ಮುಂದಿನ 2 ತ್ತೈಮಾಸಿಕದಲ್ಲೂ ಕೈಗಾರಿಕ ಪ್ರಗತಿ ಕುಂಠಿತ?

Team Udayavani, Dec 13, 2024, 2:18 AM IST

ಹೊಸದಿಲ್ಲಿ: ಕೈಗಾರಿಕ ಪ್ರಗತಿಗೆ ಸಂಬಂಧಿಸಿದಂತೆ ಯಾವುದೇ ಪರಿಣಾಮಕಾರಿಯಾದ ಹೂಡಿಕೆ, ಪೂರೈಕೆ ಕೈಗೊಳ್ಳದಿದ್ದರೆ ಮುಂದಿನ 2 ತ್ತೈಮಾಸಿಕದಲ್ಲೂ ಪ್ರಗತಿ ದರ ಶೇ.5ಕ್ಕಿಂತ ಕಡಿಮೆ ಇರಲಿದೆ ಎಂದು ವರದಿಯೊಂದು ತಿಳಿಸಿದೆ. ಈ ವರ್ಷದ ಅಕ್ಟೋಬರ್‌ನಲ್ಲಿ ಕೈಗಾರಿಕ ಪ್ರಗತಿ ಸಕಾರಾತ್ಮಕ ಹಾದಿಯಲ್ಲಿತ್ತು. ಅಕ್ಟೋಬರ್‌ನಲ್ಲಿ ಪ್ರಗತಿ ದರ ಶೇ.2.5ರಿಂದ 3.5ರಷ್ಟಿತ್ತು. ಇದು ಸೆಪ್ಟಂಬರ್‌ನಲ್ಲಿ ಶೇ.2.3ರಷ್ಟಿತ್ತು. ಆರ್ಥಿಕ ಪ್ರಗತಿ ಶೇ.6.5ಕ್ಕಿಂತ ಕಡಿಮೆಗೆ ಕುಸಿದಿದೆ.

ನವೆಂಬರ್‌ನಲ್ಲಿ ಶೇ.5.48ಕ್ಕೆ ಇಳಿದ ಚಿಲ್ಲರೆ ಹಣದುಬ್ಬರ
ಆಹಾರ ಬೆಲೆಗಳಲ್ಲಿ ಇಳಿಕೆಯಾದ ಪರಿಣಾಮ ನವೆಂಬರ್‌ನಲ್ಲಿ ಚಿಲ್ಲರೆ ಹಣದುಬ್ಬರ ಶೇ.5.48ಕ್ಕೆ ಇಳಿಕೆ ಕಂಡಿದೆ. ಅಕ್ಟೋಬರ್‌ನಲ್ಲಿ ಇದರ ಪ್ರಮಾಣ ಶೇ.6.21 ರಷ್ಟಿತ್ತು. ಕಳೆದ ವರ್ಷದ ನವೆಂಬರ್‌ನಲ್ಲಿ ಹಣದುಬ್ಬರ ಶೇ.5. 55ರಷ್ಟಿತ್ತು. ತರಕಾರಿ, ಧಾನ್ಯಗಳು, ಸಕ್ಕರೆ, ಹಣ್ಣು, ಮೊಟ್ಟೆ, ಹಾಲು ಮತ್ತು ಹಾಲಿನ ಉತ್ಪನ್ನಗಳ ಬೆಲೆ ಇಳಿಕೆಯಾದ ಕಾರಣ ಹಣದುಬ್ಬರ ಇಳಿಕೆ ಕಂಡಿದೆ. ನವೆಂಬರ್‌ನಲ್ಲಿ ಅತಿಹೆಚ್ಚು ಹಣದುಬ್ಬರ ಹೊಂದಿದ್ದ ವಸ್ತುಗಳೆಂದರೆ ಬೆಳ್ಳುಳ್ಳಿ (ಶೇ.85.14), ಆಲೂಗಡ್ಡೆ (66.65), ಹೂ ಕೋಸು (47.7), ಎಲೆಕೋಸು (43.58), ಕೊಬ್ಬರಿ ಎಣ್ಣೆ (42.13).