Uttarakhand: ಲಿವ್‌-ಇನ್‌ ಜೋಡಿಗಳ ನೋಂದಾಣಿಗೆ ಕೇವಲ 1 ತಿಂಗಳ ಗಡುವು

Team Udayavani, Oct 22, 2024, 7:35 AM IST

ಡೆಹ್ರಾಡೂನ್‌: ಉತ್ತರಾಖಂಡದಲ್ಲಿ ಲಿವ್‌-ಇನ್‌ ರಿಲೇಶನ್‌ಶಿಪ್‌ನಲ್ಲಿ ಇರುವಂಥ ಜೋಡಿಗಳು ಏಕರೂಪ ನಾಗರಿಕ ಸಂಹಿತೆ (ಯುಸಿಸಿ) ಜಾರಿಯಾದ 1 ತಿಂಗಳ ಒಳಗಾಗಿ ನೋಂದಣಿ ಮಾಡಿಕೊಳ್ಳಲೇ ಬೇಕಿದೆ. ಇಲ್ಲದವಾದಲ್ಲಿ 6 ತಿಂಗಳ ಜೈಲು ಶಿಕ್ಷೆ ಮತ್ತು 25,000 ರೂ.ದಂಡಕ್ಕೆ ಗುರಿಯಾಗಬೇಕಾಗುತ್ತದೆ.

ನವೆಂಬರ್‌ 9ರಂದು ಉತ್ತರಾಖಂಡದ ರಾಜ್ಯಸಂಸ್ಥಾಪನ ದಿನಾಚರಣೆಯಂದೇ ಯುಸಿಸಿ ಜಾರಿಗೊಳಿಸುವ ನಿರೀಕ್ಷೆ ಇದೆ. ಲಿವ್‌-ಇನ್‌ ಜೋಡಿಗಳು ಮಾತ್ರವಲ್ಲದೇ, ದಂಪತಿಗಳು ಕೂಡ ತಮ್ಮ ಮದುವೆ ನೋಂದಣಿಯನ್ನು 6 ತಿಂಗಳ ಒಳಗಾಗಿ ಮಾಡಿಕೊಳ್ಳಬೇಕಿದೆ. ಒಂದು ವೇಳೆ ದಂಪತಿ ಬೇರೆ ರಾಜ್ಯದಲ್ಲಿ ತಮ್ಮ ಮದುವೆ ನೋಂದಾಯಿಸಿಕೊಂಡಿದ್ದರೆ ಆ ದಾಖಲೆಗಳನ್ನು ಉತ್ತರಾಖಂಡ ಸರ್ಕಾರಕ್ಕೆ ಒದಗಿಸಬೇಕಿದೆ.

ಇಲ್ಲದಿದ್ದರೆ ಸರ್ಕಾರದ ಯೋಜನೆಗಳ ಯಾವುದೇ ಸೌಲಭ್ಯವನ್ನು ಅವರಿಗೆ ಒದಗಿಸುವುದಿಲ್ಲ ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಇನ್ನು ನೋಂದಣಿಯಾಗದ ಸಂಗಾತಿಗಳಿಗೆ ಮನೆಗಳನ್ನು ಬಾಡಿಗೆ ನೀಡಿದ್ದರೆ ಅಂಥ ಮಾಲಿಕರ ವಿರುದ್ಧ ಉದ್ದೇಶಪೂರ್ವಕವಾಗಿಯೇ ಮಾಹಿತಿ ಮುಚ್ಚಿಟ್ಟಿರುವ ಆಧಾರದಲ್ಲಿ ಕ್ರಮ ಕೈಗೊಳ್ಳಬಹುದಾಗಿದೆ.