“ಮರಾಠಾ ಮೀಸಲು ಕ್ರಮ ಸಾಂವಿಧಾನಿಕ’

Team Udayavani, Jun 28, 2019, 5:19 AM IST

ಮುಂಬಯಿ: ಮರಾಠ ಸಮುದಾಯಕ್ಕೆ ಶಿಕ್ಷಣ ಮತ್ತು ಸರಕಾರಿ ಉದ್ಯೋಗದಲ್ಲಿ ಮೀಸಲು ನೀಡುವ ಮಹಾರಾಷ್ಟ್ರ ಸರಕಾರದ ಮೀಸಲು ನೀತಿಗೆ ಬಾಂಬೆ ಹೈಕೋರ್ಟ್‌ ಗುರುವಾರ ಸಮ್ಮತಿ ನೀಡಿದೆ. ಶೇ.16ರ ಬದಲಾಗಿ ಶೇ. 12-13ರ ವ್ಯಾಪ್ತಿಯಲ್ಲಿ ಮೀಸಲು ನೀಡಬಹುದು ಎಂದು ಅದು ಸಲಹೆ ಮಾಡಿದೆ.

ಹೀಗಾಗಿ, ಮಹಾರಾಷ್ಟ್ರದಲ್ಲಿ ಅತ್ಯಂತ ಕೋಲಾಹಲ ಮತ್ತು ವಿವಾದ ಸೃಷ್ಟಿಸಿದ್ದ ಬೆಳವಣಿಗೆ ಒಂದು ರೀತಿಯಲ್ಲಿ ಇತ್ಯರ್ಥವಾಗಲಿದೆ. ಈ ವರ್ಷದ ಅಕ್ಟೋಬರ್‌-ನವೆಂಬರ್‌ನಲ್ಲಿ ನಡೆಯಲಿರುವ ವಿಧಾನಸಭೆ ಚುನಾವಣೆ ಮೇಲೆ ಕೂಡ ಈ ತೀರ್ಪು ಬಿಜೆಪಿ – ಶಿವಸೇನೆ ಮೈತ್ರಿಕೂಟದ ಪರವಾಗಿಯೇ ಜನರು ಮತ ಹಾಕಲಿದ್ದಾರೆ ಎಂಬ ಲೆಕ್ಕಾಚಾರವೂ ನಡೆದಿದೆ.

“ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ಹಿಂದುಳಿದವರಿಗೆ ಮೀಸಲು ನೀಡುವುದು ಸಾಂವಿಧಾನಕವಾಗಿದೆ. ಆದರೆ ಶೇ. 16ರ ಬದಲಾಗಿ ಶೇ. 12-13ರ ವ್ಯಾಪ್ತಿಯಲ್ಲಿ ಮೀಸಲು ಪ್ರಮಾಣ ಇರಲಿ’ ಹೈಕೋರ್ಟ್‌ನ ವಿಭಾಗೀಯ ಪೀಠ ಹೇಳಿದೆ. ಅದಕ್ಕೆ ಉತ್ತರಿಸಿದ ಮಹಾರಾಷ್ಟ್ರ ಸರಕಾರದ ಪರ ವಕೀಲರು ಶೇ. 16ರ ಮೀಸಲು ಪ್ರಮಾಣದಲ್ಲಿಯೇ ಶಿಕ್ಷಣ ಸಂಸ್ಥೆಗಳಲ್ಲಿ ಪ್ರವೇಶ ಕಲ್ಪಿಸಲಾಗಿದೆ ಎಂದರು.