ಮುಖಭಂಗ; ಆಧಾರ್ ವಿರುದ್ಧ ಸೆಡ್ಡು ಹೊಡೆದ ಮಮತಾಗೆ ಸುಪ್ರೀಂ ಚಾಟಿ

Team Udayavani, Oct 30, 2017, 11:59 AM IST

ಹೊಸದಿಲ್ಲಿ : ಸಮಾಜ ಕಲ್ಯಾಣ ಯೋಜನಗಳ ಲಾಭ ಪಡೆಯುವುದಕ್ಕೆ ಅಧಾರ್‌ ಕಾರ್ಡ್‌ಗೆ ಫೋನ್‌ ನಂಬರನ್ನು ಜೋಡಿಸುವ ಕೇಂದ್ರ ಸರಕಾರದ ಕ್ರಮವನ್ನು ಪ್ರಶ್ನಿಸಿದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ನೇತೃತ್ವದ ಪಶ್ಚಿಮ ಬಂಗಾಲ ಸರಕಾರವನ್ನು ಸುಪ್ರೀಂ ಕೋರ್ಟ್‌ ಇಂದು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿತು.

ಒಕ್ಕೂಟ ವ್ಯವಸ್ಥೆಯಲ್ಲಿ ರಾಜ್ಯ ಸರಕಾರವೊಂದು ಸಂಸತ್ತಿನ ಆದೇಶವನ್ನು ಪ್ರಶ್ನಿಸಲು ಹೇಗೆ ಸಾಧ್ಯ ಎಂದು ಸುಪ್ರೀಂ ಕೋರ್ಟ್‌ ಪಶ್ಚಿಮ ಬಂಗಾಲ ಸರಕಾರವನ್ನು ನೇರವಾಗಿ ಪ್ರಶ್ನಿಸಿತು.

“ಈ ವಿಷಯವು ಕಾನೂನು ಪರಾಮರ್ಶೆಗೆ ಯೋಗ್ಯವೆಂಬುದನ್ನು 
ನಾವು ಒಪ್ಪುತ್ತೇವೆ; ಆದರೆ ರಾಜ್ಯ ಸರಕಾರವೊಂದು ಸಂಸತ್ತಿನ ಆದೇಶವನ್ನು ಯಾವ ನೆಲೆಯಲ್ಲಿ ಪ್ರಶ್ನಿಸಲು ಸಾಧ್ಯ ಎಂಬುದನ್ನು ನೀವು ನಮಗೆ ಮನವರಿಕೆ ಮಾಡಿಕೊಡಿ’ ಎಂದು ಸುಪ್ರೀಂ ಕೋರ್ಟ್‌ ಪಶ್ಚಿಮ ಬಂಗಾಲ ಸರಕಾರಕ್ಕೆ ಹೇಳಿತು. 

ಪಶ್ಚಿಮ ಬಂಗಾಲ ಮುಖ್ಯಮಂತ್ರಿಯಾಗಿರುವ ಮಮತಾ ಬ್ಯಾನರ್ಜಿ ಅವರು ಈ ವಿಷಯದಲ್ಲಿ ವೈಯಕ್ತಿಕ ನೆಲೆಯಲ್ಲಿ ಕೋರ್ಟ್‌ ಮೆಟ್ಟಲೇರಬಹುದಾಗಿದೆ ಎಂದು ಜಸ್ಟಿಸ್‌ಗಳಾದ ಎ ಕೆ ಸಿಕ್ರಿ ಮತ್ತು ಅಶೋಕ್‌ ಭೂಷಣ್‌ ಅವರನ್ನು ಒಳಗೊಂಡ ಸುಪ್ರೀಂ ಕೋರ್ಟ್‌ ಪೀಠ ಹೇಳಿತು.