ಇಸ್ರೋ ಎಲ್‌ವಿಎಂ3 ಐತಿಹಾಸಿಕ ಮಿಷನ್‌

ಅ. 23ರಂದು ಜಾಗತಿಕ ವಾಣಿಜ್ಯ ಉಡಾವಣಾ ಮಾರುಕಟ್ಟೆಗೆ ಎಂಟ್ರಿ

Team Udayavani, Oct 16, 2022, 7:45 AM IST

ಇನ್ನೊಂದು ವಾರದಲ್ಲೇ ಇಸ್ರೋದ ಎಲ್‌ವಿಎಂ3 ರಾಕೆಟ್‌ ಜಾಗತಿಕ ವಾಣಿಜ್ಯ ಉಡಾವಣಾ ಸೇವೆಗಳ ಮಾರುಕಟ್ಟೆಗೆ ಪ್ರವೇಶ ಪಡೆಯಲಿದೆ. ಇದೇ 23ರಂದು ಬ್ರಿಟಿಷ್‌ ಸ್ಟಾರ್ಟಪ್‌ ಕಂಪನಿ ಒನ್‌ವೆಬ್‌ನ 36 ಬ್ರಾಂಡ್‌ಬ್ಯಾಂಡ್‌ ಉಪಗ್ರಹಗಳನ್ನು ಹೊತ್ತು ನಭಕ್ಕೆ ಚಿಮ್ಮುವ ಮೂಲಕ ಹೊಸ ಮೈಲುಗಲ್ಲು ಸೃಷ್ಟಿಸಲಿದೆ.

ಇಸ್ರೋದ ಅತಿ ಭಾರದ ರಾಕೆಟ್‌
ಎಲ್‌ವಿಎಂ3 ಅಥವಾ ಲಾಂಚ್‌ ವೆಹಿಕಲ್‌ ಮಾರ್ಕ್‌ 3 ಎನ್ನುವುದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ ಅತ್ಯಂತ ಭಾರದ ರಾಕೆಟ್‌ ಆಗಿದೆ. ಇದನ್ನು ಈ ಹಿಂದೆ “ಜಿಎಸ್‌ಎಲ್‌ವಿ ಎಂಕೆ 3′ ಎಂದು ಕರೆಯಲಾಗುತ್ತಿತ್ತು.

ಒಟ್ಟು ಎಷ್ಟು ಉಪಗ್ರಹಗಳ ಉಡಾವಣೆ
ಬ್ರಿಟನ್‌ನ ಒನ್‌ವೆಬ್‌ ಸಂಸ್ಥೆಯ 36 ಬ್ರಾಡ್‌ಬ್ಯಾಂಡ್‌ ಸಂವಹನಾ ಉಪಗ್ರಹಗಳನ್ನು ಎಲ್‌ವಿಎಂ3 ಮೂಲಕ ಅ.23ರಂದು ಉಡಾವಣೆ ಮಾಡಲಾಗುತ್ತದೆ. ಇದಾದ ಬಳಿಕ 2023ರ ಜನವರಿಯಲ್ಲಿ ಮತ್ತೆ ಇದೇ ಸಂಸ್ಥೆಯ 36 ಸ್ಯಾಟಲೈಟ್‌ಗಳನ್ನು ಎಲ್‌ವಿಎಂ3 ರಾಕೆಟ್‌ ಕಕ್ಷೆಗೆ ಸೇರಿಸಲಿದೆ.

ಹಲವು ಪ್ರಥಮಗಳು
– ಇದು ಇಸ್ರೋದ ಅತಿ ಭಾರದ ಎಲ್‌ವಿಎಂ3 ರಾಕೆಟ್‌ನ ಮೊದಲ ವಾಣಿಜ್ಯಿಕ ಉಡಾವಣೆ
– ಇದೇ ಮೊದಲ ಬಾರಿಗೆ 6 ಟನ್‌ ತೂಕದ ಪೇಲೋಡ್‌ ಹೊತ್ತು ಭಾರತದ ರಾಕೆಟ್‌ನ ಪಯಣ
– ತನ್ನ ಉಪಗ್ರಹಗಳನ್ನು ಕಕ್ಷೆಗೆ ಸೇರಿಸಲು ಮೊದಲ ಬಾರಿಗೆ ಭಾರತದ ರಾಕೆಟ್‌ ಬಳಸುತ್ತಿರುವ ಒನ್‌ವೆಬ್‌
– ಭೂಮಿಯ ಕೆಳ ಕಕ್ಷೆ(ಎಲ್‌ಇಒ)ಯಲ್ಲಿ ಉಪಗ್ರಹ ಉಡಾವಣೆಗೆ ಜಿಎಸ್‌ಎಲ್‌ವಿ ಎಂಕೆ 3 ಬಳಕೆ

ಯಾವಾಗ? – ಅಕ್ಟೋಬರ್‌ 23
ಎಲ್ಲಿಂದ ಉಡಾವಣೆ? – ಆಂಧ್ರಪ್ರದೇಶದ ಶ್ರೀಹರಿಕೋಟಾ
ಅ.23ರಂದು ಉಡಾವಣೆಗೊಳ್ಳಲಿರುವ ಉಪಗ್ರಹಗಳು- 36
ಮುಂದಿನ ಜನವರಿಯಲ್ಲಿ ಉಡಾವಣೆಯಾಗುವ ಉಪಗ್ರಹಗಳು- 36
ಒನ್‌ವೆಬ್‌ ಕಂಪನಿ ಈವರೆಗೆ ಉಡಾವಣೆ ಮಾಡಿರುವ ಒಟ್ಟು ಉಪಗ್ರಹ- 428