ಹುಟ್ಟುಹಬ್ಬದ ದಿನವೇ ಕಮಲ್‌ ಹೊಸ ಪಕ್ಷ?

Team Udayavani, Oct 5, 2017, 6:00 AM IST

ಚೆನ್ನೈ: ನಟ ಕಮಲ್‌ ಹಾಸನ್‌ ಅವರು ರಾಜಕೀಯ ಪ್ರವೇಶಿಸುತ್ತಾರೆ ಎನ್ನುವುದು ಹಳೆಯ ಸುದ್ದಿ. ಈಗ ಹುಟ್ಟಿರುವ ಹೊಸ ಸುದ್ದಿಯೇನೆಂದರೆ, ಅವರು ತಮ್ಮ ಹುಟ್ಟುಹಬ್ಬದ ದಿನವೇ ಹೊಸ ರಾಜಕೀಯ ಪಕ್ಷವನ್ನು ಘೋಷಣೆ ಮಾಡುತ್ತಾರಂತೆ!

ತಮಿಳುನಾಡು ರಾಜಕಾರಣ ದಿನಕ್ಕೊಂದು ತಿರುವು ಪಡೆಯುತ್ತಿರುವ ಸನ್ನಿವೇಶದಲ್ಲೇ ಕಮಲ್‌ ನಡೆ ತೀವ್ರ ಕುತೂಹಲ ಮೂಡಿಸಿದೆ. ಅವರ ಪೊಲಿಟಿಕಲ್‌ ಎಂಟ್ರಿಗೆ ಇಂಬು ನೀಡುವಂತೆ ಬುಧವಾರ ಕಮಲ್‌ ಅವರು ಚೆನ್ನೈನಲ್ಲಿ ತಮ್ಮ ಅಭಿಮಾನಿಗಳೊಂದಿಗೆ ಸಭೆ ನಡೆಸಿ, ಮುಂದಿನ ನಡೆ ಕುರಿತು ಕಾರ್ಯತಂತ್ರ ರೂಪಿಸಿದ್ದಾರೆ ಎಂದು ಹೇಳಲಾಗಿದೆ. ನ.7ರಂದು ಕಮಲ್‌ರ ಜನ್ಮದಿನವಾಗಿದ್ದು, ಅಂದೇ ಅವರು ಹೊಸ ಪಕ್ಷದ ಘೋಷಣೆ ಮಾಡಲಿದ್ದಾರೆ ಎಂಬ ಮಾತುಗಳೂ ಕೇಳಿಬರತೊಡಗಿವೆ.

ಆದರೆ, ಈ ಕುರಿತ ಅಧಿಕೃತ ಮಾಹಿತಿಯನ್ನು ಯಾರೂ ಬಿಚ್ಚಿಟ್ಟಿಲ್ಲ. ಸಭೆಯ ಬಳಿಕ ಮಾತನಾಡಿರುವ ಕಮಲ್‌ ಹಾಸನ್‌ ವೆಲ್ಫೆàರ್‌ ಕ್ಲಬ್‌ನ ಹಿರಿಯ ಸದಸ್ಯ ತಂಗವೇಲು, “ನ.7 ರಂದು ಅಂದರೆ ಕಮಲ್‌ ಹುಟ್ಟಹಬ್ಬದಂದು, ಹೇಗೆ ಮತ್ತು ಯಾವ ರೀತಿಯ ಕಲ್ಯಾಣ ಚಟುವಟಿಕೆ ಹಮ್ಮಿಕೊಳ್ಳಬೇಕು ಎಂಬುದಷ್ಟಕ್ಕೇ ಸೀಮಿತವಾಗಿ ಮಾತುಕತೆ ನಡೆದಿದೆ. ಹೆಚ್ಚು ಹೆಚ್ಚು ಜನರ ಕ್ಷೇಮಾಭಿವೃದ್ಧಿ ಚಟುವಟಿಕೆಗಳನ್ನು ನಡೆಸುವಂತೆ ಅವರು ಸಲಹೆ ನೀಡಿದ್ದಾರೆ’ ಎಂದು ಹೇಳಿದ್ದಾರೆ.