ಸಿಎಸ್‌ಎಟಿ ಅಧ್ಯಕ್ಷ ಸ್ಥಾನ ನಿರಾಕರಿಸಿದ ನ್ಯಾ| ಸಿಕ್ರಿ 

Team Udayavani, Jan 14, 2019, 12:30 AM IST

ಹೊಸದಿಲ್ಲಿ: ಲಂಡನ್‌ನಲ್ಲಿರುವ ಕಾಮನ್ವೆಲ್ತ್‌ ರಾಷ್ಟ್ರಗಳ ಸೆಕ್ರೆಟರಿಯೇಟ್‌ ಆರ್ಬಿಟ್ರೇಷನ್‌ ನ್ಯಾಯಾಧಿಕರಣ (ಸಿಎಸ್‌ಎಟಿ) ಅಧ್ಯಕ್ಷ ಸ್ಥಾನಕ್ಕೆ ತಮ್ಮನ್ನು ಆಯ್ಕೆ ಮಾಡಿ ಕೇಂದ್ರ ಸರಕಾರ ನೀಡಿದ್ದ ಅವಕಾಶವನ್ನು ಸುಪ್ರೀಂ ಕೋರ್ಟ್‌ನ ನ್ಯಾಯಮೂರ್ತಿ ಎ.ಕೆ. ಸಿಕ್ರಿ ಅವರು ನಿರಾಕರಿಸಿದ್ದಾರೆ.
 
ಇತ್ತೀಚೆಗೆ, ಸಿಎಸ್‌ಎಟಿ ಅಧ್ಯಕ್ಷ ಸ್ಥಾನಕ್ಕೆ ಅವರನ್ನು ನೇಮಿಸುವ ಪ್ರಸ್ತಾವನೆಯನ್ನು ಕೇಂದ್ರ ಸರಕಾರವು ನ್ಯಾ. ಸಿಕ್ರಿ ಅವರ ಮುಂದಿಟ್ಟಿದ್ದು, ಇದಕ್ಕೆ ನ್ಯಾ| ಸಿಕ್ರಿ ಅವರೂ ಒಪ್ಪಿಗೆ ಸೂಚಿಸಿದ್ದರು. ಆದರೆ, ಇದು ಭಾರೀ ಟೀಕೆಗೆ ಕಾರಣವಾಗಿತ್ತು. 

ಇತ್ತೀಚೆಗೆ, ಸಿಬಿಐ ನಿರ್ದೇಶಕ ಅಲೋಕ್‌ ವರ್ಮಾ ಅವರನ್ನು ಆ ಸ್ಥಾನದಿಂದ ವಜಾಗೊಳಿಸುವ ನಿರ್ಧಾರ ಕೈಗೊಂಡಿದ್ದ ಸಮಿತಿಯ ಸಭೆಯಲ್ಲಿ ನ್ಯಾ| ಸಿಕ್ರಿ ಅವರೂ ಪಾಲ್ಗೊಂಡು ವರ್ಮಾರನ್ನು ವಜಾಗೊಳಿಸುವ ಕೇಂದ್ರ ಸರಕಾರದ ಇರಾದೆ ಪರವಾಗಿ ಮತ ಚಲಾಯಿಸಿದ್ದರು. ಹಾಗಾಗಿ, ನ್ಯಾ| ಸಿಕ್ರಿ ಅವರಿಗೆ ಕೇಂದ್ರ ಸಿಎಸ್‌ಎಟಿ ಅಧ್ಯಕ್ಷ ಸ್ಥಾನ ನೀಡುತ್ತಿದೆ ಎಂದು ಕೆಲವರು ಆರೋಪಿಸಿದ್ದರು. 

ಸಾಮಾಜಿಕ ಜಾಲತಾಣಗಳಲ್ಲೂ ಈ ಬಗ್ಗೆ ಭಾರೀ ಚರ್ಚೆ ಆರಂಭವಾಗಿತ್ತು. ಈ ಎಲ್ಲ ಬೆಳವಣಿಗೆಗಳ ಬೆನ್ನಲ್ಲೇ, ನ್ಯಾ. ಸಿಕ್ರಿ ಅವರು ಈ ಅಪರೂಪದ ಅವಕಾಶದಿಂದ ಹಿಂದೆ ಸರಿದಿದ್ದಾರೆ ಎಂದು ಮೂಲಗಳು ತಿಳಿಸಿವೆ.