ಗಣರಾಜ್ಯೋತ್ಸವ: ಅಬೈಡ್‌ ವಿತ್‌ ಮಿ ಗೀತೆ ಬಳಕೆಯಿಲ್ಲ

Team Udayavani, Jan 22, 2022, 9:45 PM IST

ನವದೆಹಲಿ: ಮಹಾತ್ಮ ಗಾಂಧಿಯವರಿಗೆ ಪ್ರಿಯವಾದ ಗೀತೆಯಾಗಿದ್ದ “ಅಬೈಡ್‌ ವಿತ್‌ ಮಿ’ ಗೀತೆಯನ್ನು ಜ.29ರ ಬೀಟಿಂಗ್‌ ರಿಟ್ರೀಟ್‌ ಕಾರ್ಯಕ್ರಮದಲ್ಲಿ ನುಡಿಸುವುದಿಲ್ಲ ಎಂದು ಭಾರತೀಯ ಸೇನೆಯು ಶನಿವಾರದಂದು ತಿಳಿಸಿದೆ.

ಪ್ರತಿ ವರ್ಷ ಜ.29ರಂದು ಭಾರತೀಯ ಸೇನೆಯ ಬ್ಯಾಂಡ್‌ಗಳು ಗಣರಾಜ್ಯೋತ್ಸವ ದಿನದ ಮುಕ್ತಾಯ ಸೂಚಕವಾಗಿ ರಾಜಪಥದಲ್ಲಿ ಗೀತೆಗಳನ್ನು ನುಡಿಸುತ್ತಾ ಸಾಗುತ್ತವೆ.

1847ರಲ್ಲಿ ಸ್ಕಾಟಿಷ್‌ ಕವಿ ಹೆನ್ರಿ ಫ್ರಾನ್ಸಿಸ್‌ ಲೈಟ್‌ ಬರೆದಿದ್ದ “ಅಬೈಡ್‌ ವಿತ್‌ ಮಿ’ ಗೀತೆಯನ್ನು 1950ರಿಂದಲೂ ಬೀಟಿಂಗ್‌ ರಿಟ್ರೀಟ್‌ ಕಾರ್ಯಕ್ರಮದ ಭಾಗವಾಗಿಸಿಕೊಳ್ಳಲಾಗಿತ್ತು.

ಈ ಗೀತೆ ಮಹಾತ್ಮ ಗಾಂಧಿಯವರಿಗೆ ಅತ್ಯಂತ ಪ್ರೀತಿಯ ಗೀತೆ ಕೂಡ ಆಗಿತ್ತು. ಆದರೆ ಇತ್ತೀಚಿನ ವರ್ಷಗಳಲ್ಲಿ ವಿದೇಶಿ ಗೀತೆಗಳ ಬದಲಾಗಿ ಭಾರತೀಯ ಹಾಡುಗಳಿಗೆ ಪ್ರಾಮುಖ್ಯತೆ ಕೊಟ್ಟು, ನುಡಿಸಲಾಗುತ್ತಿದೆ. ಅದೇ ಹಿನ್ನೆಲೆಯಲ್ಲಿ ಆ ಹಾಡನ್ನು ಕೈ ಬಿಟ್ಟಿರುವುದಾಗಿ ಸೇನೆ ತಿಳಿಸಿದೆ.