Kashmir;ಮೊದಲ ಬಾರಿಗೆ ಪಿಎಂ ಮೋದಿ ಯೋಗ ದಿನ!

Team Udayavani, Jun 21, 2024, 6:00 AM IST

ಶ್ರೀನಗರ: 2014ರಿಂದ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಚರಿಸಲಾಗುತ್ತಿರುವ ಯೋಗ ದಿನವನ್ನು ಪ್ರಧಾನಿ ಮೋದಿ ಈ ಬಾರಿ ಜಮ್ಮು- ಕಾಶ್ಮೀರದಲ್ಲಿ ಆಚರಿಸುತ್ತಿ ದ್ದಾರೆ. ಶುಕ್ರವಾರ ಶ್ರೀನಗರದ ದಾಲ್‌ ಸರೋವರದ ದಂಡೆಯಲ್ಲಿ 10ನೇ ಅಂತಾರಾಷ್ಟ್ರೀಯ ಯೋಗ ದಿನವನ್ನು ಪ್ರಧಾನಿ ಮುನ್ನಡೆಸಲಿದ್ದು, 7000ಕ್ಕೂ ಅಧಿಕ ಮಂದಿ ಕಾರ್ಯಕ್ರಮದಲ್ಲಿ ಭಾಗಿಯಾಗಲಿದ್ದಾರೆ.

ದಾಲ್‌ ಸರೋವರದ ದಂಡೆಯಲ್ಲಿರುವ ಶೇರ್‌-ಎ- ಕಾಶ್ಮೀರ್‌ ಅಂತಾರಾಷ್ಟ್ರೀಯ ಸಭಾಂಗಣ(ಎಸ್‌ಕೆಐಸಿಸಿ) ದಲ್ಲಿ ಬೆಳಗ್ಗೆ 6.30ಕ್ಕೆ ಕಾರ್ಯಕ್ರಮ ಆರಂಭವಾಗಲಿದೆ. ಬಳಿಕ ಜನರನ್ನುದ್ದೇಶಿಸಿ ಮೋದಿ ಮಾತನಾಡಲಿದ್ದಾರೆ. ಕಾರ್ಯ ಕ್ರಮದಲ್ಲಿ ಭಾಗಿಯಾಗುವವರಿಗೆ 3 ದಿನಗಳ ಮುಂಚೆಯೇ ಯೋಗ ಭಂಗಿಗಳ ಬಗ್ಗೆ ತರಬೇತಿ ನೀಡಲಾಗಿದೆೆ. ಪ್ರಧಾನಿ ಭೇಟಿ ಹಿನ್ನೆಲೆ ರಾಜ್ಯಾದ್ಯಂತ ಬಿಗಿ ಬಂದೋಬಸ್ತ್ ಮಾಡಲಾಗಿದೆ. ದಶಕದಿಂದ ಪ್ರತೀವರ್ಷ ಜೂ.21ರಂದು ದೇಶದ ವಿವಿಧೆಡೆ ಯೋಗ ದಿನದ ಕಾರ್ಯಕ್ರಮ ಆಯೋಜಿಸಲಾಗುತ್ತದೆ.

“ಯೋಗ- ಸ್ವ ಹಿತ, ಸಮಾಜದ ಹಿತಕ್ಕಾಗಿ’ ಈ ಬಾರಿಯ ಧ್ಯೇಯ
“ಯೋಗ- ಸ್ವ ಹಿತ, ಸಮಾಜದ ಹಿತಕ್ಕಾಗಿ’ ಎಂಬ ಪರಿಕಲ್ಪನೆ ವ್ಯಾಪ್ತಿಯಲ್ಲಿ ಈ ಬಾರಿಯ ಯೋಗ ದಿನವನ್ನು ಆಚರಿಸಲಾಗುತ್ತಿದೆ. ವೈಯಕ್ತಿಕವಾಗಿ ಮಾತ್ರವಲ್ಲದೇ ಸಾಮಾಜಿಕ ಯೋಗಕ್ಷೇಮವನ್ನೂ ಉತ್ತೇಜಿಸುವಲ್ಲಿ ಯೋಗದ ಪಾತ್ರವನ್ನು ಈ ಥೀಮ್‌ ಸಾರುತ್ತಿದೆ ಎಂದು ಕೇಂದ್ರ ಆಯುಷ್‌ ಖಾತೆ ರಾಜ್ಯ ಸಚಿವ ಪ್ರತಾಪ್‌ ರಾವ್‌ ಜಾಧವ್‌ ಹೇಳಿದ್ದಾರೆ.