ಹಣದುಬ್ಬರ ದಾಖಲೆಯ ಶೇ.2.18ಕ್ಕೆ ಇಳಿಕೆ

Team Udayavani, Jun 13, 2017, 1:41 AM IST

ಹೊಸದಿಲ್ಲಿ: ತರಕಾರಿ, ಬೇಳೆಕಾಳುಗಳ ಬೆಲೆ ಇಳಿಕೆ ಕಾರಣ, ಹಣದುಬ್ಬರ ಸರ್ವಾಧಿಕ ದಾಖಲೆಯ ಶೇ.2.18ರಷ್ಟಕ್ಕೆ ಇಳಿಕೆ ಕಂಡಿದೆ. ಬಟ್ಟೆ, ವಸತಿ, ತೈಲ ಬೆಲೆಗಳೂ ಹಣದುಬ್ಬರ ಇಳಿಕೆಗೆ ಕಾರಣವಾಗಿದೆ. ಗ್ರಾಹಕ ದರ ಸೂಚ್ಯಂಕ ಆಧಾರವಾಗಿ ಹಣದುಬ್ಬರ ಏಪ್ರಿಲ್‌ ತಿಂಗಳಲ್ಲಿ ಶೇ.2.99ರಷ್ಟಿತ್ತು. 2016 ಮೇನಲ್ಲಿ ಶೇ.5.76ರಷ್ಟಿತ್ತು. ಇನ್ನು ಕಳೆದ ಮೇ ತಿಂಗಳಲ್ಲಿ ಒಟ್ಟು ಆಹಾರ ಉತ್ಪನ್ನಗಳ ಹಣದುಬ್ಬರವೂ ಇಳಿಕೆ ಕಂಡಿದ್ದು ಶೇ.(-)1.05ಕ್ಕೆ ತಲುಪಿದೆ. ತರಕಾರಿಗಳ ದರ ಶೇ.13.44ರಷ್ಟು ಇಳಿಕೆಯಾಗಿದ್ದು, ಬೇಳೆಕಾಳು ಇತರ ಉತ್ಪನ್ನಗಳ ಬೆಲೆ ಶೇ.19.45ಕ್ಕೆ ಇಳಿಕೆಯಾಗಿದೆ. ಈ ಮೊದಲು ಹಣದುಬ್ಬರದ ಕಾರಣಕ್ಕಾಗಿಯೇ, ರಿಸರ್ವ್‌ ಬ್ಯಾಂಕ್‌ ರೆಪೋ ದರವನ್ನು ಯಥಾಸ್ಥಿತಿಯಲ್ಲಿಟ್ಟಿತ್ತು.

ಇದೇ ವೇಳೆ ಎಪ್ರಿಲ್‌ನಲ್ಲಿ ಕೈಗಾರಿಕಾ ಉತ್ಪಾದನೆ ತೀವ್ರ ಇಳಿಕೆ ಕಂಡಿದ್ದರಿಂದ ಕೈಗಾರಿಕಾ ಉತ್ಪಾದನಾ ಅಭಿವೃದ್ಧಿಯೂ ಶೇ.3.1ಕ್ಕೆ ಕುಸಿದಿದೆ. ಬಂಡವಾಳ ಸರಕುಗಳು, ಗ್ರಾಹಕ ಉತ್ಪನ್ನಗಳ ಉತ್ಪಾದನೆ ಕುಂಠಿತದಿಂದ ಈ ಪರಿಣಾಮವಾಗಿದೆ. ಕಳೆದ ವರ್ಷ ಕೈಗಾರಿಕಾ ಉತ್ಪಾದನಾ ದರ ಸೂಚ್ಯಂಕ (ಐಐಪಿ) ಶೇ.6.5ರಷ್ಟು ಇರಲಿದೆ ಎಂದು ನಿರೀಕ್ಷಿಸಲಾಗಿತ್ತು.