ರೇಪ್‌ ಸಂತ್ರಸ್ತೆಯ ಚಾರಿತ್ರ್ಯ ವಧೆ!

Team Udayavani, Sep 9, 2018, 6:00 AM IST

ಕೊಚ್ಚಿ: ನನ್‌ ಮೇಲೆ ಅತ್ಯಾಚಾರ ಎಸಗಿದ ಪ್ರಕರಣ ಸಂಬಂಧ ಜಲಾಂಧರ್‌ನ ಬಿಷಪ್‌ ಫ್ರಾಂಕೋ ಮುಲಕ್ಕಲ್‌ರನ್ನು ಬಂಧಿಸುವಂತೆ ಒತ್ತಡ ಹೆಚ್ಚುತ್ತಿರುವ ನಡುವೆಯೇ ಕೇರಳದ ಪಕ್ಷೇತರ ಶಾಸಕರೊಬ್ಬರು ಸಂತ್ರಸ್ತೆಯ ಬಗ್ಗೆ ಅವಹೇಳನಕಾರಿ ಹೇಳಿಕೆ ನೀಡುವ ಮೂಲಕ ವಿವಾದ ಸೃಷ್ಟಿಸಿದ್ದಾರೆ.

ಮಾಧ್ಯಮಗಳ ಮುಂದೆಯೇ ಪೂಂಜಾರ್‌ ಶಾಸಕ ಪಿ.ಸಿ. ಜಾರ್ಜ್‌, “ಸಂತ್ರಸ್ತೆ ನನ್‌ ಚಾರಿತ್ರ್ಯ ಸರಿ ಇರಲಿಲ್ಲ. ಆಕೆ ಒಬ್ಬ ವೇಶ್ಯೆ. 13 ಬಾರಿ ಅತ್ಯಾಚಾರ ಆಗಿದೆ ಎಂದು ಅವರು ಆರೋಪಿಸುತ್ತಾರೆ. 12 ಬಾರಿ ಅತ್ಯಾಚಾರ ಅಲ್ಲದ್ದು, 13ನೇ ಬಾರಿಗೆ ಅತ್ಯಾಚಾರ ಹೇಗಾಯಿತು?’ ಎಂದು ಪ್ರಶ್ನಿಸಿದ್ದಾರೆ. ಜಾರ್ಜ್‌ ಹೇಳಿಕೆಗೆ ತೀವ್ರ ಆಕ್ರೋಶ ವ್ಯಕ್ತವಾಗಿದ್ದು, ಕಾಂಗ್ರೆಸ್‌ ಅಧ್ಯಕ್ಷ ಸುಧೀರನ್‌ ಸೇರಿದಂತೆ ಹಲವರು ಈ ಹೇಳಿಕೆಯನ್ನು ಖಂಡಿಸಿದ್ದಾರೆ.

ಇದೇ ವೇಳೆ, ಆರೋಪಿ ಬಿಷಪ್‌ ವಿರುದ್ಧ ಈವರೆಗೂ ಕಠಿಣ ಕ್ರಮ ಕೈಗೊಳ್ಳದ್ದನ್ನು ಖಂಡಿಸಿ ಶನಿವಾರ ಹಲವಾರು ಕ್ಯಾಥೋಲಿಕ್‌ ಸಂಘಟನೆಗಳು ಪ್ರತಿಭಟನಾ ಮೆರವಣಿಗೆ ನಡೆಸಿವೆ. ಪ್ರತಿಭಟನೆಯಲ್ಲಿ ಕೊಟ್ಟಾಯಂ ಕಾನ್ವೆಂಟ್‌ನ ಇತರ ನನ್‌ಗಳೂ ಭಾಗವಹಿಸಿದ್ದರು.