ಅಲ್ಫೋನ್ಸೋ ಮಾವಿಗೆ ಜಿಐ ಗೌರವ

Team Udayavani, Oct 6, 2018, 6:00 AM IST

ನವದೆಹಲಿ: ದೇಶದ ಅಪರೂಪದ ಮಾವಿನ ತಳಿ ಅಲ್ಫೋನ್ಸೋಗೆ ಭೌಗೋಳಿಕ ಸೂಚಿ (ಜಿಯೋಗ್ರಾಫಿಕಲ್‌ ಇಂಡಿಕೇಷನ್‌- ಜಿಐ) ಮಾನ್ಯತೆ ಸಿಕ್ಕಿದೆ. ಈ ಬಗ್ಗೆ ಕೇಂದ್ರ ಕೈಗಾರಿಕೆ ಮತ್ತು ವಾಣಿಜ್ಯ ಸಚಿವಾಲಯ ಶುಕ್ರವಾರ ಘೋಷಣೆ ಮಾಡಿದೆ. “ಮಹಾರಾಷ್ಟ್ರದ ರತ್ನಗಿರಿ, ಸಿಂಧೂದುರ್ಗ ಮತ್ತು ಸುತ್ತಮುತ್ತಲ ಪ್ರದೇಶಗಳಲ್ಲಿ ಬೆಳೆಯುವ ಅಲ್ಫೋನ್ಸೋ ಮಾವಿನ ತಳಿಗೆ ಭೌಗೋಳಿಕ ಸೂಚಿಯ ಮಾನ್ಯತೆ ನೀಡಲಾಗಿದೆ’ ಎಂದು ಘೋಷಣೆ ಮಾಡಲಾಗಿದೆ. 2004ರಲ್ಲಿ ಡಾರ್ಜಿಲಿಂಗ್‌ ಚಹಾಕ್ಕೆ ಭಾರತದಲ್ಲಿ ಮೊದಲ ಬಾರಿ ಈ ಮಾನ್ಯತೆ ಲಭಿಸಿತ್ತು. 

ನಿಗದಿತ ಭೌಗೋಳಿಕ ಪ್ರದೇಶದಲ್ಲಿ ಬೆಳೆಯುವ ಹೂ, ಹಣ್ಣು ಅಥವಾ ಯಾವುದೇ ವಸ್ತುವನ್ನು ಗುರುತಿಸುವ ನಿಟ್ಟಿಲ್ಲಿ ಈ ಮಾನ್ಯತೆ ನೀಡಲಾಗುತ್ತದೆ. ಆ ಸ್ಥಳ ಮತ್ತು ಪ್ರದೇಶದ ಹೆಸರಿನಿಂದಾಗಿ ಆ ಉತ್ಪನ್ನಕ್ಕೆ ಮಾನ್ಯತೆ ಸಿಗುವಂತಾಗುತ್ತದೆ ಮತ್ತು ಗ್ರಾಹಕರಿಗೆ ಗುಣಮಟ್ಟದ ಖಾತರಿ ನೀಡಿದಂತಾಗುತ್ತದೆ. ತಿರುಪತಿ ದೇಗುಲದ ಲಡ್ಡು, ಜೈಪುರದ ಹಸಿರು ಬಣ್ಣದ ಮಡಿಕೆ, ಮಹಾಬಲೇಶ್ವರದ ಸ್ಟ್ರಾಬರಿಗೆ ಜಿಐ ಮಾನ್ಯತೆ ಸಿಕ್ಕಿದೆ.