ನನಗೆ ಮಸಾಜ್‌ ಮಾಡಲು ಹೇಳಿದರು

Team Udayavani, Oct 15, 2018, 10:46 AM IST

ಮುಂಬಯಿ: ಬಾಲಿವುಡ್‌ನ‌ ಶೋಮ್ಯಾನ್‌ ಎಂದೇ ಖ್ಯಾತರಾಗಿದ್ದ ಹಿರಿಯ ನಿರ್ದೇಶಕ ಸುಭಾಷ್‌ ಘಾಯ್‌ ವಿರುದ್ಧ ನಟಿ ಮತ್ತುರೂಪದರ್ಶಿ ಕೇಟ್‌ ಶರ್ಮಾ ಮುಂಬಯಿಯ ವಸೋವಾ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಅದರಲ್ಲಿ ಘಾಯ್‌ ತಮ್ಮೊಂದಿಗೆ ಅಸಭ್ಯವಾಗಿ ವರ್ತಿಸಿದ್ದಾರೆಂದು ಹೇಳಿದ್ದಾರೆ. ಆ. 6ರಂದು ತಮ್ಮ ಮನೆಗೆ ಚಿತ್ರ ವೊಂದರ ಸಿದ್ಧತೆಯ ಚರ್ಚೆಗಾಗಿ ಆಹ್ವಾನಿಸಿದ್ದ ಘಾಯ್‌, 6 ಮಂದಿ ಇತರರು ಇರುವಂತೆಯೇ ತಮಗೆ ಮಸಾಜ್‌ ಮಾಡುವಂತೆ ಕೋರಿದರು.
2-3 ನಿಮಿಷಗಳ ಮಸಾಜ್‌ ಅನಂತರ ನನ್ನನ್ನು ತಬ್ಬಿಕೊಳ್ಳಲು, ಮುತ್ತಿಕ್ಕಲು ಯತ್ನಿಸಿದರು. ಆಗ ನಾನು ಪ್ರತಿಭಟಿಸಿದಾಗ ಈ ವಿಚಾರ ಹೊರಗೆ ತಿಳಿಸಿದರೆ ಸಿನಿಮಾ ಅವಕಾಶ ಕೈತಪ್ಪಲಿದೆ ಎಂದು ಎಚ್ಚರಿಸಿದ್ದರು ಎಂದು ದೂರಿನಲ್ಲಿ ಉಲ್ಲೇಖೀಸಿದ್ದಾರೆ. 

ನಿರಾಕರಣೆ: ದೂರು ದಾಖಲಾದ ಬೆನ್ನಲ್ಲೇ ಟ್ವೀಟ್‌ ಮಾಡಿರುವ ಘಾಯ್‌, ನಾನು “ಮಿ ಟೂ’ ಅಭಿಯಾನ ಹಾಗೂ ಮಹಿಳಾ ಸಬಲೀಕರಣ ಬೆಂಬಲಿಸುತ್ತೇನೆ. ಆದರೆ, “ಮಿ ಟೂ’ ಅಭಿಯಾನ ದುರ್ಬಳಕೆಯಾಗುತ್ತಿದೆ. ಕೆಲವರು ನನ್ನ ಖ್ಯಾತಿಗೆ ಕಳಂಕ ತರಲು ಯತ್ನಿಸುತ್ತಿದ್ದಾರೆಂದು ದೂರಿದ್ದಾರೆ. 

ದುಡಿಯೆವು: ನಟ, ನಿರ್ದೇಶಕ, ನಿರ್ಮಾಪಕರ ಆರೋಪಗಳ ಮೇಲಿರುವ ಕಿರುಕುಳ ಆರೋಪಗಳು ಸಾಬೀತಾದಲ್ಲಿ ಅಂಥವರ ಜತೆಗೆ ಮುಂದೆಂದೂ ಕೆಲಸ ಮಾಡುವುದಿಲ್ಲ ಎಂದು ಬಾಲಿವುಡ್‌ನ‌ ನಟಿ, ನಿರ್ದೇಶಕಿಯರಾದ ಕೊಂಕಣಾ ಸೇನ್‌ಶರ್ಮ, ನಂದಿತಾ ದಾಸ್‌, ಮೇಘನಾ ಗುಲ್ಜಾರ್‌, ಗೌರಿ ಶಿಂಧೆ, ಕಿರಣ್‌ ರಾವ್‌, ರೀಮಾ ಕಾಗಿ ಹಾಗೂ ಝೋಯಾ ಅಕ್ತರ್‌ ಶಪಥ ಮಾಡಿದ್ದಾರೆ.

ಸಂಗೀತಗಾರರ ಆಗ್ರಹ 
ಶಾಸ್ತ್ರೀಯ ಸಂಗೀತ ಲೋಕದಲ್ಲೂ ಮಹಿಳೆಯರ ಮೇಲೆ ಶೋಷಣೆಗಳು ನಡೆಯುತ್ತಿರುವುದರ ವಿರುದ್ಧ ಇಡೀ ಸಮಾಜವೇ ಸಿಡಿದೇಳಬೇಕು ಹಾಗೂ ಸಂಬಂಧಪಟ್ಟ ತನಿಖಾ ಸಂಸ್ಥೆಗಳು ಇಂಥ ದೂರುಗಳ ಬಗ್ಗೆ ತನಿಖೆ ನಡೆಸಬೇಕು ಎಂದು ತಮಿಳುನಾಡಿನ 200ಕ್ಕೂ ಹೆಚ್ಚು ಕರ್ನಾಟಕ ಶಾಸ್ತ್ರೀಯ ಸಂಗೀತಗಾರರು ಆಗ್ರಹಿಸಿದ್ದಾರೆ. ಇತ್ತೀಚೆಗೆ, ತಮ್ಮೊಂದಿಗೆ ಶಾಸ್ತ್ರೀಯ ಲೋಕದ ಕೆಲವರು ಅಸಭ್ಯವಾಗಿ ವರ್ತಿಸಿದ್ದಾಗಿ ಗಾಯಕಿ ಚಿನ್ಮಯಿ ಶ್ರೀಪಾದ ಎಂಬವರು ಟ್ವಿಟರ್‌ನಲ್ಲಿ ಆರೋಪಿಸಿದ್ದರು. ಇದಕ್ಕೆ ಪ್ರತಿಯಾಗಿ ಸಂಗೀತಗಾರರಿಂದ ಈ ಆಗ್ರಹ ಬಂದಿದೆ.