13ರ ಪುತ್ರಿಯ ಮೇಲೆ 6 ತಿಂಗಳು ಅತ್ಯಾಚಾರ ಎಸಗಿದ ಅಪ್ಪ ಅರೆಸ್ಟ್‌

Team Udayavani, Jun 6, 2018, 5:33 PM IST

ಕೋಟ, ರಾಜಸ್ಥಾನ : ಆರು ತಿಂಗಳ ಕಾಲ ತನ್ನ 13 ವರ್ಷ ಪ್ರಾಯದ ಮಗಳ ಮೇಲೆ ಅತ್ಯಾಚಾರ ನಡೆಸಿದ ಆರೋಪದ ಮೇಲೆ ಆಕೆಯ 43 ವರ್ಷ ಪ್ರಾಯದ ತಂದೆಯನ್ನು ರಾಜಸ್ಥಾನದ ಝಳವಾರ್‌ ಜಿಲ್ಲೆಯಲ್ಲಿ ನಿನ್ನೆ ಮಂಗಳವಾರ ರಾತ್ರಿ ಪೊಲೀಸರು ಬಂಧಿಸಿದ್ದಾರೆ.

ಬಾಲಕಿಯ ಅತ್ಯಾಚಾರಿ ತಂದೆಯು ವೃತ್ತಿಯಲ್ಲಿ ಕಾರ್ಮಿಕನಾಗಿದ್ದು ಕುಡುಕನಾಗಿದ್ದ ಮತ್ತು ಪತ್ನಿಯನ್ನು ಬಿಟ್ಟಿದ್ದ. ಈ ದಂಪತಿಗೆ ಮೂವರು ಮಕ್ಕಳು. ಆರು ತಿಂಗಳ ಹಿಂದೆ ತನ್ನ ಪರಿತ್ಯಕ್ತ ಪತ್ನಿಯ ಬಳಿಗೆ ಹೋಗಿದ್ದ ಆತ ಪುತ್ರಿ ಮತ್ತು ಮಗನನ್ನು ನಾನೇ ನೋಡಿಕೊಳ್ಳುತ್ತೇನೆ ಎಂದು ಅವರನ್ನು ತನ್ನ ಸಂಗಡ ಒಯ್ದಿದ್ದ. ಈ ಆರು ತಿಂಗಳ ಕಾಲವೂ ಆತ ತನ್ನ ಅಪ್ರಾಪ್ತ ವಯಸ್ಸಿನ ಪುತ್ರಿಯ ಮೇಲೆ ಅತ್ಯಾಚಾರ ಎಸಗುತ್ತಿದ್ದ.

ಆಕೆಯ ತಾಯಿ ಈಚೆಗೆ ಮಕ್ಕಳನ್ನು ಕಾಣಲೆಂದು ಅವರ ತಂದೆಯ ಮನೆಗೆ ಹೋಗಿದ್ದಾಗ ಪುತ್ರಿಯು ತನ್ನ ಮೇಲೆ ತಂದೆ ನಡೆಸುರುವ  ಲೈಂಗಿಕ ದೌರ್ಜನ್ಯವನ್ನು ವಿವರಿಸಿದಳು. ಕೂಡಲೇ ತಾಯಿ ಪೊಲೀಸರಿಗೆ ದೂರು ನೀಡಿದಳು. 

ಅದಾಗಲೇ ತಲೆ ಮರೆಸಿಕೊಂಡಿದ್ದ ಅತ್ಯಾಚಾರಿಯನ್ನು ಪೊಲೀಸರು ಮೊನ್ನೆ ಸೋಮವಾರ ಸೆರೆ ಹಿಡಿದು ನ್ಯಾಯಾಲಯದ ಮುಂದೆ ಹಾಜರುಪಡಿಸಿದಾಗ ನ್ಯಾಯಾಧೀಶರು ಆರೋಪಿಯನ್ನು 15 ದಿನಗಳ ನ್ಯಾಯಾಂಗ ಕಸ್ಟಡಿಗೆ ಒಪ್ಪಿಸಿದರು.