್ದ ಕಾರಣ ಉಡಾವಣ ಸಮಯವನ್ನು ಬದಲಾಯಿಸ­ಲಾ­ಗಿತ್ತು. ರಾಕೆಟ್‌ನ ಭಾಗ­ಗಳು ಸಮುದ್ರಕ್ಕೆ ಬಿದ್ದಿದ್ದು, ಅದನ್ನು ನಮ್ಮ ಸಿಬಂದಿ ಸಂಗ್ರಹಿಸ­ಲಿದ್ದಾರೆ ಎಂದು ಸ್ಪೇಸ್‌ಝೋನ್‌ ಸಿಇಒ ಆನಂದ್‌ ಮಹಾಲಿಂಗಂ ಅವರು ಹೇಳಿದ್ದಾರೆ.

ಈ ರಾಕೆಟ್‌ ಭೂಮಿಯಿಂದ ಹಾರಲು ರಾಕೆಟ್‌ ಇಂಧನ ಬಳಸಿ ಕೊಂಡರೆ, ಪ್ಯಾರಾ­ಚೂಟ್‌ ಬಿಚ್ಚಿಕೊಳ್ಳಲು ವಿದ್ಯುತ್‌ ಬಳಕೆ ಮಾಡುತ್ತದೆ. 3 ಕ್ಯೂಬ್‌ ಉಪಗ್ರಹ (ಸುಮಾರು 1 ಕೆ.ಜಿ. ತೂಕದ್ದು) ಮತ್ತು 50 ಪಿಕೋ ಉಪಗ್ರಹ ಗಳನ್ನು ಇದು 35 ಕಿ.ಮೀ. ಎತ್ತರದ ಕಕ್ಷೆಗೆ ಕೊಂಡೊಯ್ಯಿತು. ಇವುಗಳ ಮೂಲಕ ವಾತಾವರಣ, ಕಾಸ್ಮಿಕ್‌ ರೇಡಿಯೇ­ಶನ್‌, ಗಾಳಿಯ ಗುಣಮಟ್ಟ, ತಾಪಮಾನ ಏರಿಕೆಯ ಅಧ್ಯಯನ ಮಾಡಲಾಗುತ್ತದೆ.

ರಾಕೆಟ್‌ ಮರುಬಳಕೆ ಹೇಗೆ?
ರುಮಿ ರಾಕೆಟ್‌ನಲ್ಲಿರುವ ಬಹುತೇಕ ಭಾಗ ಅಂದರೆ ಶೇ.75ರಷ್ಟು ಭಾಗವನ್ನು ಮತ್ತೆ ಬಳಕೆ ಮಾಡಿಕೊಳ್ಳಬಹುದು. ರಾಕೆಟ್‌ನ ಮುಖ್ಯಭಾಗ, ಉಪಗ್ರಹಗಳನ್ನು ಇಡುವ ತುದಿಯ ಭಾಗಗಳು ಉಡಾವಣೆಯ ಬಳಿಕ ಮತ್ತೆ ಭೂಮಿಯ ವಾತಾವರಣವನ್ನು ಪ್ರವೇಶಿಸಿ, ಸಮುದ್ರದಲ್ಲಿ ಬೀಳಲಿವೆ. ಇವುಗಳನ್ನು ಸಂಗ್ರಹಿಸಿ ಮತ್ತೆ ಬಳಕೆ ಮಾಡಲಾಗುತ್ತದೆ.