ನಡು ರಸ್ತೆಯಲ್ಲಿ ರೂಪದರ್ಶಿಯ ಸ್ಕರ್ಟ್‌ ಎಳೆದಾಡಿದ ಕಾಮುಕರು

Team Udayavani, Apr 23, 2018, 4:16 PM IST

ಭೋಪಾಲ್‌ : ನಗರದ ಅತ್ಯಂತ ಬಿರುಸಿನ ಚಟುವಟಿಕೆಯ ಮುಖ್ಯ ರಸ್ತೆಯೊಂದರಲ್ಲಿ ಸ್ಕರ್ಟ್‌ಧಾರಿಯಾಗಿ ತನ್ನ ಸ್ಕೂಟರ್‌ ಚಲಾಯಿಸಿಕೊಂಡು ಹೋಗುತ್ತಿದ್ದ ರೂಪದರ್ಶಿಯ ಮೇಲೆ ಇಬ್ಬರು ಕಾಮಾಂಧರು ದಾಳಿ ನಡೆಸಿ “ದಿಖಾವೋ, ಇಸ್ಕೆ ನೀಚೇ ಕ್ಯಾಹೈ’ ಎಂದು  ಆಕೆಯ ಸ್ಕರ್ಟ್‌ ಎಳೆದಾಡಿದಾಗ ಅವರನ್ನು ತಡೆಯಲೆತ್ನಿಸಿದ ಆಕೆ ನಿಯಂತ್ರಣ ಕಳೆದುಕೊಂಡು ನೆಲಕ್ಕೆ ಬಿದ್ದು ಗಾಯಗೊಂಡ ಘಟನೆ ನಿನ್ನೆ ಭಾನುವಾರ ನಡೆದಿದೆ. 

ವಾಹನಗಳಿಂದ ತುಂಬಿದ ಅತ್ಯಂತ ದಟ್ಟನೆಯ ಈ ರಸ್ತೆಯಲ್ಲಿ ಈ ಅವಮಾನಕಾರಿ ಘಟನೆ ನಡೆದಾಗ ಅದು ಅಲ್ಲಿದ್ದ ಜನರ ಗಮನಕ್ಕೆ ಬರಲೇ ಇಲ್ಲ. ಸ್ಕರ್ಟ್‌ ಎಳೆದಾಡಿದ ಕಾಮಾಂಧ ತರುಣರಿಬ್ಬರು ಒಡನೆಯೇ ಅಲ್ಲಿಂದ ಪರಾರಿಯಾಗಿದ್ದಾರೆ. 

“ಸ್ವಲ್ಪ ಪ್ರಾಯವಾದ ಅಂಕಲ್‌ ಒಬ್ಬರು ನನ್ನನ್ನು  ಮೇಲೆತ್ತಲು ನೆರವಾದಾಗ “ನೀನು ಸ್ಕರ್ಟ್‌ ತೊಟ್ಟಿರುವುದರಿಂದಲೇ ನಿನಗೆ ಈ ತೊಂದರೆ ಬಂತು’ ಎಂದು ಹೇಳಿದುದು ನನಗೆ ತುಂಬಾ ಖೇದವೆನಿಸಿತು’ ಎಂದು ರೂಪದರ್ಶಿ ಪ್ರತಿಕ್ರಿಯಿಸಿದ್ದಾಳೆ. 

ಘಟನೆಯ ಬಗ್ಗೆ ಪೊಲೀಸರಿಗೆ ದೂರು ಕೊಡುವುದಾಗಿ ರೂಪದರ್ಶಿ ಹೇಳಿದ್ದಾಳೆ.