Rajasthan CM ಗೆಹ್ಲೋಟ್ ರನ್ನು ಭೇಟಿಯಾಗಿ ಮಾತುಕತೆ ನಡೆಸಿದ ಡಿ.ಕೆ. ಶಿವಕುಮಾರ್

Team Udayavani, Sep 14, 2023, 6:21 PM IST

ಜೈಪುರ: ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಗುರುವಾರ ರಾಜಸ್ಥಾನ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಿದರು.ಕಾಂಗ್ರೆಸ್ ಶಾಸಕ ಎನ್.ಎ. ಹ್ಯಾರಿಸ್ ಅವರು ಶಿವಕುಮಾರ್ ಅವರೊಂದಿಗೆ ಇದ್ದರು.

ಶಿವಕುಮಾರ್ ಅವರು ಮಾತನಾಡಿ, ಹಣದುಬ್ಬರ ಪರಿಹಾರ ಶಿಬಿರಗಳು, 500 ರೂ.ಗೆ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್‌ಗಳನ್ನು ಒದಗಿಸುವುದು, ಮುಖ್ಯಮಂತ್ರಿ ಚಿರಂಜೀವಿ ಆರೋಗ್ಯ ವಿಮಾ ಯೋಜನೆ, ಆರೋಗ್ಯ ಹಕ್ಕು, ಗಿಗ್ ವರ್ಕರ್ಸ್ ಕಾಯ್ದೆ ಮತ್ತು ಅನ್ನಪೂರ್ಣ ಆಹಾರ ಪ್ಯಾಕೆಟ್ ಯೋಜನೆಗಳಂತಹ ವಿವಿಧ ಉಪಕ್ರಮಗಳು ಇಡೀ ದೇಶದಲ್ಲಿ ಚರ್ಚೆಯಾಗುತ್ತಿವೆ. ಅವರು ಹೊಸದಾಗಿ ನಿರ್ಮಿಸಲಾದ ಚಂಬಲ್ ರಿವರ್‌ಫ್ರಂಟ್ ಮತ್ತು ಕೋಟಾದಲ್ಲಿ ಆಕ್ಸಿಜನ್ ಸಿಟಿ ಪಾರ್ಕ್ ಅನ್ನು ಶ್ಲಾಘಿಸಿದರು ಎಂದು ಹೇಳಿಕೆಯಲ್ಲಿ ಸೇರಿಸಲಾಗಿದೆ.

ರಾಜಸ್ಥಾನದ ಶಿಕ್ಷಣ ಸಚಿವ ಬಿ.ಡಿ. ಕಲ್ಲಾ, ಗಣಿ ಮತ್ತು ಪೆಟ್ರೋಲಿಯಂ ಸಚಿವ ಪ್ರಮೋದ್ ಜೈನ್ ಭಾಯಾ ಮತ್ತು ಆಹಾರ ಮತ್ತು ನಾಗರಿಕ ಸರಬರಾಜು ಸಚಿವ ಪ್ರತಾಪ್ ಸಿಂಗ್ ಖಚರಿಯಾವಾಸ್ ಅವರು ಸಭೆಯಲ್ಲಿ ಉಪಸ್ಥಿತರಿದ್ದರು.

”ಅಶೋಕ್ ಗೆಹ್ಲೋಟ್ ಮತ್ತು ಅವರ ಕ್ಯಾಬಿನೆಟ್‌ನ ಮಂತ್ರಿಗಳನ್ನು ಭೇಟಿ ಮಾಡಿದುದು ಸಂತೋಷ ನೀಡಿತು. ಗೆಹ್ಲೋಟ್ ಅವರ ನಿವಾಸದಲ್ಲಿ ಆತಿಥ್ಯದ ನಡುವೆ ಭೋಜನ ಸವಿದೆ. ನಾವು ಆಡಳಿತದ ವಿವಿಧ ಅಂಶಗಳನ್ನು ಚರ್ಚಿಸಿದ್ದೇವೆ ಮತ್ತು ರಾಜಸ್ಥಾನದ ಜನರ ಹಿತಾಸಕ್ತಿಯಲ್ಲಿ ಅವರ ಸರ್ಕಾರ ಮಾಡುತ್ತಿರುವ ಮಹತ್ತರವಾದ ಕೆಲಸಕ್ಕಾಗಿ ನಾನು ಗೆಹ್ಲೋಟ್ ಅವರನ್ನು ಶ್ಲಾಘಿಸಿದೆ” ಎಂದರು ಎಕ್ಸ್ ನಲ್ಲಿ ಡಿ.ಕೆ.ಶಿವಕುಮಾರ್ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ಡಿ.ಕೆ.ಶಿವಕುಮಾರ್ ಆರ್‌ಐಸಿ ಜೈಪುರದಲ್ಲಿ ಗುರುವಾರ ಆರಂಭವಾದ ಅಣೆಕಟ್ಟು ಸುರಕ್ಷತೆ 2023 ರ ಅಂತಾರಾಷ್ಟ್ರೀಯ ಸಮ್ಮೇಳನದಲ್ಲಿ ಭಾಗವಹಿಸಿದರು. ಉಪರಾಷ್ಟ್ರಪತಿ ಜಗದೀಪ್ ಧನಕರ್, ಕೇಂದ್ರ ಜಲಶಕ್ತಿ ಸಚಿವ ವೇದಿಕೆಯಲ್ಲಿದ್ದರು. ನಮ್ಮ ದೇಶದಲ್ಲಿ ನಿರಂತರವಾಗಿ ಹೆಚ್ಚುತ್ತಿರುವ ನೀರಿನ ಬೇಡಿಕೆಯನ್ನು ಪೂರೈಸಲು ಅಣೆಕಟ್ಟು ಸುರಕ್ಷತೆಯು ಪ್ರಧಾನ ಪ್ರಾಮುಖ್ಯತೆಯನ್ನು ಹೊಂದಿದೆ ಮತ್ತು ಅವುಗಳ ಕಾರ್ಯಾಚರಣೆಯ ಕಾರ್ಯಕ್ಷಮತೆಯನ್ನು ಹೆಚ್ಚಿಸಲು ಕಾಂಕ್ರೀಟ್ ಕ್ರಮಗಳು ಅಗತ್ಯವಾಗಿವೆ” ಎಂದು ಡಿ.ಕೆ.ಶಿವಕುಮಾರ್ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ.