Maharashtra Horror: ಗುಂಡೇಟು ಬಿದ್ದರೂ ಡಕಾಯಿತರಿಂದ 35 ಪ್ರಯಾಣಿಕರ ಜೀವ ಉಳಿಸಿದ ಚಾಲಕ

Team Udayavani, Mar 12, 2024, 10:42 PM IST

ನಾಗ್ಪುರ: ಮಹಾರಾಷ್ಟ್ರದ ನಾಗ್ಪುರದಲ್ಲಿ ಮಿನಿ ಬಸ್‌ ಚಾಲಕನೊಬ್ಬನ ಸಮಯ ಪ್ರಜ್ಞೆ ಮತ್ತು ಸಾಹಸದಿಂದ 35 ಪ್ರಯಾಣಿಕರ ಜೀವ ಉಳಿದಿದೆ. ತನ್ನ ಕೈಗೆ ಗುಂಡು ತಾಗಿದರೂ, 30 ಕಿ.ಮೀ. ವಾಹನ ಚಲಾಯಿಸಿ ಆ ಚಾಲಕನು, ಡಕಾಯಿತರಿಂದ ಪ್ರಯಾಣಿಕರನ್ನು ರಕ್ಷಿಸಿದ್ದಾರೆ.

ಕೋಮ್‌ದೇವ್‌ ಕವಡೆ ಸಾಹಸ ತೋರಿದ ಚಾಲಕ. 35 ಪ್ರಯಾಣಿಕರಿದ್ದ ಮಿನಿ ಬಸ್‌ ಭಾನುವಾರ ಶೆಗಾಂವ್‌ನಿಂದ ನಾಗ್ಪುರಕ್ಕೆ ತೆರಳುತ್ತಿತ್ತು. ಅಮರಾವತಿ-ನಾಗ್ಪುರ ಹೆದ್ದಾರಿಯಲ್ಲಿ ಡಕಾಯಿತರು ಬಸ್‌ ಅನ್ನು ತಡೆಯಲು ಪ್ರಯತ್ನಿಸಿದರು. ನಂತರ ಬಸ್‌ ಮೇಲೆ ಗುಂಡಿನ ದಾಳಿ ನಡೆಸಿದರು. ಈ ವೇಳೆ ಡಕಾಯಿತರು ಹಾರಿಸಿದ 4 ಗುಂಡುಗಳ ಪೈಕಿ, 1 ಗುಂಡು ಬಸ್‌ ಚಾಲಕನ ಕೈಗೆ ತಾಗಿತು.

ಒಂದೆಡೆ, ಚಾಲಕನ ಕೈಯಲ್ಲಿ ರಕ್ತ ಸುರಿಯುತ್ತಿದ್ದರೆ, ಮತ್ತೂಂದೆಡೆ ಡಕಾಯಿತರು ಬೆಂಬಿಡದೆ ಬಸ್‌ ಅನ್ನು ಚೇಸ್‌ ಮಾಡುತ್ತಿದ್ದರು. ಈ ವೇಳೆ, ತನ್ನ ಪ್ರಾಣವನ್ನೂ ಲೆಕ್ಕಿಸದೇ ಸಮಯಪ್ರಜ್ಞೆ ಮತ್ತು ಸಾಹಸ ತೋರಿದ ಚಾಲಕ, ಸುಮಾರು 30 ಕಿ.ಮೀ.ವರೆಗೂ ಬಸ್‌ ಚಲಾಯಿಸಿ, ಟಿಯೋಸಾ ಪೊಲೀಸ್‌ ಠಾಣೆಗೆ ತಂದು ನಿಲ್ಲಿಸಿದ್ದಾರೆ. ಈ ಮೂಲಕ ಬಸ್ಸಲ್ಲಿದ್ದ ಎಲ್ಲ ಪ್ರಯಾಣಿಕರ ಜೀವ ಉಳಿಸಿದ್ದಾರೆ. ಬಳಿಕ ಪೊಲೀಸರು, ಚಾಲಕನನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಡಕಾಯಿತರಿಗಾಗಿ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.