ವಿವಾಹಿತ ಮಹಿಳೆಯ ಮಗನನ್ನು ಅಪಹರಿಸಿ ಕೊಂದ ತರುಣ ಸೆರೆ

Team Udayavani, Jan 9, 2018, 4:31 PM IST

ಭೋಪಾಲ್‌ : ತನ್ನ ನೆರೆಮನೆಯ ವಿವಾಹಿತ ಹೆಂಗಸಿನೊಂದಿಗೆ ಅನೈತಿಕ ಸಂಬಂಧ ಹೊಂದಿದ್ದ 19 ವರ್ಷ ಪ್ರಾಯದ ತರುಣನೋರ್ವ ಆಕೆಯ ಎಂಟು ವರ್ಷ ಪ್ರಾಯದ ಪುತ್ರನನ್ನು  ಅಪಹರಿಸಿ ಕೊಂದಿರುವ ಘಟನೆ ಅಮಾನುಷ ಘಟನೆ ವರದಿಯಾಗಿದೆ. ಪೊಲೀಸರು ಕೊಲೆ, ಅಪಹರಣದ ಆರೋಪಿ ತರುಣನನ್ನು ಬಂಧಿಸಿದ್ದಾರೆ.

ನೆರೆಮನೆಯ ಮಹಿಳೆಯೊಂದಿಗಿನ ತನ್ನ ಅನೈತಿಕ ಸಂಬಂಧವು ಯಾವುದೋ ಕಾರಣಕ್ಕೆ ಹದಗೆಟ್ಟದ್ದರಿಂದ ಕ್ರುದ್ಧನಾಗಿದ್ದ  ವಿಶಾಲ್‌ ರೂಪಾಣಿ ಎಂಬ ತರುಣನು ಆಕೆಯ ಮಗನನ್ನು ಅಪಹರಿಸಿ ಉಸಿರುಗಟ್ಟಿಸಿ ಅದನ್ನು ಕೊಂದಿರುವುದಾಗಿ ಪೊಲೀಸರು ಹೇಳಿದ್ದಾರೆ.

ಭೈರಗಢ ಪ್ರದೇಶದ ನಿವಾಸಿಯಾಗಿರುವ ಬಾಲಕನು ನಿನ್ನೆ ಸೋಮವಾರ ಶಾಲೆಯಿಂದ ತನ್ನ ಮನೆಗೆ ಹೋಗುತ್ತಿದ್ದಾಗ ನಾಪತ್ತೆಯಾಗಿದ್ದ. ಗೋಣಿಚೀಲದಲ್ಲಿ ತುರುಕಲ್ಪಟ್ಟ  ಬಾಲಕನ ಶವವು ನಗರ ಹೊರವಲಯದ ಮುಬಾರಕ್‌ಪುರ ಟೋಲ್‌ ಬ್ಯಾರಿಯರ್‌ ಸಮೀಪ ಬಯಲಲ್ಲಿ ಪತ್ತೆಯಾಯಿತು ಎಂದು ಭೈರಗಢ ಪೊಲೀಸ್‌ ಠಾಣೆ ಪ್ರಭಾರಾಧಿಕಾರಿ ಸುಧೀರ್‌ ಅರ್ಜಾರಿಯ ತಿಳಿಸಿದ್ದಾರೆ. 

ಈ ಕೊಲೆ, ಅಪಹರಣದ ಹಿಂದೆ ವಿಶಾಲ್‌ ರೂಪಾಣಿಯೇ ಇರಬೇಕೆಂದು ಮೃತ ಬಾಲಕನ ಮನೆಯವರು ದೂರಿತ್ತ ಪ್ರಕಾರ ಪೊಲೀಸರು ಆತನನ್ನು ಬಂಧಿಸಿದರು.