Congress: ಈ ಬಾರಿ ಇವಿಎಂ ಬೇಡ, ಮತಪತ್ರವೇ ಇರಲಿ: ಇಸಿಗೆ ಕಾಂಗ್ರೆಸ್‌ ಮನವಿ?

Team Udayavani, Oct 15, 2024, 9:24 PM IST

ನವದೆಹಲಿ: ಹೆಜ್ಬುಲ್ಲಾ ಉಗ್ರರ ಪೇಜರ್‌ಗಳನ್ನೇ ಇಸ್ರೇಲ್‌ ಹ್ಯಾಕ್‌ ಮಾಡಿದೆ ಎಂದ ಮೇಲೆ ವಿದ್ಯುನ್ಮಾನ ಮತ ಯಂತ್ರಗಳು (ಇವಿಎಂ) ಯಾವ ಲೆಕ್ಕ ಎಂದು ಕಾಂಗ್ರೆಸ್‌ ನಾಯಕ ರಶೀದ್‌ ಅಳ್ವಿ ಪ್ರಶ್ನಿಸಿದ್ದು, ರಾಜಕೀಯ ಚರ್ಚೆಗೆ ಎಡೆಮಾಡಿಕೊಟ್ಟಿದೆ. ಈ ಬಗ್ಗೆ ಬಿಜೆಪಿ ಪ್ರತಿಕ್ರಿಯೆ ನೀಡಿದ್ದು, ಹಳೇ ಪಕ್ಷವು ಸೋಲನ್ನು ಒಪ್ಪಿಕೊಂಡಿದೆ ಎಂದು ವ್ಯಂಗ್ಯವಾಡಿದೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ರಶೀದ್‌ ಅಳ್ವಿ, ಮುಂಬರುವ ಮಹಾರಾಷ್ಟ್ರ, ಜಾರ್ಖಂಡ್‌ ಚುನಾವಣೆಯಲ್ಲಿ ಇವಿಎಂ ಬದಲಿಗೆ ಮತ ಪತ್ರದ ಮೂಲಕವೇ ಮತ ಚಲಾವಣೆ ಮಾಡುವ ವ್ಯವಸ್ಥೆ ಜಾರಿಗೆ ತರಬೇಕು ಎಂದು ಆಗ್ರಹಿಸಿದ್ದಾರೆ. ಈ ಕುರಿತು ಚುನಾವಣಾ ಆಯೋಗಕ್ಕೆ ಮನವಿ ಸಲ್ಲಿಸಲಾಗುವುದು ಎಂದಿದ್ದಾರೆ.

ಇಸ್ರೇಲ್‌ನವರು ಪೇಜರ್‌, ವಾಕಿ-ಟಾಕಿಗಳನ್ನು ಬಳಸಿ ಜನರನ್ನು ಕೊಲ್ಲಬಹುದಾದರೆ ಇವಿಎಂ ಯಾವ ಲೆಕ್ಕ? ಅಲ್ಲದೆ ಪ್ರಧಾನಿ ಮೋದಿ ಅವರು ಇಸ್ರೇಲ್‌ನೊಂದಿಗೆ ಉತ್ತಮ ಸಂಬಂಧ ಹೊಂದಿದ್ದಾರೆ. ಇಸ್ರೇಲ್‌ ಇಂತಹ ವಿಷಯಗಳಲ್ಲಿ ಪರಿಣಿತವಾಗಿದೆ. ಹೀಗಾಗಿ ಬಿಜೆಪಿ ಚುನಾವಣೆಗೆ ಮುಂಚೆ ಭಾರಿ ಆಟ ಆಡಬಹುದು ಎಂದು ಹೇಳಿದ್ದಾರೆ.