25ರಂದು ಕಾರ್ಟೊಸ್ಯಾಟ್‌ ನಭಕ್ಕೆ ; ಶ್ರೀಹರಿಕೋಟಾದಿಂದ ನೆಗೆಯಲಿದೆ ಇಸ್ರೋ ನಿರ್ಮಿತ ಉಪಗ್ರಹ

Team Udayavani, Nov 20, 2019, 6:35 AM IST

ಸಾಂದರ್ಭಿಕ ಚಿತ್ರವನ್ನು ಬಳಸಲಾಗಿದೆ – Representative Image Used

ಹೊಸದಿಲ್ಲಿ: ಕಾರ್ಟೊಸ್ಯಾಟ್‌ ಉಪಗ್ರಹಗಳ ಸರಣಿಯ ಮೂರನೇ ಉಪಗ್ರಹವಾದ ‘ಕಾರ್ಟೊಸ್ಯಾಟ್‌ 3’ಯನ್ನು ನ. 25ರಂದು ಬೆಳಗ್ಗೆ 9:28ಕ್ಕೆ ಆಂಧ್ರಪ್ರದೇಶದ ಶ್ರೀಹರಿ ಕೋಟದಿಂದ ಉಡಾಯಿಸಲಾಗುತ್ತಿದೆ ಎಂದು ಇಸ್ರೋ ತಿಳಿಸಿದೆ.

ಭಾರತೀಯ ಭೂ ಭಾಗದ ಕರಾರುವಾಕ್‌ ಚಿತ್ರಣ ಹಾಗೂ ನಕ್ಷೆಯ ರಚನೆಗೆ ಅನುಕೂಲ ಕಲ್ಪಿಸುವ ಉದ್ದೇಶದಿಂದ ಈ ಉಪಗ್ರಹವನ್ನು ಉಡಾಯಿಸಲಾಗುತ್ತಿದೆ. ಈ ಸರಣಿಯಲ್ಲಿ ಈವರೆಗೆ ಉಡಾವಣೆಯಾಗಿರುವ ಉಪಗ್ರಹಗಳಲ್ಲೇ ಕಾರ್ಟೊಸ್ಯಾಟ್‌ 3 ಮೂರನೇ ತಲೆಮಾರಿನ ಉಪಗ್ರಹವಾಗಿದ್ದು ಅತ್ಯಾಧುನಿಕ ತಂತ್ರಜ್ಞಾನವನ್ನು ಹೊಂದಿದೆ. ಹೈ ರೆಸೆಲ್ಯೂಷನ್‌ ಕ್ಯಾಮೆರಾಗಳನ್ನು ಹೊಂದಿರುವ ಇದು ಅತ್ಯಂತ ಸ್ಪುಟವಾದ, ಸ್ಪಷ್ಟ ಚಿತ್ರಗಳನ್ನು ಕಳುಹಿಸುವ ಸಾಮರ್ಥ್ಯ ಹೊಂದಿದೆ ಎಂದು ಇಸ್ರೋ ಹೇಳಿದೆ.

ಇತರ ಉಪಗ್ರಹಗಳೂ ನಭಕ್ಕೆ: ‘ಕಾರ್ಟೊಸ್ಯಾಟ್‌-3’ರ ಜೊತೆಯಲ್ಲೇ ಅಮೆರಿಕಕ್ಕೆ ಸೇರಿದ ವಾಣಿಜ್ಯೋದ್ಯೇಶದ 13 ನ್ಯಾನೋ ಉಪಗ್ರಹಗಳನ್ನೂ ಉಡಾಯಿಸಲಾಗುತ್ತಿದೆ. ಪಿಎಸ್‌ಎಲ್‌ವಿ-ಸಿ 47 ರಾಕೆಟ್‌ನಲ್ಲಿ 97.5 ಡಿಗ್ರಿಯ ಕೋನದಲ್ಲಿ ಬಾಹ್ಯಾಕಾಶಕ್ಕೆ ನೆಗೆಯಲಿರುವ ಈ ಉಪಗ್ರಹಗಳು, ಭೂಮಿಯಿಂದ 509 ಕಿ.ಮೀ. ದೂರದಲ್ಲಿರುವ ಕಕ್ಷೆಯನ್ನು ತಲುಪಲಿವೆ ಎಂದು ಇಸ್ರೋ ವಿವರಿಸಿದೆ.

ಕಾರ್ಟೊಸ್ಯಾಟ್‌ಗಳ ಬಗ್ಗೆ ಒಂದಿಷ್ಟು
ಇವು ಭಾರತದ ಭೂಭಾಗಗಳ ಪರಿವೀಕ್ಷಣೆಗಾಗಿಯೇ ವಿಶೇಷವಾಗಿ ಸಿದ್ಧ ಪಡಿಸಲಾಗಿರುವ ಉಪಗ್ರಹಗಳು. ಈ ಸರಣಿಯ ಮೊದಲ ಉಪಗ್ರಹ 2005ರಲ್ಲಿ ಉಡಾವಣೆಗೊಂಡಿತ್ತು. ಆಅನಂತರ, ಕಾರ್ಟೊಸ್ಯಾಟ್‌ 2, 2ಎ, 2ಬಿ, 2ಸಿ, 2ಡಿ, 2ಇ, 2ಎಫ್ ಉಪಗ್ರಹಗಳನ್ನು ಕಕ್ಷೆಗೆ ಹಾರಿಬಿಡಲಾಗಿತ್ತು.