ಅಮೆರಿಕ ದಾಳಿ: ಐಸಿಸ್‌ ಸೇರಿದ್ದ ಕೇರಳ ವ್ಯಕ್ತಿ ಸಾವು

Team Udayavani, Aug 1, 2019, 5:38 AM IST

ಮಲಪ್ಪುರಂ: 2017ರಲ್ಲಿ ಐಎಸ್‌ ಉಗ್ರ ಸಂಘಟನೆ ಸೇರುವುದಕ್ಕೆಂದು ಅಫ್ಘಾನಿಸ್ತಾನಕ್ಕೆ ತೆರಳಿದ್ದ 21 ಜನರ ಪೈಕಿ ಮೊಹಮ್ಮದ್‌ ಮುಹಾಸಿಮ್‌, ಅಮೆರಿಕ ನಡೆಸಿದ ಡ್ರೋನ್‌ ದಾಳಿಯಿಂದ ಸಾವನ್ನಪ್ಪಿದ್ದಾನೆ ಎಂದು ಶಂಕಿಸಲಾಗಿದೆ. ಮೊಹಮದ್‌ ಕುಟುಂಬ ಸದಸ್ಯರಿಗೆ ಈ ಸಂಬಂಧ ವಾಟ್ಸ್‌ ಆ್ಯಪ್‌ನಲ್ಲಿ ಸಂದೇಶ ತಲುಪಿದ್ದು, 10 ದಿನಗಳ ಹಿಂದೆಯೇ ಮುಹಾಸಿನ್‌ ಮೃತಪಟ್ಟಿದ್ದಾನೆ ಎಂದು ಹೇಳಲಾಗಿದೆ.

ಈ ಸಂಬಂಧ ಪೊಲೀಸರು ತನಿಖೆ ನಡೆಸಿದ್ದು, ಮೇಲ್ನೋಟಕ್ಕೆ ಈ ಸಂದೇಶದಲ್ಲಿ ಸತ್ಯವಿದೆ ಎಂದು ಮೂಲಗಳು ತಿಳಿಸಿವೆ. ತ್ರಿಶ್ಶೂರ್‌ನಲ್ಲಿ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಅಂತಿಮ ವರ್ಷದಲ್ಲಿ ವ್ಯಾಸಂಗ ಮಾಡುತ್ತಿದ್ದ ಮೊಹಮ್ಮದ್‌, ತಾನು ಬೆಂಗಳೂರಿಗೆ ಹೋಗುತ್ತಿದ್ದೇನೆ ಎಂದು ಹೇಳಿಹೊರಟಿದ್ದ. ಈತ ಕಾಣದಾದಾಗ ಕುಟುಂಬದವರು ಪೊಲೀಸರಿಗೆ ದೂರು ನೀಡಿದ್ದರು. ಹತ್ಯೆಗೊಂಡ ಸುದ್ದಿ ತಿಳಿಯುತ್ತಿದ್ದಂತೆ ಪೊಲೀಸರು ಮತ್ತೂಂದು ಸುತ್ತಿನ ತನಿಖೆ ನಡೆಸಲು ನಿರ್ಧರಿಸಿದ್ದಾರೆ. ಈ ಹಿಂದೆ ಇದೇ ರೀತಿ ಕಾಸರಗೋಡಿನ ಮುರ್ಷಿದ್‌ ಮುಹಮ್ಮದ್‌ ಎಂಬಾತನನ್ನೂ ಅಮೆರಿಕ ನಡೆಸಿದ ದಾಳಿ ವೇಳೆ ಹತ್ಯೆಗೈಯಲಾಗಿತ್ತು.