ಬಲ್ಬ್ ಆವಿಷ್ಕರಿಸಿದ್ದು ಎಡಿಸನ್‌ ಅಲ್ಲ !; ಜೋ ಬೈಡೆನ್‌ ವಿವಾದಿತ ಹೇಳಿಕೆ

Team Udayavani, Sep 5, 2020, 6:36 AM IST

ಹೊಸದಿಲ್ಲಿ: ವಿದ್ಯುತ್‌ ಬಲ್ಬ್ ಆವಿಷ್ಕರಿಸಿದ್ದು ಒಬ್ಬ ಕಪ್ಪುವರ್ಣೀಯ ವ್ಯಕ್ತಿಯೇ ವಿನಾ ಎಡಿಸನ್‌ ಹೆಸರಿನ ಬಿಳಿ ವರ್ಣೀಯನಲ್ಲ! ಹೀಗೆಂದು ಹೇಳುವ ಮೂಲಕ ಅಮೆರಿಕ ಅಧ್ಯಕ್ಷೀಯ ಆಕಾಂಕ್ಷಿ, ಡೆಮಾಕ್ರಾಟ್‌ ಪಕ್ಷದ ಜೋ ಬೈಡೆನ್‌ ವಿವಾದದ ಕಿಡಿ ಹೊತ್ತಿಸಿದ್ದಾರೆ. ಅಧ್ಯಕ್ಷೀಯ ಚುನಾವಣೆ ಸಮೀಪಿಸುತ್ತಿರು­ವಂತೆಯೇ ಆಫ್ರಿಕನ್‌ ಅಮೆರಿಕನ್‌ ಮತದಾರರನ್ನು ಸೆಳೆಯುವ ಸಲುವಾಗಿ ಅವರು ಈ ರೀತಿಯ ಹೇಳಿಕೆ ನೀಡಿದ್ದಾರೆ.

ಗ್ರೇಸ್‌ ಲುಥೆರನ್‌ ಚರ್ಚ್‌ನಲ್ಲಿ ಮಾತನಾ­ಡಿದ ಬೈಡೆನ್‌, ನಾವು ಇತಿಹಾಸ ತರಗತಿಗಳಲ್ಲಿ ಇತಿಹಾಸವನ್ನು ಹೇಳಿಕೊಡುತ್ತಿಲ್ಲ. ಇದು ಏಕೆಂದೇ ಗೊತ್ತಾಗುತ್ತಿಲ್ಲ. ಲೈಟ್‌ ಬಲ್ಬ್ ಅಭಿವೃದ್ಧಿಪಡಿಸಿದ್ದು ಒಬ್ಬ ಕಪ್ಪುವರ್ಣೀಯ ವ್ಯಕ್ತಿ. ಅದನ್ನು ಶ್ವೇತವರ್ಣೀಯ ಎಡಿಸನ್‌ ಕಂಡು­ಹಿಡಿದಿದ್ದಲ್ಲ ಎಂದಿದ್ದಾರೆ. ಜತೆಗೆ, ಹಲವು ಶತಮಾನಗಳಿಂದಲೂ ನಡೆದು­ಕೊಂಡು ಬಂದ ವ್ಯವಸ್ಥಿತ ಜನಾಂಗೀಯ ನಿಂದನೆ­ಯನ್ನು ಎದುರಿಸಲು ನಾನು ಅಮೆರಿಕನ್ನರಿಗೆ ಸಹಾಯ ಮಾಡುತ್ತೇನೆ ಎಂದೂ ಹೇಳಿದ್ದಾರೆ.

ಬೈಡೆನ್‌ರಿಂದ ಈ ಹೇಳಿಕೆ ಹೊರಬರುತ್ತಲೇ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆ ಆರಂಭವಾಗಿದೆ. ಥಾಮಸ್‌ ಎಡಿಸನ್‌ ಅವರೇ ಲೈಟ್‌ ಬಲ್ಬ್ ಕಂಡುಹಿಡಿದವರು. ಆ ಬಲ್ಬ್ ದೀರ್ಘ‌ಕಾಲ ಉರಿಯುವಂಥ ಫಿಲಮೆಂಟ್‌ ಅಭಿವೃದ್ಧಿಪಡಿಸಿದ್ದು ಕಪ್ಪುವರ್ಣೀಯರಾಗಿದ್ದ ಲೆವಿಸ್‌ ಲ್ಯಾಟಿಮರ್‌ ಎಂದು ಜಾಲತಾಣಿಗರು ಬರೆದುಕೊಂಡಿದ್ದಾರೆ.

ಟ್ರಂಪ್‌ ವಿವಾದ
ಇನ್ನೊಂದೆಡೆ, ಅಮೆರಿಕದ ಹಾಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರೂ ಹೊಸ ವಿವಾದವೊಂದನ್ನು ಸೃಷ್ಟಿಸಿದ್ದಾರೆ. ಮೊದಲ ವಿಶ್ವಯುದ್ಧದಲ್ಲಿ ಮಡಿದ ಅಮೆ­ರಿಕನ್‌ ಯೋಧರ ಸ್ಮಾರಕಕ್ಕೆ ತೆರಳಲು ನಿರಾಕರಿಸಿದ ಟ್ರಂಪ್‌, ‘ನಾನೇಕೆ ಅಲ್ಲಿಗೆ ಹೋಗಲಿ? ಯುದ್ಧದಲ್ಲಿ ಮಡಿದವರೆಲ್ಲ ಸೋತವರು ಮತ್ತು ಮೋಸ ಹೋದವರು’ ಎಂಬ ಹೇಳಿಕೆ ನೀಡಿದ್ದಾರೆ ಎಂದು ವರದಿಯಾಗಿತ್ತು. ಇದು ವಿವಾದವಾಗುತ್ತಿದ್ದಂತೆ ಪ್ರತಿಕ್ರಿಯಿಸಿರುವ ಟ್ರಂಪ್‌, ನಾನು ಹಾಗೆ ಹೇಳಿಯೇ ಇಲ್ಲ ಎಂದಿದ್ದಾರೆ.