Andhra Pradesh: ಅದಾನಿ ಗ್ರೂಪ್‌ ಜತೆಗಿನ ಒಪ್ಪಂದ ರದ್ದತಿಗೆ ಆಂಧ್ರಪ್ರದೇಶ ಚಿಂತನೆ?

Team Udayavani, Nov 27, 2024, 6:30 AM IST

ನವದೆಹಲಿ: ಸೌರ ಯೋಜನೆ ಗುತ್ತಿಗೆಗೆ ಅದಾನಿ ಕಂಪನಿ 2029 ಕೋಟಿ ರೂ. ಲಂಚ ನೀಡಿದೆ ಎಂಬ ಅಮೆರಿಕದ ಆರೋಪದ ಬಳಿಕ ಸಾಲುಸಾಲು ಸಮಸ್ಯೆ ಕಂಪನಿಯನ್ನು ಕಾಡಲು ಆರಂಭಿಸಿದೆ. ಅದಾನಿ ಕಂಪನಿ ಜತೆ ಮಾಡಿಕೊಂಡಿರುವ ಒಪ್ಪಂದದ ರದ್ದತಿಯ ಬಗ್ಗೆ ಪರಿಶೀಲನೆ ನಡೆಸುವುದಾಗಿ ಆಂಧ್ರಪ್ರದೇಶ ಸರ್ಕಾರ ಹೇಳಿದೆ.

ಜಗನ್‌ಮೋಹನ್‌ ರೆಡ್ಡಿ ಸರ್ಕಾರ ಅಧಿಕಾರದಲ್ಲಿದ್ದ ಸಮಯದಲ್ಲಿ ಅದಾನಿ ಜತೆ ಒಪ್ಪಂದ ಮಾಡಿಕೊಳ್ಳಲಾಗಿತ್ತು. ಅವಕಾಶವಿದ್ದರೆ ಒಪ್ಪಂದ ರದ್ದು ಮಾಡಲಾಗುತ್ತದೆ ಎಂದು ಆಂಧ್ರಪ್ರದೇಶ ವಿತ್ತ ಸಚಿವ ಪಯ್ನಾವುಲಾ ಕೇಶವ್‌ ಹೇಳಿದ್ದಾರೆ.

ಇದೇ ವೇಳೆ, ಅದಾನಿ ಗ್ರೂಪ್‌ ವಿರುದ್ಧ ಅಮೆರಿಕ ಮಾಡಿರುವ ಲಂಚ ಆರೋಪದಲ್ಲಿ ಯಾವುದೇ ಹುರುಳಿಲ್ಲ ಎನಿಸಿದರೆ ಟ್ರಂಪ್‌ ಅಧಿಕಾರಕ್ಕೆ ಏರಿದ ಬಳಿಕ ಪ್ರಕರಣ ರದ್ದಾಗಲಿದೆ ಎಂದು ಅಮೆರಿಕದ ವಕೀಲರೊಬ್ಬರು ಹೇಳಿದ್ದಾರೆ. ಪ್ರತಿಯೊಬ್ಬ ಅಧ್ಯಕ್ಷರು ತಮ್ಮದೇ ಆದ ತಂಡವನ್ನು ಹೊಂದಿದ್ದು, ಅವರು ಪ್ರತಿ ಪ್ರಕರಣದ ಪರಿಶೀಲನೆ ನಡೆಸುತ್ತಾರೆ. ಈ ವೇಳೆ ಆರೋಪದಲ್ಲಿ ಸತ್ಯಾಂಶವಿಲ್ಲ ಎಂದು ಗೊತ್ತಾದರೆ ಕೇಸು ರದ್ದಾಗಲಿದೆ ಎಂದಿದ್ದಾರೆ.