ಸಾವಿನ ಬಗ್ಗೆ ಶಂಕೆ ಇಲ್ಲ: ನ್ಯಾ| ಲೋಯಾ ಪುತ್ರ

Team Udayavani, Jan 15, 2018, 6:25 AM IST

ಮುಂಬಯಿ: “ಅಪ್ಪನ ನಿಧನದ ಬಗ್ಗೆ ನನಗೆ ಮೊದಲು ಸ್ವಲ್ಪ ಅನುಮಾನವಿತ್ತು. ಆದರೆ, ಈಗ ಯಾವುದೇ ಅನುಮಾನವಿಲ್ಲ,’ ಎಂದು ಅನುಮಾನಾಸ್ಪದವಾಗಿ ನಿಧನರಾದ ವಿಶೇಷ ಸಿಬಿಐ ನ್ಯಾಯಾಧೀಶ ಬಿ.ಎಚ್‌.ಲೋಯಾ ಅವರ ಪುತ್ರ ಅನೂಜ್‌ ಲೋಯಾ(21) ಹೇಳಿದ್ದಾರೆ. ಅಲ್ಲದೆ, ಈ ವಿಚಾರದಲ್ಲಿ ದಯವಿಟ್ಟು ಯಾರೂ ರಾಜಕೀಯ ಮಾಡಬೇಡಿ. ನಮಗೆ ಕಿರುಕುಳ ಕೊಡಬೇಡಿ ಎಂದೂ ಮನವಿ ಮಾಡಿಕೊಂಡಿದ್ದಾರೆ.

ನ್ಯಾ| ಲೋಯಾ ಅವರ ನಿಗೂಢ ಸಾವು ದೇಶಾದ್ಯಂತ ಭಾರೀ ಚರ್ಚೆಗೆ ಕಾರಣವಾಗಿರುವ ಬೆನ್ನಲ್ಲೇ ಅನೂಜ್‌ ಇದೇ ಮೊದಲ ಬಾರಿಗೆ ಮಾಧ್ಯಮಗಳ ಮುಂದೆ ಬಂದು ಈ ಮಾತುಗಳ ನ್ನಾಡಿದ್ದಾರೆ. ಈಗಾಗಲೇ ಅವರ ಸಾವಿನ ಕುರಿತು ತನಿಖೆಯಾಗಬೇಕು ಎಂಬ ಅರ್ಜಿಯನ್ನು ಸುಪ್ರೀಂ ಕೋರ್ಟ್‌ ಪುರಸ್ಕರಿಸಿದ್ದು, ಮಹಾರಾಷ್ಟ್ರ ಸರಕಾರದಿಂದ ವರದಿಯನ್ನೂ ಕೇಳಿದೆ. ಆದರೆ, ಅನೂಜ್‌ ಅವರು ರವಿವಾರ ಮಾತನಾಡಿ, “ಆರಂಭದಲ್ಲಿ ನನಗೆ ಕೆಲವು ಅನುಮಾನ ಮೂಡಿತ್ತು. ನನ್ನ ಅಜ್ಜ ಹಾಗೂ ಚಿಕ್ಕಮ್ಮನಿಗೂ ಶಂಕೆಯಿತ್ತು. ಆದರೆ, ಈಗ ಅದೆಲ್ಲ ನಿವಾರಣೆಯಾಗಿದೆ,’ ಎಂದಿದ್ದಾರೆ.
 

ಕೆಲವು ರಾಜಕಾರಣಿಗಳು ಮತ್ತು ಎನ್‌ಜಿಒಗಳು ನಮ್ಮ ಮೇಲೆ ಒತ್ತಡ ತರುತ್ತಿವೆ. ದಯವಿಟ್ಟು ನಮಗೆ ತೊಂದರೆ ಕೊಡಬೇಡಿ ಎಂದು ಕೇಳಿಕೊಳ್ಳುತ್ತೇನೆ. ನಮ್ಮ ಕುಟುಂಬವು ಯಾರ ವಿರುದ್ಧವೂ ಆರೋಪ ಹೊರಿಸುವುದಿಲ್ಲ. ಅಪ್ಪನ ಸಾವಿನ ಕುರಿತು ನಮ್ಮನ್ನು ಪ್ರಶ್ನಿಸುವುದನ್ನು ಇನ್ನಾದರೂ ನಿಲ್ಲಿಸಿ ಎಂದೂ ಅನೂಜ್‌ ಹೇಳಿದ್ದಾರೆ. ಕಳೆದ ವರ್ಷ ನಿಯತ ಕಾಲಿಕೆಯೊಂದು ಪ್ರಕಟಿಸಿದ್ದ ವರದಿಯಲ್ಲಿ, ನ್ಯಾ.ಲೋಯಾ ಸಾವಿನ ಕುರಿತು ಎದ್ದಿರುವ ಅನುಮಾನಗಳ ಬಗ್ಗೆ ಅವರ ಅಪ್ಪ ಹರಿಕೃಷ್ಣ ಲೋಯಾ, ಸಹೋದರಿ ಅನುರಾಧಾ ಬಿಯಾನಿ, ಸವಿತಾ ಮಂಧನೆ ಮಾತನಾಡಿದ್ದರು.