ಹೊಸ ಜುಗಲ್‌ಬಂದಿಯತ್ತ ಇಸ್ರೋ!

Team Udayavani, Apr 3, 2017, 12:47 PM IST

ಬೆಂಗಳೂರು: ಉತ್ಕೃಷ್ಟ ಸುರಕ್ಷತಾ ವ್ಯವಸ್ಥೆಯನ್ನು ಹೊಂದಿರುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಕೇಂದ್ರ (ಇಸ್ರೋ)ವು ಇನ್ನು ಹೊಸ ಮಾದರಿಯ ಜುಗಲ್‌ಬಂದಿಗೆ ಸಾಕ್ಷಿಯಾಗಲಿದೆ. ಇದೇ ಮೊದಲ ಬಾರಿಗೆ ಖಾಸಗಿ ವಲಯವನ್ನು ಇಸ್ರೋ ಆಲಿಂಗಿಸಿಕೊಂಡಿದ್ದು, ಸರಕಾರಿ ಎಂಜಿನಿಯರ್‌ಗಳೊಂದಿಗೆ ಖಾಸಗಿ ಕಂಪೆ‌ನಿಗಳ ಎಂಜಿನಿಯರ್‌ಗಳು ಹೆಗಲಿಗೆ ಹೆಗಲು ಕೊಟ್ಟು ಕೆಲಸ ಮಾಡಲಿದ್ದಾರೆ. ಇವರ ಶ್ರಮದ ಪ್ರತೀಕವಾಗಿ ಹೊಸ ಉಪಗ್ರಹಗಳು ನಭಕ್ಕೆ ಚಿಮ್ಮಲಿವೆ.

ನಿಜ, ಇಸ್ರೋ ಈಗ ಖಾಸಗಿಗೂ ಮುಕ್ತವಾಗಿದ್ದು, ಬೆಂಗಳೂರಿನ ಆಲ್ಫಾ ಡಿಸೈನ್‌ ಟೆಕ್ನಾಲಜೀಸ್‌ ನೇತೃತ್ವದ ಒಕ್ಕೂಟವು ಭಾರತದ ನೇವಿಗೇಷನ್‌ ವ್ಯವಸ್ಥೆಗೆಂದು ಎರಡು ಪೂರ್ಣಪ್ರಮಾಣದ ಉಪಗ್ರಹಗಳನ್ನು ಅಭಿವೃದ್ಧಿಪಡಿಸಿಕೊಡಲಿದೆ. 3 ದಶಕಗಳ ಬಾಹ್ಯಾಕಾಶ ಸಾಧನೆ ಹಾಗೂ 150 ಮಿಷನ್‌ಗಳ ಮೂಲಕ ಹೆಸರುವಾಸಿಯಾಗಿರುವ ಇಸ್ರೋ ಹಿಂದೆಂದೂ ನಡೆಸದಂತಹ ಸಾಧನೆಗೆ ಮುಂದಾಗಿದ್ದು, ಖಾಸಗಿಯೊಂದಿಗೆ ಸೇರಿ ಪೂರ್ಣಪ್ರಮಾಣದ ದಿಶಾದರ್ಶಕ ಉಪಗ್ರಹವನ್ನು ಸಿದ್ಧಪಡಿಸಲಿದೆ. ಒಟ್ಟಿನಲ್ಲಿ 70 ಮಂದಿ ಎಂಜಿನಿಯರ್‌ಗಳ ತಂಡವು ಮುಂದಿನ 6 ತಿಂಗಳೊಳಗೆ ಈ ಕೆಲಸವನ್ನು ಪೂರ್ಣಗೊಳಿಸಲಿದೆ. ಕರ್ನಲ್‌ ಎಚ್‌.ಎಸ್‌. ಶಂಕರ್‌ ಅವರೇ ಒಕ್ಕೂಟದ ನೇತೃತ್ವ ವಹಿಸಿದ್ದು, ಉಪಗ್ರಹ ನಿರ್ಮಾಣ ಪ್ರಕ್ರಿಯೆಯ ಮೇಲೆ ಹದ್ದಿನ ಕಣ್ಣಿಟ್ಟಿದ್ದಾರೆ. ‘ಭಾರತದ ಕಂಪೆನಿಗಳಿಗೆ ಇದು ಸವಾಲೇ ಸರಿ,’ ಎಂದಿದ್ದಾರೆ ಶಂಕರ್‌.