ಕೇಜ್ರಿವಾಲ್‌ಗೆ ಚುನಾವಣಾ ಆಯೋಗ ಛೀಮಾರಿ

Team Udayavani, Jan 22, 2017, 9:36 AM IST

ಹೊಸದಿಲ್ಲಿ: ಇತ್ತೀಚೆಗೆ ಗೋವಾ ವಿಧಾನಸಭೆ ಚುನಾವಣೆಯ ಪ್ರಚಾರ ಸಭೆಯಲ್ಲಿ ದಿಲ್ಲಿ ಮುಖ್ಯಮಂತ್ರಿ ಅರವಿಂದ್‌ ಕೇಜ್ರಿವಾಲ್‌ ಮತದಾರರಿಗೆ ಲಂಚದ ಆಮಿಷ ವೊಡ್ಡಿದ್ದಾರೆಂದು ಚುನಾವಣಾ ಆಯೋಗ ಛೀಮಾರಿ ಹಾಕಿದೆ. ಒಂದುವೇಳೆ ನೀವು ಇದನ್ನೇ ಮುಂದುವರಿಸಿದರೆ ನಿಮ್ಮ ಪಕ್ಷಕ್ಕೆ ನಿಷೇಧ ಹೇರುವುದು ಅಥವಾ ಮಾನ್ಯತೆಯನ್ನೇ ರದ್ದು ಮಾಡುವ ಗಂಭೀರ ಕ್ರಮವನ್ನು ತೆಗೆದುಕೊಳ್ಳಬೇಕಾ ಗುತ್ತದೆಂದು ಎಚ್ಚರಿಸಿದೆ.

ಆದರೆ ಇದನ್ನು ಕೇಜ್ರಿವಾಲ್‌ ತಿರಸ್ಕರಿಸಿದ್ದಾರೆ. ಚುನಾವಣಾ ಆಯೋಗ ನನ್ನ ಹೇಳಿಕೆಯನ್ನು ತಪ್ಪಾಗಿ ಅರ್ಥೈಸಿಕೊಂಡಿದೆ. ಇದನ್ನು ನ್ಯಾಯಾಲಯದಲ್ಲಿ ಪ್ರಶ್ನಿಸುವುದಾಗಿ ತಿಳಿಸಿದ್ದಾರೆ. ಗೋವಾದಲ್ಲಿ ಚುನಾವಣಾ ಪ್ರಚಾರ ಸಭೆಯಲ್ಲಿ ಭಾಗವಹಿಸಿದ್ದ ಕೇಜ್ರಿವಾಲ್‌, ಕಾಂಗ್ರೆಸ್‌ ಮತ್ತು ಬಿಜೆಪಿ ಮಂದಿ ನಿಮಗೆ ಲಂಚ ನೀಡಲು ಬರುತ್ತಾರೆ. ಆಗ ನೀವು ಹೊಸ ಕರೆನ್ಸಿಯಲ್ಲಿ ಹಣ ತೆಗೆದುಕೊಳ್ಳಿ. ಹಣದುಬ್ಬರವಿರುವುದರಿಂದ 5000 ರೂ. ಬದಲು 10,000 ರೂ. ತೆಗೆದುಕೊಳ್ಳಿ. ಮತವನ್ನು ಆಮ್‌ ಆದ್ಮಿ ಪಕ್ಷಕ್ಕೆ ಹಾಕಿ ಎಂದು ಹೇಳಿದ್ದರು.

ಪೊಲೀಸ್‌ ಭದ್ರತೆ ಬೇಡ, ಕೇಜ್ರಿವಾಲ್‌ ಪತ್ರ
ಚಂಡೀಗಢ: ಪಂಜಾಬ್‌ ವಿಧಾನಸಭಾ ಚುನಾವಣಾ ಪ್ರಚಾರದಲ್ಲಿ ನಿರತವಾಗಿರುವ ಆಪ್‌ ರಾಷ್ಟ್ರೀಯ ಸಂಚಾಲಕರೂ ಆಗಿರುವ ದಿಲ್ಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್‌ ತಮಗೆ ನೀಡಿರುವ ಪೊಲೀಸ್‌ ಭದ್ರತೆಯನ್ನು ವಾಪಸ್‌ ತೆಗೆದುಕೊಳ್ಳುವಂತೆ ಚುನಾವಣಾ ಆಯೋಗವನ್ನು ಆಗ್ರಹಪಡಿಸಿದ್ದಾರೆ.

ರಾಜ್ಯದ ಅನೇಕ ಕಡೆ ಪ್ರವಾಸ ಮಾಡುವ ಸಮಯದಲ್ಲಿ ಹೆಚ್ಚಿನ ಪೊಲೀಸ್‌ ಭದ್ರತೆಯನ್ನು ಗಮನಿಸಿದ್ದೇನೆ. ಇದರ ಆವಶ್ಯಕತೆಯಿಲ್ಲ ಎಂಬುದು ನನಗೆ ಮನವರಿಕೆಯಾದ ಹಿನ್ನೆಲೆಯಲ್ಲಿ ಕೂಡಲೆ ಭದ್ರತೆಯನ್ನು ವಾಪಸ್‌ ಪಡೆಯ ಬೇಕೆಂದು ಅವರು ರಾಜ್ಯದ ಮುಖ್ಯ ಚುನಾವಣಾಧಿ ಕಾರಿಯವರಿಗೆ ಬರೆದಿರುವ ಪತ್ರದಲ್ಲಿ ತಿಳಿಸಿದ್ದಾರೆ. 

ನನಗೆ ಕೊಟ್ಟಿರುವ ಭದ್ರತೆಯನ್ನು ರಾಜ್ಯದ ಜನರಿಗೆ ನೀಡಿ ಕಾನೂನು ಸುವ್ಯವಸ್ಥೆ ರಾಜ್ಯದಲ್ಲಿ ಉತ್ತಮವಾಗಿದೆ ಎಂಬ ಭಾವನೆ ಮೂಡಿಸಿ ಎಂದು ಅವರು ಸಲಹೆ ಮಾಡಿದ್ದಾರೆ. ಆಪ್‌ ಪಕ್ಷದ ಅಭ್ಯರ್ಥಿಗಳು ಯಾವುದೆ ಭದ್ರತೆಬೇಡ ಎಂದು ಸ್ಪಷ್ಟಪಡಿಸಿರುವ ವಿಚಾರವನ್ನು ಅವರು ಮತ್ತೂಮ್ಮೆ ಪತ್ರದಲ್ಲಿ ಪ್ರಸ್ತಾಪ ಮಾಡಿದ್ದಾರೆ.