Missile attack: ಇಸ್ರೇಲ್‌ ಮೇಲೆ ಇರಾನ್‌ ಶಬ್ದಾತೀತ ಬಾಂಬ್‌ ದಾಳಿ!

Team Udayavani, Oct 3, 2024, 7:25 AM IST

ಹೊಸದಿಲ್ಲಿ: ಆರು ತಿಂಗಳ ಅವಧಿಯಲ್ಲೇ ಇರಾನ್‌ ಸೇನೆ ಎರಡನೇ ಬಾರಿ ಇಸ್ರೇಲ್‌ ಮೇಲೆ ಕ್ಷಿಪಣಿಗಳ ದಾಳಿ ನಡೆಸಿದೆ. “ಆಪರೇಶನ್‌ ಟ್ರೂ ಪ್ರಾಮಿಸ್‌ 2′ ಹೆಸರಿನಲ್ಲಿ ಮಂಗಳವಾರ ನಡೆಸಿದ ದಾಳಿಯ ವೇಳೆ ಇರಾನ್‌ ಇದೇ ಮೊದಲ ಬಾರಿಗೆ ಇಸ್ರೇಲ್‌ ವಿರುದ್ಧ ಅತ್ಯಾಧುನಿಕ “ಹೈಪರ್‌ ಸಾನಿಕ್‌’ ಕ್ಷಿಪಣಿಗಳನ್ನು ಬಳಸಿದೆ.

ಎಪ್ರಿಲ್‌ ತಿಂಗಳಿನಲ್ಲಿ ನಡೆಸಿದ ಡ್ರೋನ್‌ ದಾಳಿಗೆ ಇರಾನ್‌ “ಆಪರೇಶನ್‌ ಟ್ರೂ ಪ್ರಾಮಿಸ್‌’ ಎಂದು ಹೆಸರಿಟ್ಟಿತ್ತು. ಮಂಗಳವಾರದ ದಾಳಿಗೆ ಹೈಪರ್‌ಸಾನಿಕ್‌ ಕ್ಷಿಪಣಿ ಬಳಸಿದೆ. ಇವು ಶಬ್ದಕ್ಕಿಂತ 5 ಪಟ್ಟು ಅಥವಾ ಅದ ಕ್ಕಿಂತಲೂ ಹೆಚ್ಚಿನ ವೇಗದಲ್ಲಿ ಅತೀ ದೂರದ ಗುರಿಯನ್ನು ನಿಖರ ವಾಗಿ ಛೇದಿಸುವ ಸಾಮರ್ಥ್ಯ ಹೊಂದಿವೆ. ವಿಶೇಷವೆಂದರೆ ಮಧ್ಯ ಪ್ರಾಚ್ಯ ಸಂಘರ್ಷದಲ್ಲಿ ಮೊದಲ ಬಾರಿಗೆ ಇಂಥ ಕ್ಷಿಪಣಿಗಳನ್ನು ಬಳಸಲಾಗಿದೆ.

ಮಂಗಳವಾರ ರಾತ್ರಿ ದಿಢೀರ್‌ ದಾಳಿ ಆರಂಭಿಸಿದ ಇರಾನ್‌, ಇಸ್ರೇಲ್‌ ವಿರುದ್ಧ ಮಧ್ಯಮ ವ್ಯಾಪ್ತಿಯ ಎಮಾದ್‌ ಮತ್ತು ಘದ್ರ ಕ್ಷಿಪಣಿಗಳನ್ನು ಬಳಸಿತ್ತು. ಆದರೆ, ಇದೇ ಮೊದಲ ಬಾರಿಗೆ ಫ‌ತ್ತಾಹ್‌-2 ಹೈಪರ್‌ಸಾನಿಕ್‌ ಕ್ಷಿಪಣಿ ಬಳಸಿದೆ. ಇರಾನ್‌ ಪ್ರಕಾರ ಈ ಕ್ಷಿಪಣಿಯು ಗಂಟೆಗೆ 1,400 ಕಿ.ಮೀ. ವೇಗದಲ್ಲಿ ಚಲಿಸಿದೆ. ಹೀಗಾಗಿ ಈ ಕ್ಷಿಪಣಿಗಳನ್ನು ಪತ್ತೆ ಹಚ್ಚುವುದು ಭಾರೀ ಕಷ್ಟ ಮಾತ್ರವಲ್ಲದೆ ಅಷ್ಟೊಂದು ಸುಲಭವಾಗಿ ಹೊಡೆದುರುಳಿಸಲು ಸಾಧ್ಯವಾಗುವುದಿಲ್ಲ. ಈ ಕ್ಷಿಪಣಿ ಗಳು ಹೆಚ್ಚು ನಿಖರವಾಗಿ ಗುರಿಯನ್ನು ತಲುಪಬಲ್ಲ ವುಗಳಾಗಿವೆ.

ಸೂಪರ್‌ ಸಾನಿಕ್‌ ಕ್ಷಿಪಣಿ
-ಈ ಕ್ಷಿಪಣಿಗಳು ಶಬ್ದದ ವೇಗ ಅಥವಾ ಅದಕ್ಕಿಂತ ಹೆಚ್ಚಿನ ವೇಗದಲ್ಲಿ ಚಲಿಸುತ್ತವೆ. ಅಂದರೆ ಮ್ಯಾಕ್‌1 ಮತ್ತು ಮ್ಯಾಕ್‌ 5ರ ವ್ಯಾಪ್ತಿಯಲ್ಲಿ ಗುರಿಯನ್ನು ತಲುಪತ್ತವೆ.
-ಈ ಕ್ಷಿಪಣಿಗಳಲ್ಲಿ ಜೆಟ್‌ ಎಂಜಿನ್‌ಗಳು ಅಥವಾ ರಾಕೆಟ್‌ ಬೂಸ್ಟರ್‌ ತಂತ್ರಜ್ಞಾನವನ್ನು ಬಳಸಲಾಗಿರುತ್ತದೆ.
-ನಿರ್ದಿಷ್ಟ ಗುರಿ ತಲುಪಲು ಈ ಕ್ಷಿಪಣಿಗಳಿಗೆ ಅತ್ಯಾಧುನಿಕ ಗೈಡೆನ್ಸ್‌ ಸಿಸ್ಟಮ್‌ ಬಳಸಲಾಗಿರುತ್ತದೆ.
-ಸೂಪರ್‌ ಸಾನಿಕ್‌ ಕ್ಷಿಪಣಿಗಳು ಬ್ಯಾಲಿಸ್ಟಿಕ್‌ ಪಥವನ್ನು ಅನುಸರಿಸಿತಮ್ಮ ಗುರಿಯನ್ನು ತಲುಪುತ್ತವೆ ಇವುಗಳನ್ನು ಸುಲಭವಾಗಿ ಹೊಡೆದುರುಳಿಸಬಹುದು.
-ಸೂಪರ್‌ಸಾನಿಕ್‌ಗೆ ಭಾರತದ ಬ್ರಹ್ಮೋಸ್‌, ರಷ್ಯಾದ ಪಿ-800 ಕ್ಷಿಪಣಿಗಳು ಅತ್ಯುತ್ತಮ ಉದಾಹರಣೆ

ಹೈಪರ್‌ ಸಾನಿಕ್‌ ಕ್ಷಿಪಣಿ
-ಹೈಪರ್‌ ಸಾನಿಕ್‌ ಕ್ಷಿಪಣಿಗಳು ಕನಿಷ್ಠ ಮ್ಯಾಕ್‌ 5ಕ್ಕಿಂತ ಹೆಚ್ಚು ಅಂದರೆ ಶಬ್ದದ ವೇಗಕ್ಕಿಂತ 5 ಪಟ್ಟು ಹೆಚ್ಚು ವೇಗದಲ್ಲಿ ಚಲಿಸುತ್ತವೆ. ಈ ವೇಗವು ಮ್ಯಾಕ್‌ 10ರವರೆಗೂ ತಲುಪಬಹುದು.
-ಹೆಚ್ಚಾಗಿ ಸ್ಕ್ರ್ಯಾಮ್‌ ಜೆಟ್ಸ್‌ ಎಂಜಿನ್‌ ಅಥವಾ ರಾಕೆಟ್‌ ಬೂಸ್ಟರ್‌ಗಳನ್ನು ಇವುಗಳಲ್ಲಿ ಬಳಸಲಾಗಿರುತ್ತದೆ.
-ಹೈಪರ್‌ ಸಾನಿಕ್‌ ಕ್ಷಿಪಣಿಗಳು ಅತಿ ಹೆಚ್ಚು ವೇಗದಲ್ಲಿ ಚಲಿಸುವುದರಿಂದ ಇವು ಗಳನ್ನು ಪತ್ತೆ ಹಚ್ಚುವುದು ಭಾರೀ ಕಷ್ಟ
-ಈ ಕ್ಷಿಪಣಿಗಳು ಬ್ಯಾಲಿಸ್ಟಿಕ್‌ ಪಥವನ್ನು ಅನುಸರಿಸದೇ ತಮ್ಮ ಗುರಿಯನ್ನು
ಹೆಚ್ಚು ನಿಖರವಾಗಿ ತಲುಪುತ್ತವೆ.
-ಹೈಪರ್‌ಸಾನಿಕ್‌ ಕ್ಷಿಪಣಿಗಳನ್ನು ಸುಲಭವಾಗಿ ಹೊಡೆದುರುಳಿಸಲು ಸಾಧ್ಯವಾಗುವುದಿಲ್ಲ.
-ಚೀನದ ಡಿಎಫ್-ಜೆಫ್ ಹಾಗೂ ರಷ್ಯಾದ ಅವಂಗಾರ್ಡ್‌ ಹೈಪರ್‌ ಸಾನಿಕ್‌ಗೆ ಅತ್ಯುತ್ತಮ ಉದಾಹರಣೆ

ಮ್ಯಾಕ್‌ ವೇಗ ಎಂದರೆ- ವಿಮಾನದ ವೇಗ ಮತ್ತು ಶಬ್ದದ ವೇಗದ ಅನುಪಾತವನ್ನು ಸೂಚಿಸುವ ಅಳತೆ ಯಾಗಿದೆ. ಮ್ಯಾಕ್‌ 1 ಎಂದರೆ ಪ್ರತೀ ಗಂಟೆಗೆ ಕ್ಷಿಪಣಿಯು 1,195 ಕಿ.ಮೀ. ವೇಗದಲ್ಲಿ ಚಲಿಸಿದೆ ಎಂದರ್ಥ.