ಜಡ್ಜ್ ಬಿ.ಎಚ್‌.ಲೋಯಾ ಪ್ರಕರಣಕ್ಕೆ ಮರುಜೀವ

Team Udayavani, Jan 23, 2018, 6:00 AM IST

ಹೊಸದಿಲ್ಲಿ: ಸಿಬಿಐ ವಿಶೇಷ ಕೋರ್ಟ್‌ ಜಡ್ಜ್ ಬಿ.ಎಚ್‌.ಲೋಯಾ ಸಾವಿನ ಪ್ರಕರಣ ಮತ್ತೆ ಚಿಗುರೊಡೆದಿದೆ. ಸುಪ್ರೀಂ ಕೋರ್ಟ್‌ನಲ್ಲಿ ಸಿಜೆಐ ದೀಪಕ್‌ ಮಿಶ್ರಾ ನೇತೃತ್ವದ ಪೀಠದಿಂದ ವಿಚಾರಣೆ ಆರಂಭವಾಗಿದೆ.

ಪ್ರಕರಣ ಸಂಬಂಧ ಬಾಂಬೆ ಹೈಕೋರ್ಟ್‌ನಲ್ಲಿ ಸಲ್ಲಿಕೆಯಾಗಿರುವ ಎರಡು ಸಾರ್ವಜನಿಕ ಹಿತಾಸಕ್ತಿ ಅರ್ಜಿ(ಪಿಐಎಲ್‌) ಗಳನ್ನು ತನ್ನಲ್ಲಿ ವರ್ಗಾಯಿಸಿಕೊಂಡಿರುವ ಸುಪ್ರೀಂಕೋರ್ಟ್‌, ದೇಶದ ಇತರ ಯಾವುದೇ ಕೋರ್ಟ್‌ ಕೂಡ ಲೋಯಾ ಸಾವಿಗೆ ಸಂಬಂಧಿಸಿದ ಅರ್ಜಿಗಳನ್ನು ವಿಚಾರಣೆಗೆ ಕೈಗೆತ್ತಿಕೊಳ್ಳುವಂತಿಲ್ಲ ಎಂದು ಸೂಚನೆ ನೀಡಿದೆ. ಜತೆಗೆ ಅರ್ಜಿದಾರರು ವಾದಿಸಿದಂತೆ ಪ್ರಕರಣದಲ್ಲಿ ಕೆಲವು ಗಂಭೀರ ವಿಚಾರಗಳು ಇವೆ ಎಂದು ನ್ಯಾಯಪೀಠ ಅಭಿಪ್ರಾಯಪಟ್ಟಿದೆ. ಹಾಗಂತ, ಯಾರ ಮೇಲೂ ಅಪವಾದ ಹೊರಿಸ ಬಾರದು ಎಂದೂ ಹೇಳಿದೆ.

ಸೋಮವಾರ ಬರೋಬ್ಬರಿ ನಾಲ್ಕು ತಾಸುಗಳ ಕಾಲ ನಡೆದ ಬಿರುಸಿನ ವಾದ-ಪ್ರತಿವಾದದ ಸಂದರ್ಭ ಮುಖ್ಯ ನ್ಯಾಯ ಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ನ್ಯಾಯಪೀಠ, ಸಿಬಿಐ ವಿಶೇಷ ಕೋರ್ಟ್‌ನ ಜಡ್ಜ್ ಲೋಯಾರ ಸಾವಿನ ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲ ದಾಖಲೆಗಳನ್ನು ನೀಡುವಂತೆ ಸೂಚಿಸಿತು. ಫೆ. 2 ರಂದು ಮುಂದಿನ ವಿಚಾರಣೆ ನಡೆಯಲಿದ್ದು. ಆ ದಿನದ ಒಳಗಾಗಿ ಸಲ್ಲಿಕೆಯಾಗದೆ ಇರುವ ಎಲ್ಲ ದಾಖಲೆಗಳನ್ನೂ ನೀಡುವಂತೆ ಹೇಳಿತು. ಅಲ್ಲದೆ, ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲಾ ದಾಖಲೆಗಳನ್ನು ನ್ಯಾಯಪೀಠ ಗಂಭೀರವಾಗಿ ಪರಿಶೀಲನೆ ನಡೆಸಬೇಕಿದೆ’ ಎಂದಿತು.

ವಕೀಲ ದವೆಗೆ ತರಾಟೆ
ಬಾಂಬೆ ವಕೀಲರ ಒಕ್ಕೂಟದ ಪರವಾಗಿ ವಾದಿಸಿದ ಹಿರಿಯ ನ್ಯಾಯವಾದಿ ದುಷ್ಯಂತ್‌ ದವೆ ವಾದ ಮಂಡಿಸುವ ವೇಳೆ “ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ರನ್ನು ರಕ್ಷಿಸಲು ಎಲ್ಲ ರೀತಿಯ ಪ್ರಯತ್ನಗಳು ನಡೆಯುತ್ತಿವೆ’ ಎಂದು ಹೇಳಿದರು. ಮಹಾರಾಷ್ಟ್ರ ಸರಕಾರದ ಪರ ವಕೀಲ ಹರೀಶ್‌ ಸಾಳ್ವೆ, ಆ ಹೇಳಿಕೆಗೆ ಪ್ರತಿಭಟನೆ ಸಲ್ಲಿಸಿದರು. ಇದರಿಂದ ವಸ್ತುಶಃ ಕೋಪೋದ್ರಿಕ್ತರಾದ ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ಅವರು, “ಈ ದಿನದವರೆಗೂ ನ್ಯಾ| ಲೋಯಾ ಅವರದ್ದು ಸಹಜ ಸಾವು. ಹೀಗಾಗಿ ಈ ಬಗ್ಗೆ ಯಾರ ಮೇಲೂ ಅಪವಾದ ಹೊರಿಸುವುದು ಬೇಡ’ ಎಂದು ಹೇಳಿದರು.