ಲಷ್ಕರ್ ಉಗ್ರರ ಜೊತೆ ಕೈಜೋಡಿಸಿದ್ದ ಯುಪಿಯ ಶರ್ಮಾ ಪೊಲೀಸ್ ಬಲೆಗೆ!

Team Udayavani, Jul 10, 2017, 3:40 PM IST

ಜಮ್ಮು- ಕಾಶ್ಮೀರ: ಕಣಿವೆ ಪ್ರದೇಶದಲ್ಲಿ ಪಾಕಿಸ್ತಾನ ಮೂಲದ ಭಯೋತ್ಪಾದನಾ ಸಂಘಟನೆ ಲಷ್ಕರ್ ಎ ತೊಯ್ಬಾಕ್ಕೆ ನೆರವು ನೀಡುತ್ತಿದ್ದ ಉತ್ತರಪ್ರದೇಶ ಮುಜಾಫರ್ ನಗರದ ವ್ಯಕ್ತಿಯನ್ನು ಬಂಧಿಸಿರುವುದಾಗಿ ಜಮ್ಮು – ಕಾಶ್ಮೀರ ಪೊಲೀಸರು ಸೋಮವಾರ ತಿಳಿಸಿದ್ದಾರೆ.

ಉತ್ತರಪ್ರದೇಶದ ಸಂದೀಪ್ ಕುಮಾರ್ ಶರ್ಮಾ 2012ರಲ್ಲಿ ಕೆಲಸಕ್ಕಾಗಿ ಕಾಶ್ಮೀರಕ್ಕೆ ತೆರಳಿದ್ದ.  ತದನಂತರ ಬದಲಿ ಕೆಲಸಕ್ಕಾಗಿ ಪಂಜಾಬ್ ಪ್ರಾಂತ್ಯಕ್ಕೂ ಪ್ರಯಾಣ ಬೆಳೆಸಿದ್ದನಂತೆ. ಆದರೆ ಆ ಬಳಿಕ ಎಟಿಎಂ ದರೋಡೆ ಮಾಡುವ ಸಂಚಿನೊಂದಿಗೆ ಜನವರಿಯಲ್ಲಿ ಕಾಶ್ಮೀರಕ್ಕೆ ವಾಪಸ್ ಆಗಿದ್ದ ಎಂದು ವರದಿ ಹೇಳಿದೆ.

ಪಂಜಾಬ್ ಪ್ರಾಂತ್ಯದಲ್ಲಿ ಶರ್ಮಾಗೆ ಸ್ಥಳೀಯ ಮಾಹಿತಿದಾರರ ಮೂಲಕ ಲಷ್ಕರ್ ಎ ತೊಯ್ಬಾ ಉಗ್ರಗಾಮಿ ಸಂಘಟನೆಯ ನಂಟು ಬೆಳೆದಿತ್ತು.  ಶರ್ಮಾ ಲಷ್ಕರ್ ನ ನಟೋರಿಯಸ್ ಉಗ್ರ ಬಶೀರ್ ಲಷ್ಕರಿಯ ಆಪ್ತನಾಗಿದ್ದ ಎಂದು ವರದಿ ವಿವರಿಸಿದೆ.

ಶರ್ಮಾ ಲಷ್ಕರ್ ಎ ತೊಯ್ಬಾ ಸಂಘಟನೆ ಜೊತೆ ಕೈಜೋಡಿ ಬ್ಯಾಂಕ್ ದರೋಡೆ, ಭಾರತೀಯ ಯೋಧರ ಮೇಲೆ, ಜಮ್ಮು ಕಾಶ್ಮೀರ ಪೊಲೀಸರ ಮೇಲೆ ದಾಳಿ ನಡೆಸುವ ಸಂಚಿನಲ್ಲಿ ನೆರವು ನೀಡುತ್ತಿದ್ದ ಎಂದು ತಿಳಿಸಿದೆ.