ಡೈನೊಸರ್‌ ಪಳೆಯುಳಿಕೆ ಪತ್ತೆ; 14.5 ಕೋಟಿ ವರ್ಷಗಳ ಹಿಂದೆ ಜೀವಂತವಾಗಿದ್ದ ದೈತ್ಯಜೀವಿಗಳು

Team Udayavani, Jun 13, 2022, 7:00 AM IST

ನವದೆಹಲಿ: ಜುರಾಸಿಕ್‌ ಪಾರ್ಕ್‌ನಂಥ ಸಿನಿಮಾ ಹಾಗೂ ಮುಂತಾದ ಬರಹಗಳನ್ನು ಓದಿ, ಡೈನೊಸರ್‌ಗಳ ಬಗ್ಗೆ ನಾವು ಕಲ್ಪಿಸಿಕೊಂಡಿರುವುದಕ್ಕಿಂತ ದೈತ್ಯವಾದ, ಅತಿ ಭಯಂಕರವಾದ ಡೈನೊಸಾರ್‌ಗಳು ಈ ಭೂಮಿಯಲ್ಲಿ ವಾಸವಾಗಿದ್ದವೆಂಬ ಕುತೂಹಲಕಾರಿ ವಿಚಾರವನ್ನು ವಿಜ್ಞಾನಿಗಳು ಪತ್ತೆ ಹಚ್ಚಿದ್ದಾರೆ.

ಸುಮಾರು 14.5 ಕೋಟಿ ವರ್ಷಗಳ ಹಿಂದೆ, ದ್ವಿಪಾದಿಯಾಗಿ ಸಂಚರಿಸುತ್ತಿದ್ದ, ಕೈಗಳಲ್ಲಿ- ಕಾಲುಗಳಲ್ಲಿ ಅತಿ ಉದ್ದವಾಗಿರುವ, ಚಾಕುವಿನಷ್ಟು ಹರಿತವಾಗಿರುವಂಥ ಪಂಜಗಳನ್ನು ಇವು ಹೊಂದಿದ್ದವು ಎಂದು ಲೈವ್‌ ಸೈನ್ಸ್‌ ಎಂಬ ನಿಯತಕಾಲಿಕೆಯಲ್ಲಿ ಪ್ರಕಟವಾಗಿವೆ.

ಜಪಾನ್‌ನ ಉತ್ತರ ಭಾಗದಲ್ಲಿರುವ ದ್ವೀಪವೊಂದರಲ್ಲಿರುವ ಹಕ್ಕಾಯ್‌ಡೊ ಎಂಬಲ್ಲಿನ ಸಮುದ್ರದ ದಂಡೆಯಲ್ಲಿರುವ ಕೆಸರಿನ ಆಳದಲ್ಲಿ ಈ ಜಾತಿಯ ಡೈನೊಸಾರ್‌ಗಳ ಪಳೆಯುಳಿಕೆಗಳು ಪತ್ತೆಯಾಗಿದ್ದು, ಅವುಗಳನ್ನು ಅಮೆರಿಕ ಹಾಗೂ ಜಪಾನ್‌ನ ವಿಜ್ಞಾನಿಗಳು ಜಂಟಿಯಾಗಿ ಸಂಶೋಧನೆಗೊಳಪಡಿಸಿದ್ದರು. ಆ ಸಂಶೋಧನೆಗಳಿಂದ ಈ ದೈತ್ಯ ಜೀವಿಗಳ ಬಗೆಗಿನ ವಿಚಾರಗಳು ಪತ್ತೆಯಾಗಿವೆ.

ಇವು ಸಸ್ಯಾಹಾರಿ ಪ್ರಾಣಿಗಳು
ಈ ಮಾದರಿಯ ಡೈನೊಸಾರ್‌ಗಳಿಗೆ “ಪರಾಲಿಥೆರಿಸೈನೋಸಾರಸ್‌ ಝೆಪಾನಿಕಸ್‌’ ಎಂದು ಹೆಸರಿಡಲಾಗಿದೆ. ಈ ಮಾದರಿಯ ಡೈನೊಸರ್‌ಗಳು ಥೆರಿಸೈನೋಸರಸ್‌ ಜಾತಿಗೆ ಸೇರಿದವು. ಈ ಮಾದರಿಯ ಡೈನೊಸಾರ್‌ಗಳು ಎರಡು ಕಾಲುಗಳಲ್ಲಿ ನಡೆಯುಂಥವು (ದ್ವಿಪಾದಿಗಳು), ಸಸ್ಯಾಹಾರ ಸೇವಿಸುವಂಥವು ಹಾಗೂ ಕಾಲುಗಳಲ್ಲಿ ಕೇವಲ ಮೂರು ಬೆರಳುಗಳನ್ನು ಹೊಂದಿರುವಂಥವಾಗಿದ್ದವು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.