Manipura: ಇಬ್ಬರು ಶವ ಪತ್ತೆ, ಮಕ್ಕಳು ಸೇರಿ 6 ಮಂದೆ ಕಾಣೆ

Team Udayavani, Nov 12, 2024, 11:04 PM IST

ಇಂಫಾಲ್‌: ಕುಕಿ ಬಂಡುಕೋರರ ಜತೆಗೆ ಸೋಮವಾರ ಗುಂಡಿನ ಚಕಮಕಿ ನಡೆದ ಬಳಿಕ, ಒಂದೇ ಕುಟುಂಬದ ಮೂವರು ಮಕ್ಕಳು ಸೇರಿ 6 ಜನರು ನಾಪತ್ತೆಯಾಗಿದ್ದು, ಮಂಗಳವಾರ ಜಿರಿಬಾಮ್‌ನಲ್ಲಿ ಇಬ್ಬರು ಮೈತೈ ಜನರ ಶವಪತ್ತೆಯಾಗಿದೆ. ಅಲ್ಲದೇ ಮೂವರನ್ನು ರಕ್ಷಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜಿರಿಬಾಮ್‌ ಜಿಲ್ಲೆಯ ಜಕುರಧೋರ್‌ನ ಸಿಆರ್‌ಪಿಎಫ್ ಕ್ಯಾಂಪಿನ ಸಮೀಪದ ಬೋರೋಬೇಕ್ರಾ ಪೊಲೀಸ್‌ ಠಾಣೆ ಮೇಲೆ ದಾಳಿಯ ಬಳಿಕ ಸೋಮವಾರ ನಡೆದ ಗುಂಡಿನ ಕಾಳಗದಲ್ಲಿ 11 ಬಂಡುಕೋರರು ಹತರಾಗಿದ್ದರು.

ನಾಪತ್ತೆಯಾದವರ ಪತ್ತೆಗಾಗಿ ಶೋಧ ಕಾರ್ಯಾಚರಣೆ ಇನ್ನೂ ಮುಂದುವರಿದಿದ್ದು, ಜಿರಿಬಾಮ್‌ನ ವಿವಿಧೆಡೆ ನಿಷೇಧಾಜ್ಞೆಯನ್ನು ಜಾರಿ ಮಾಡಲಾಗಿದೆ. ಹಿಂಸಾಚಾರದ ಹಿನ್ನೆಲೆಯಲ್ಲಿ ಕುಕಿ-ಝೋ ಕೌನ್ಸಿಲ್‌ ಮಂಗಳವಾರ ಬಂದ್‌ ಆಚರಿಸಿತು. ಈ ವೇಳೆ ಶಾಲೆ-ಕಾಲೇಜುಗಳು ಸಂಪೂರ್ಣವಾಗಿ ಬಂದ್‌ ಆಗಿದ್ದವು. ಅಲ್ಲದೇ, ಜಿರಿಬಾಮ್‌ ಎನ್‌ಕೌಂಟರ್‌ ಕುರಿತು ಸಂಪೂರ್ಣ ತನಿಖೆಯನ್ನು ಕೈಗೊಳ್ಳಬೇಕು ಎಂದು ನೌನ್ಸಿಲ್‌ ಆಗ್ರಹಿಸಿದೆ. ಸಂಘರ್ಷದಿಂದ ಕುದಿಯುತ್ತಿರುವ ಮಣಿಪುರದಲ್ಲಿ ರೈತ ಮಹಿಳೆಯ ಹತ್ಯೆಯ ಬಳಿಕ ಮತ್ತೆ ಹಿಂಸಾಚಾರ ಭುಗಿಲೆದ್ದಿದೆ.