ಭೋಪಾಲ್‌ :ಸಹಪ್ರಯಾಣಿಕನನ್ನು ವಿನಾಕಾರಣ ರೈಲಿನಿಂದ ಹೊರದೂಡಿ ಕೊಂದ

Team Udayavani, Feb 19, 2018, 4:19 PM IST

ಭೋಪಾಲ್‌ : ಭೋಪಾಲ್‌ ಹೊರವಲಯದ ಸುಖೀ ಸೇವಾನಿಯಾ ರೈಲ್ವೇ ನಿಲ್ದಾಣ ಸಮೀಪ  ರೈಲಿನ ಜನರಲ್‌ ಬೋಗಿಯ ಬಾಗಿಲ ಬಳಿ ಕುಳಿತಿದ್ದ 23ರ ಹರೆಯದ ಪ್ರಯಾಣಿಕನನ್ನು ಇನ್ನೊಬ್ಬ ಪ್ರಯಾಣಿಕ ವಿನಾಕಾರಣ ಕಾಲಿನಿಂದ ಒದ್ದು ರೈಲಿನಿಂದ ಹೊರದೂಡಿ ಆತನ ಸಾವಿಗೆ ಕಾರಣನಾದ ಘಟನೆ ವರದಿಯಾಗಿದೆ.

ಮೃತ ರಿತೇಶ್‌, ಕಾಮಯಾನಿ ಎಕ್ಸ್‌ಪ್ರೆಸ್‌ ರೈಲಿನ ಜನರಲ್‌ ಕೋಚ್‌ನ ಬಾಗಿಲಲ್ಲಿ ಕುಳಿತಿದ್ದ. ಆತನನ್ನು ರಾಜಮಲ್‌ ಪಾಲ್‌ ಆಕಾ ರಜ್ಜು   (27) ಎಂಬಾತ ರಿತೇಶ್‌ನನ್ನು ಕಾಲಿನಿಂದ ಒದ್ದು ಕೆಳ ದೂಡಿದ ಎಂದು ಸರಕಾರಿ ರೈಲ್ವೇ ಪೊಲೀಸ್‌ ಅಧಿಕಾರಿಯೋರ್ವರು ತಿಳಿಸಿದ್ದಾರೆ.

ರಿತೇಶ್‌ ಜತೆಗಿದ್ದ ಆತನ ಸೋದರ ಸಂಬಂಧಿಯಾಗಿರುವ ಸುಮೀತ್‌ ಸಿಂಗ್‌ ತಿಳಿಸಿರುವ ಪ್ರಕಾರ ರಾಜಮಲ್‌ ಪಾಲ್‌ ರಿತೇಶ್‌ನನ್ನು ಒದ್ದು ದೂಡುವಾಗ “ನಾನು ಹೇಗೂ ಸಾಯುವವನಿದ್ದೇನೆ; ಅದೇನಿದ್ದರೂ ನಿನ್ನನ್ನು ಸಾಯಿಸಿಯೇ ತಿರುತ್ತೇನೆ’ ಎಂದು ಹೇಳಿದ್ದಾನೆ. 

ವಿಚಿತ್ರವೆಂದರೆ ಆರೋಪಿ ಮತ್ತು ಮೃತ ವ್ಯಕ್ತಿ (ರಿತೇಶ್‌) ಈ ಹಿಂದೆಂದೂ ಪರಸ್ಪರ ಭೇಟಿಯಾದವರಲ್ಲ; ಪರಿಚಯದವರಲ್ಲ; ಆದರೂ ಆರೋಪಿಯು ವಿನಾಕಾರಣವಾಗಿ ರಿತೇಶ್‌ನನ್ನು ಕೊಂದಿದ್ದಾನೆ ಎಂದು ಭೋಪಾಲದ ಜಿಆರ್‌ಪಿ ಪೊಲೀಸ್‌ ಠಾಣೆಯ ಪ್ರಭಾರಾಧಿಕಾರಿ ಹೇಮಂತ ಶ್ರೀವಾಸ್ತವ ತಿಳಿಸಿದ್ದಾರೆ. ಪೊಲೀಸರು ಆರೋಪಿ ರಾಜಮಲ್‌ನನ್ನು ಬಂಧಿಸಿ ಕೇಸು ದಾಖಲಿಸಿಕೊಂಡು ತನಿಖೆ ನಡೆಸುತ್ತಿದ್ದಾರೆ. 

ತನಿಖೆಯಿಂದ ಗೊತ್ತಾಗಿರುವ ಪ್ರಕಾರ ರಾಜಮಲ್‌ ಪಾಲ್‌ ಅಲಹಾಬಾದ್‌ನಲ್ಲಿ ತನ್ನ ತಾಯಿಯ ಅಂತ್ಯ ಸಂಸ್ಕಾರ ನಡೆಸಿ ಮರಳುತ್ತಿದ್ದ. ರಿತೇಶ್‌ ಮತ್ತು ಸುಮಿತ್‌ ಅಲಹಾಬಾದ್‌ನಿಂದ ಭೋಪಾಲ್‌ಗೆ ಮದುವೆ ಕಾರ್ಯಕ್ರಮದಲ್ಲಿ ಭಾಗವಹಿಸಲು ರೈಲಿನಲ್ಲಿ ಪ್ರಯಾಣಿಸುತ್ತಿದ್ದರು.