ಇಂದಿನಿಂದ ಖೇಲೋ ಇಂಡಿಯಾ ಯೂತ್‌ ಗೇಮ್ಸ್‌

Team Udayavani, Jan 10, 2020, 6:50 AM IST

ಗುವಾಹಾಟಿ: ದೇಶದ ಯುವ ಕ್ರೀಡಾಪಟುಗಳ ಪ್ರತಿಭೆಯನ್ನು ಹೊರಹೊಮ್ಮಿಸುವ “ಖೇಲೋ ಇಂಡಿಯಾ’ದ 3ನೇ ಆವೃತ್ತಿ ಶುಕ್ರವಾರ ಗುವಾಹಾಟಿಯಲ್ಲಿ ಮೊದಲ್ಗೊಳ್ಳಲಿದೆ. ದೇಶದ 37 ರಾಜ್ಯಗಳ 6,800 ಕ್ರೀಡಾಪಟುಗಳು ಒಟ್ಟು 20 ಕ್ರೀಡೆಗಳಲ್ಲಿ ತಮ್ಮ ಸಾಮರ್ಥ್ಯವನ್ನು ಪಣಕ್ಕೊಡ್ಡಲಿದ್ದಾರೆ. ಇದರಲ್ಲಿ ಕರ್ನಾಟಕದ 288 ಸ್ಪರ್ಧಿಗಳಿದ್ದಾರೆ.

ಇಲ್ಲಿನ “ಇಂದಿರಾ ಗಾಂಧಿ ಸ್ಟೇಡಿಯಂ’ನಲ್ಲಿ ಜರಗಲಿರುವ ಉದ್ಘಾಟನಾ ಸಮಾರಂಭದಲ್ಲಿ ಕೇಂದ್ರ ಕ್ರೀಡಾ ಸಚಿವ ಕಿರಣ್‌ ರಿಜಿಜು, ಅಸ್ಸಾಮ್‌ ಮುಖ್ಯಮಂತ್ರಿ ಸರ್ಬಾನಂದ ಸೋನೊವಾಲ್‌ ಮುಖ್ಯ ಅತಿಥಿಗಳಾಗಿರುತ್ತಾರೆ.

ಹಿಮಾ ದಾಸ್‌ ಸಹಿತ ದೇಶದ ತಾರಾ ಆ್ಯತ್ಲೀಟ್ಸ್‌ ಈ ಭವ್ಯ ಸಮಾರಂಭಕ್ಕೆ ಸಾಕ್ಷಿಯಾಗಲಿದ್ದಾರೆ. ಆಧುನಿಕ ತಂತ್ರಜ್ಞಾನದ ಲೇಸರ್‌ ಶೋ ಜತೆಗೆ ಅಸ್ಸಾಂನ ಸಾಂಪ್ರದಾಯಿಕ ಕಲೆಗಳು ಈ ಸಂದರ್ಭದಲ್ಲಿ ಅನಾವರಣಗೊಳ್ಳಲಿವೆ.
“ಇದು ದೇಶದ ಕ್ರೀಡಾಕ್ರಾಂತಿಗೆ ಸಾಕ್ಷಿಯಾಗಬಲ್ಲ ಕೂಟ. ಇದು ಅಸ್ಸಾಮ್‌ನಲ್ಲಿ ನಡೆಯುತ್ತಿರುವುದು ಹೆಮ್ಮೆಯ ಸಂಗತಿ. ಕ್ರೀಡಾಕೂಟ ಯಶಸ್ವಿಯಾಗಲಿ, ಎಲ್ಲ ಕ್ರೀಡಾ ಪಟುಗಳಿಗೆ ಶುಭ ಹಾರೈಕೆಗಳು’ ಎಂದು ಸೋನೊವಾಲ್‌ ಈ ಸಂದರ್ಭದಲ್ಲಿ ಹೇಳಿದರು.

ಕ್ರೀಡಾಳುಗಳ ಪ್ರಯಾಣಕ್ಕೆಂದೇ ವಿಮಾನ ವ್ಯವಸ್ಥೆ ಮಾಡಿರುವುದು ಈ ಬಾರಿಯ ವಿಶೇಷ. ಕೋಲ್ಕತಾ ಮತ್ತು ಹೊಸದಿಲ್ಲಿಯಿಂದ ಈ ವಿಮಾನ ಗುವಾಹಾಟಿಗೆ ಹಾರಾಟ ನಡೆಸಲಿದೆ.

ಕರ್ನಾಟಕದ 288 ಸ್ಪರ್ಧಿಗಳು
ಈ ಕೂಟದಲ್ಲಿ ಕರ್ನಾಟಕದ 288 ಕ್ರೀಡಾಳುಗಳು ಪಾಲ್ಗೊಳ್ಳಲಿದ್ದಾರೆ. ಈಜು ಸ್ಪರ್ಧೆಯೊಂದರಲ್ಲೇ ನೂರರಷ್ಟು ಸ್ಪರ್ಧಿಗಳಿರುವುದು ವಿಶೇಷ. ಉಳಿದಂತೆ ಆ್ಯತ್ಲೆಟಿಕ್ಸ್‌, ಬ್ಯಾಡ್ಮಿಂಟನ್‌, ಬಾಕ್ಸಿಂಗ್‌, ಕಬಡ್ಡಿ, ಶೂಟಿಂಗ್‌, ವಾಲಿಬಾಲ್‌, ಕುಸ್ತಿ ಸ್ಪರ್ಧೆಗಳಲ್ಲಿ ರಾಜ್ಯದ ಕ್ರೀಡಾಳುಗಳು ಪದಕದ ರೇಸ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಹಿಂದಿನ ಎರಡೂ ಆವೃತ್ತಿಗಳಲ್ಲಿ ಕರ್ನಾಟಕ 4ನೇ ಸ್ಥಾನ ಪಡೆದಿತ್ತು.