ಯೆರವಡಾ ಜೈಲಿನ ಕೈದಿಗಳಿಂದ ಪರಿಸರ ಸ್ನೇಹಿ ಗಣಪತಿ ರಚನೆ

Team Udayavani, Aug 27, 2022, 7:45 PM IST

ಪುಣೆ: ಯೆರವಡಾ ಸೆಂಟ್ರಲ್‌ ಜೈಲಿನ ಕೈದಿಗಳು ಇದೇ ಮೊದಲ ಬಾರಿ ಪರಿಸರಸ್ನೇಹಿ ಗಣಪನ ವಿಗ್ರಹ ನಿರ್ಮಾಣ ಮಾಡಿದ್ದು, ಇದಕ್ಕೆ ಭಾರೀ ಬೇಡಿಕೆ ಕುದುರಿದೆ.

ಈ ಜೈಲಿನ ಕೈದಿಗಳು ಬೇರೆ ಬೇರೆ ವಸ್ತುಗಳನ್ನು ಉತ್ಪಾದಿಸುತ್ತಿದ್ದರು. ಇದೇ ಮೊದಲ ಬಾರಿಗೆ ಇಲ್ಲಿ ಗಣಪತಿ ವಿಗ್ರಹ ರಚನೆ ಬಗ್ಗೆ ಚಿಂತಿಸಲಾಗಿದ್ದು, ಅದಕ್ಕಾಗಿ ನಾಸಿಕ್‌ ಜೈಲಿನಿಂದ ಇಬ್ಬರು ಕೈದಿಗಳನ್ನು ಕರೆದುಕೊಂಡು ಬಂದು ಇಲ್ಲಿನ ಕೈದಿಗಳಿಗೆ ತರಬೇತಿ ನೀಡಲಾಗಿತ್ತು. ಪ್ರಸ್ತುತ ಇವರ ರಚಿಸಿರುವ ಗಣಪತಿ ವಿಗ್ರಹಗಳು ಜೈಲಿನ ಮಾರಾಟ ಮಳಿಗೆಯಲ್ಲಿ ಬಿಕರಿಯಾಗುತ್ತಿವೆ ಎಂದು ಜೈಲಧಿಕಾರಿಗಳು ತಿಳಿಸಿದ್ದಾರೆ.

ಪ್ರತಿವರ್ಷ ನಾಸಿಕ್‌ ಸೆಂಟ್ರಲ್‌ ಜೈಲಿನಲ್ಲಿ ಮಾತ್ರವೇ ಗಣಪತಿ ವಿಗ್ರಹ ರಚನೆ ಮಾಡಲಾಗುತ್ತಿತ್ತು. ಈ ಬಾರಿ ಅಲ್ಲಿಂದ ಪರಿಣಿತ ಇಬ್ಬರು ಕೈದಿಗಳನ್ನು ಕರೆದುಕೊಂಡು ಬಂದು ಯೆರವಡಾ ಜೈಲಿನ 15 ಕೈದಿಗಳಿಗೆ ವಿಗ್ರಹ ರಚನೆಯ ತರಬೇತಿ ನೀಡಲಾಗಿದೆ. ಇವರು ಕಿರು ಅವಧಿಯಲ್ಲಿ ವಿಗ್ರಹ ರಚನೆ ಬಗ್ಗೆ ಕಲಿತುಕೊಂಡಿದ್ದಾರೆ ಎಂದು ಜೈಲಿನ ಸೂಪರಿಂಟೆಂಡೆಂಟ್‌ ರಾಣಿ ಭೊನ್ಸಾಲೆ ಅವರು ತಿಳಿಸಿದ್ದಾರೆ.

ಕೇವಲ ಆವೆ ಮಣ್ಣನ್ನು ಬಳಸಿ ವಿಗ್ರಹ ರಚಿಸಲಾಗಿರುವ ಕಾರಣ ಇವು ಪರಿಸರಸ್ನೇಹಿಯಾಗಿವೆ. ಈ ಬಾರಿ 250ಕ್ಕೂ ಮಿಕ್ಕಿ ಆಕರ್ಷಕ ವಿಗ್ರಹ ರಚಿಸಲಾಗಿದ್ದು, ಇವು ಜೈಲಿನ ಮಾರಾಟ ಮಳಿಗೆಯಲ್ಲಿ ಹೆಚ್ಚು ಬೇಡಿಕೆ ಪಡೆದುಕೊಂಡಿವೆ. ಇವುಗಳಿಗೆ ಗಾತ್ರ ಹಾಗೂ ವಿನ್ಯಾಸಕ್ಕೆ ಅನುಗುಣವಾಗಿ 400ರಿಂದ 15 ಸಾವಿರ ರೂಪಾಯಿ ತನಕ ಬೆಲೆ ನಿಗದಿ ಮಾಡಲಾಗಿದೆ ಎಂದು ಭೊನ್ಸಾಲೆ ತಿಳಿಸಿದ್ದಾರೆ.