ಮಾಸಾಂತ್ಯಕ್ಕೆ ಕಮಲ್‌ ಹೊಸ ಪಕ್ಷ ಶುರು?

Team Udayavani, Sep 14, 2017, 8:40 AM IST

ಚೆನ್ನೈ: ತಮಿಳುನಾಡಿನಲ್ಲಿ ಹಾಲಿ ಉಂಟಾಗಿರುವ ರಾಜಕೀಯ ಅಸ್ಥಿರತೆ ಮತ್ತು ತಮಿಳುಸೂಪರ್‌ ಸ್ಟಾರ್‌ ರಜನಿಕಾಂತ್‌ ರಾಜಕೀಯ ಪ್ರವೇಶದ ಬಗ್ಗೆ ವದಂತಿ ಇರುವಾಗಲೇ ಮತ್ತೂಬ್ಬ ಪ್ರಭಾವಿ ನಟ ಕಮಲ್‌ಹಾಸನ್‌ ಹೊಸ ಪಕ್ಷ ಶುರು ಮಾಡುವ ಸುಳಿವು ನೀಡಿದ್ದಾರೆ. ಮಾಸಾಂತ್ಯಕ್ಕೆ ಅದು ಘೋಷಣೆಯಾಗುವ ಸಾಧ್ಯತೆ ಇದೆ ಎಂದು ಆಪ್ತರು ಹೇಳಿದ್ದಾರೆ. ನವೆಂಬರ್‌ನಲ್ಲಿ ನಡೆಯಲಿರುವ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಮೂಲಕ ಹೊಸ ಪಕ್ಷದ ಅದೃಷ್ಟ ಪರೀಕ್ಷೆ ನಡೆಸಲು ಮುಂದಾಗಿದ್ದಾರೆ ಕಮಲ್‌. 

ಜತೆಗೆ ಅಲ್ಲಿನ ಪಕ್ಷಗಳು ನವೆಂಬರ್‌ ಚುನಾವಣೆಗಾಗಿ ಮೈತ್ರಿ ಕೂಟ ರಚನೆಯ ಘೋಷಣೆ ಮಾಡುವ ಮುನ್ನವೇ ಹೊಸ ಪಕ್ಷ ಉದಯವಾಗಬೇಕೆನ್ನುವುದು ಅವರ ಮಹತ್ವಾಕಾಂಕ್ಷೆ ಎನ್ನಲಾಗಿದೆ. ಅದಕ್ಕಾಗಿ ಎಲ್ಲ ರೀತಿಯ ಸಿದ್ಧತೆಗಳು ನಡೆದಿವೆ. ಹಾಲಿ ದಸರೆ ಅಥವಾ ಗಾಂಧಿ ಜಯಂತಿಯಂದು ಹೊಸ ಪಕ್ಷ ಘೋಷಣೆ ಸಾಧ್ಯತೆ ಇದೆ. ಸೆ.15ರಂದು ಚೆನ್ನೈನಲ್ಲಿ ಮತ್ತು ಸೆ.16ರಂದು ಕಲ್ಲಿಕೋಟೆಯಲ್ಲಿ ದೊಡ್ಡ ಕಾರ್ಯಕ್ರಮಗಳನ್ನೂ ಆಯೋಜಿಸಿದ್ದಾರೆ ಕಮಲ್‌ ಹಾಸನ್‌. ಕೆಲ ದಿನಗಳ ಹಿಂದಷ್ಟೇ ಅವರು ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್‌ರನ್ನು ತಿರುವನಂತಪುರದಲ್ಲಿ ಭೇಟಿ ಮಾಡಿ ಮಾತುಕತೆ ನಡೆಸಿದ್ದರು. ಈ ಸಂದರ್ಭದಲ್ಲಿ ಎಡಪಕ್ಷಗಳ ನಿಲುವು ತಮಗೆ ಒಪ್ಪಿಗೆ ಎಂದು ಹೇಳಿದ್ದರು. ಹೀಗಾಗಿ ಅವರು ಸಿಪಿಎಂ ಸೇರಲಿದ್ದಾರೆ ಎಂದು ಹೇಳಲಾಗಿತ್ತು.