ರೈತರ ಎಲ್ಲ ಬೇಡಿಕೆ ಈಡೇರಿಸುವುದಾಗಿ ಮಹಾ ಸರಕಾರ, ಸಮಿತಿ ರಚನೆ

Team Udayavani, Mar 12, 2018, 5:02 PM IST

ಮುಂಬಯಿ : ಸಂಪೂರ್ಣ ಕೃಷಿ ಸಾಲ ಮನ್ನಾ ಸೇರಿದಂತೆ ರೈತರ ಎಲ್ಲ ಬೇಡಿಕೆಗಳನ್ನು ಪರಿಶೀಲಿಸುವ ಭರವಸೆಯನ್ನು ಮಹಾರಾಷ್ಟ್ರ ಸರಕಾರ ಪ್ರತಿಭಟನೆ ನಿರತ ರಾಜ್ಯದ ರೈತರಿಗೆ ನೀಡಿದೆ. 

ರೈತರ ಬೇಡಿಕೆಗಳನ್ನು ಅಧ್ಯಯನ ಮಾಡಿ ಪರಿಹಾರ ಕಾಣಿಸುವ ನಿಟ್ಟಿನಲ್ಲಿ ಸರಕಾರ ಆರು ಸದಸ್ಯರ ಸಮಿತಿಯೊಂದನ್ನು ರೂಪಿಸಿದೆ. 

ರೈತರ ಬೇಡಿಕೆಗಳ ಬಗ್ಗೆ ನಾವು ಧನಾತ್ಮಕ ದೃಷ್ಟಿಕೋನ ಹೊಂದಿದ್ದೇವೆ. ರೈತರು ಮೋರ್ಚಾ ಆರಂಭಿಸಿದ ಮೊದಲ ದಿನದಿಂದಲೇ ನಾವು ರೈತರ ಕೃಷಿ ಸಮಸ್ಯೆಗಳನ್ನು ಚರ್ಚಿಸಿದ್ದೇವೆ. ಗಿರೀಶ್‌ ಮಹಾಜನ್‌ ಅವರು ಮೊದಲ ದಿನದಿಂದಲೇ ಪ್ರತಿಭಟನೆ ನಿರತ ರೈತರೊಂದಿಗೆ ಸಂಪರ್ಕದಲ್ಲಿದ್ದರು. ಆದರೆ ಮೋರ್ಚಾ ನಡೆಸಿಯೇ ತೀರುವ ಬಗ್ಗೆ ಅವರು ದೃಢ ಸಂಕಲ್ಪಿತರಾಗಿದ್ದರು ಎಂದು ಮಹಾರಾಷ್ಟ್ರ ಸಿಎಂ ದೇವೇಂದ್ರ ಫ‌ಡ್ನವೀಸ್‌ ಅವರು ವಿಧಾನಸಭೆಯಲ್ಲಿ ಹೇಳಿದರು. 

ತಮ್ಮ ಬೇಡಿಕೆಗಳನ್ನು ಈಡೇರಿಸಲು ಸರಕಾರ ವಿಫ‌ಲವಾಗಿ ಎಂದು ಆರೋಪಿಸಿ ಮೋರ್ಚಾ ನಡೆಸಿದ್ದ ರಾಜ್ಯದ ಸುಮಾರು 30,000 ರೈತರ ಮೆರವಣಿಗೆ ಕಳೆದ ಶನಿವಾರ ಮುಂಬಯಿ ತಲುಪಿತ್ತು.