ಮಣಿಪಾಲ ವಿವಿ, ಐ.ಐ.ಎಸ್‌.ಸಿ.ಗೆ ಸ್ಥಾನ

Team Udayavani, Jun 8, 2018, 8:55 AM IST

ಹೊಸದಿಲ್ಲಿ: ವಿಶ್ವದ ಅತ್ಯುತ್ತಮ ಉನ್ನತ ಶಿಕ್ಷಣ ಸಂಸ್ಥೆಗಳ ಬಗ್ಗೆ ಇರುವ ಕ್ಯೂ.ಎಸ್‌. ಜಾಗತಿಕ ವಿಶ್ವವಿದ್ಯಾಲಯಗಳ ರ್‍ಯಾಂಕಿಂಗ್‌ ಪಟ್ಟಿ- 2019 ಬುಧವಾರ ಪ್ರಕಟವಾಗಿದೆ. ಅದರಲ್ಲಿ ಬೆಂಗಳೂರಿನ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್ ಸೈನ್ಸ್‌, ಮಣಿಪಾಲ ವಿವಿ ಸ್ಥಾನ ಪಡೆದಿವೆ. ಮಣಿಪಾಲ ವಿವಿ 2018ನೇ ಸಾಲಿನಲ್ಲಿ 701-750 ನೇ ಸ್ಥಾನದಲ್ಲಿ ಇತ್ತು. 2019ನೇ ಸಾಲಿನಲ್ಲಿ 751-800ನೇ ಸ್ಥಾನದಲ್ಲಿದೆ. ಟಾಪ್‌ 200ರಲ್ಲಿ ಐಐಟಿ ಬಾಂಬೆ ಸ್ಥಾನ ಪಡೆದಿದ್ದು, ಭಾರತಕ್ಕೆ ಸಂಬಂಧಿಸಿದ ಅತ್ಯುತ್ತಮ ಶಿಕ್ಷಣ ಸಂಸ್ಥೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. 2018ರ ಸಾಲಿನಲ್ಲಿ 179ನೇ ಸ್ಥಾನದಲ್ಲಿದ್ದ ಐಐಟಿ ಬಾಂಬೆ, 2019ನೇ ಸಾಲಿನ ಪಟ್ಟಿಯಲ್ಲಿ 162ನೇ ಸ್ಥಾನಕ್ಕೆ ಜಿಗಿದಿದೆ. ಈ ಮೂಲಕ ಐಐಟಿ ದಿಲ್ಲಿಯನ್ನು ಹಿಂದಕ್ಕೆ ತಳ್ಳಿದೆ.

2018ರಲ್ಲಿ 190ನೇ ಸ್ಥಾನದಲ್ಲಿದ್ದ ಬೆಂಗಳೂರಿನ ಇಂಡಿಯನ್‌ ಇನ್‌ಸ್ಟಿ ಟ್ಯೂಟ್‌ ಆಫ್ ಸೈನ್ಸ್‌ ಹೊಸ ಪಟ್ಟಿಯಲ್ಲಿ 170ನೇ ರ್‍ಯಾಂಕ್‌ ಪಡೆದಿದೆ. ಈ ಮೂಲಕ ಅದು ಎರಡನೇ ಸ್ಥಾನ ಪಡೆದಿದೆ. ಒಟ್ಟು 1 ಸಾವಿರ ಉನ್ನತ ಶಿಕ್ಷಣ ಸಂಸ್ಥೆಗಳು ಮತ್ತು ವಿವಿಗಳ ರ್‍ಯಾಂಕಿಂಗ್‌ ಪಟ್ಟಿಯಲ್ಲಿ ಭಾರತದ ವಿವಿಗಳ ಸಂಖ್ಯೆ 20 ರಿಂದ 24ಕ್ಕೆ ವೃದ್ಧಿಯಾಗಿದೆ. ವಿಶ್ವಮಟ್ಟದಲ್ಲಿ ಮೆಸಾಚ್ಯುಸೆಟ್ಸ್‌ ಇನ್‌ಸ್ಟಿಟ್ಯೂಟ್‌ ಆಫ್ ಟೆಕ್ನಾಲಜಿ ಮೊದಲ ಸ್ಥಾನ, ಸ್ಟಾನ್‌ಫೋರ್ಡ್‌, ಹಾರ್ವರ್ಡ್‌, ಕಾಲ್ಟೆಕ್‌, ಆಕ್ಸ್‌ ಫ‌ರ್ಡ್‌ ವಿವಿ ಕ್ರಮವಾಗಿ ದ್ವಿತೀಯ, ತೃತೀಯ, ನಾಲ್ಕನೇ, ಐದನೇ ಸ್ಥಾನಗಳನ್ನು ಪಡೆದುಕೊಂಡಿವೆ.