ಜಾರ್ಖಂಡ್‌ನ‌ ಹಝಾರಿಬಾಗ್‌ ರೈಲು ನಿಲ್ದಾಣದಲ್ಲಿ ಅವಳಿ ಸ್ಫೋಟ

Team Udayavani, May 22, 2017, 11:26 AM IST

ಗಿರಿಧ್‌, ಜಾರ್ಖಂಡ್‌ : ಜಾರ್ಖಂಡ್‌ನ‌ ಹಝಾರಿಬಾಗ್‌ ರೈಲ್ವೇ ನಿಲ್ದಾಣದಲ್ಲಿ ನಿನ್ನೆ ಭಾನುವಾರ ತಡರಾತ್ರಿ ಎರಡು ಸ್ಫೋಟಗಳು ಸಂಭವಿಸಿದ್ದು ಜನರಲ್ಲಿ ತೀವ್ರವಾದ ಭೀತಿ, ಗೊಂದಲ, ಅಭದ್ರತೆಯನ್ನು ಸೃಷ್ಟಿಸಿದೆ. 

ದಿಲ್ಲಿಯಿಂದ ಕೋಲ್ಕತಾಗೆ ಗಯಾ ಮತ್ತು ಧನಬಾದ್‌ ಮೂಲಕ ಸಾಗುವ ರೈಲು ಮಾರ್ಗ ಇರುವ ರೈಲು ನಿಲ್ದಾಣದಲ್ಲಿ ಈ ಸ್ಫೋಟ ಸಂಭವಿಸಿದೆ. 

ಭಾನುವಾರ ತಡ ರಾತ್ರಿ ಹಝಾರಿಬಾಗ್‌ ರೈಲು ನಿಲ್ದಾಣದಿಂದ ಎರಡು ಪ್ರಬಲ ಸ್ಫೋಟಗಳ ಭೀಕರ ಸದ್ದು ಕೇಳಿ ಬಂದಾಗ ಆಸುಪಾಸಿನ ಪ್ರದೇಶಗಳ ಜನರು ಭಯಭೀತರಾದರು. 

ಸ್ಫೋಟದ ಪರಿಣಾಮವಾಗಿ ಹುಡುಗನೊಬ್ಬನ ಬಲಗೈ ತುಂಡಾಗಿದ್ದು ಆತನಿಗೆ ಧನಬಾದ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. 

ಈ ಅವಳಿ ಸ್ಫೋಟಗಳಿಗೆ ಬಳಸಲಾದ ನ್ಪೋಟಕಗಳು ಯಾವುವು ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ. 

ರೈಲು ನಿಲ್ದಾಣದಲ್ಲಿ ಅನಾಥವಾಗಿ ಒಂದೆಡೆ ಬಿದ್ದುಕೊಂಡಿದ್ದ ಚೀಲದಲ್ಲಿದ್ದ ಸ್ಫೋಟಕಗಳು ಸ್ಫೋಟಗೊಂಡಿರುವುದಾಗಿ ಶಂಕಿಸಲಾಗಿದೆ. 

ಪೊಲೀಸರು ಪ್ರಕರಣದ ಬಗ್ಗೆ ಕೇಸು ದಾಖಲಿಸಿಕೊಂಡು ತನಿಖೆಯನ್ನು ಚುರುಕುಗೊಳಿಸಿದ್ದಾರೆ.