ಸತ್ಯಾರ್ಥಿ ಭಾರತ ಯಾತ್ರೆ ಆರಂಭ

Team Udayavani, Sep 12, 2017, 8:30 AM IST

ಹೊಸದಿಲ್ಲಿ: ಮಕ್ಕಳ ಮೇಲಿನ ಲೈಂಗಿಕ ದೌರ್ಜನ್ಯ ಹಾಗೂ ಮಕ್ಕಳ ಕಳ್ಳ ಸಾಗಣೆ ಸೇರಿ ಮಾನವ ಸಾಗಣೆ ವಿರುದ್ಧ ಹೋರಾಟಕ್ಕಿಳಿದ ನೊಬೆಲ್‌ ಪುರಸ್ಕೃತ ಕೈಲಾಶ್‌ಸತ್ಯಾರ್ಥಿ ತಮ್ಮ ಮಹತ್ವಾಕಾಂಕ್ಷೆಯ “ಭಾರತ ಯಾತ್ರೆ’ ಅಭಿಯಾನಕ್ಕೆ ಸೋಮವಾರ ಚಾಲನೆ ನೀಡಿದರು.

ಕನ್ಯಾಕುಮಾರಿಯಿಂದ ಕಾಶ್ಮೀರದ ತನಕ ಪ್ರವಾಸ ಬೆಳೆಸಿ ಜಾಗೃತಿ ಮೂಡಿಸುವ ಅವರ “ಭಾರತ ಯಾತ್ರೆ’ ಅಭಿಯಾನ ಅಕ್ಟೋಬರ್‌ 16ರಂದು ನವದೆಹಲಿಯಲ್ಲಿ ಕೊನೆಗೊಳ್ಳಲಿದೆ. ಒಟ್ಟು 35 ದಿನಗಳ ಕಾಲ ಈ ಯಾತ್ರೆ ನಡೆಯಲಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಕೈಲಾಶ್‌ ಸತ್ಯಾರ್ಥಿ, “”ಅತ್ಯಾಚಾರ, ಲೈಂಗಿಕ ದೌರ್ಜನ್ಯಗಳಂಥ ಕೃತ್ಯಗಳಿಂದ ಮಕ್ಕಳು ಮುಗ್ಧತೆ, ನಗು ಸೇರಿ ತಮ್ಮ ಹಕ್ಕುಗಳನ್ನೇ ಕಳೆದುಕೊಳ್ಳಬೇಕಾದ ಪರಿಸ್ಥಿತಿ ನಿರ್ಮಾಣ ವಾಗುತ್ತಿದೆ. ಅವರ ಸ್ವಾತಂತ್ರ್ಯವೇ ಹರಣವಾ ಗುತ್ತಿದೆ. ಇದನ್ನು ಸಹಿಸಿಕೊಳ್ಳಲು ನನ್ನಿಂದ ಸಾಧ್ಯ ವಿಲ್ಲ. ನಮ್ಮ ಮೌನವೇ ಇಂಥ ಕುಕೃತ್ಯ ಗಳಿಗೆ ಕಾರಣವಾಗುತ್ತಿದೆ. ಇದರ ವಿರುದ್ಧವೇ ನಮ್ಮ ಹೋರಾಟ. ಭಾರತ ಯಾತ್ರೆಯ ಉದ್ದೇಶವೇ ಇದು” ಎಂದು ಹೇಳಿದ್ದಾರೆ.

ಅಲ್ಲದೆ, “”ನವ ಭಾರತ ನಿರ್ಮಾಣವಾಗ ಬೇಕಾದರೆ ದೇಶದ ಮಕ್ಕಳು ಮೊದಲು ಸುರಕ್ಷತೆಯಿಂದ ಇರುವಂತೆ ನೋಡಿಕೊಳ್ಳ ಬೇಕು” ಎಂದಿದ್ದಾರೆ. ಯಾತ್ರೆಗೆ ಆರಂಭಕ್ಕೂ ಮುನ್ನ ಪ್ರಧಾನಿ ನರೇಂದ್ರ ಮೋದಿ ಅವರೂ ಬೆಂಬಲಿಸಿ ಬರೆದ ಪತ್ರವನ್ನು ಸತ್ಯಾರ್ಥಿ ಓದಿ ಹೇಳಿದರು. 2014ರಲ್ಲಿ ಮಕ್ಕಳ ಹಕ್ಕುಗಳ ಪರ ಹೋರಾಟ ನಡೆಸುತ್ತಿರುವ ಸತ್ಯಾರ್ಥಿ ಅವರು ವಿಶ್ವದ ಶ್ರೇಷ್ಠ ಪುರಸ್ಕಾರಗಳಲ್ಲಿ ಒಂದಾದ ನೊಬೆಲ್‌ ಪುರಸ್ಕಾರಕ್ಕೆ ಭಾಜನರಾಗಿದ್ದಾರೆ.