ಜೀವಂತ ನವಜಾತ ಶಿಶು ಸತ್ತಿದೆ ಎಂದಿದ್ದ ಆಸ್ಪತ್ರೆ ಲೈಸನ್ಸ್‌ ರದ್ದು

Team Udayavani, Dec 8, 2017, 4:42 PM IST

ಹೊಸದಿಲ್ಲಿ : ‘ನವಜಾತ ಅವಳಿ ಶಿಶುಗಳು ಸತ್ತಿವೆ’ ಎಂದು ಸುಳ್ಳು ಘೋಷಣೆ ಮಾಡಿ ಮಗುವಿನ ಹೆತ್ತವರಿಗೆ ಅವುಗಳನ್ನು ಪೊಟ್ಟಣದಲ್ಲಿ  ಕಟ್ಟಿಕೊಟ್ಟಿದ್ದ ಇಲ್ಲಿನ ಶಾಲಿಮಾರ್‌ ಬಾಗ್‌ನಲ್ಲಿರುವ ಮ್ಯಾಕ್ಸ್‌ ಹಾಸ್ಪಿಟಲ್‌ನ ಲೈಸನ್ಸನ್ನು ರದ್ದು ಮಾಡಲಾಗಿದೆ.

“ನಾವು ಮ್ಯಾಕ್ಸ್‌ ಆಸ್ಪತ್ರೆಯ ಲೈಸನ್ಸ್‌ ರದ್ದು ಮಾಡಿದ್ದೇವೆ; ನವಜಾತ ಅವಳಿ ಶಿಶುಗಳು ಸತ್ತಿವೆ ಎಂದು ಸುಳ್ಳು ಘೋಷಣೆ ಮಾಡಿದ ಆಸ್ಪತ್ರೆಯ ನಿರ್ಲಕ್ಷ್ಯವು ಸ್ವೀಕಾರಾರ್ಹವಾದುದಲ್ಲ’ ಎಂದು ದಿಲ್ಲಿ ಆರೋಗ್ಯ ಸಚಿವ ಸತ್ಯೇಂದ್ರ ಜೈನ್‌ ಹೇಳಿದ್ದಾರೆ.

ಅಸ್ಪತ್ರೆಯ ಘೋಷಣೆ ಪ್ರಕಾರ ಸತ್ತಿರುವುದಾಗಿ ತಿಳಿಯಲಾದ ಅವಳಿ ಶಿಶುಗಳನ್ನು ಮನೆಗೊಯ್ದ ಹೆತ್ತವರಿಗೆ ಒಂದು ಮಗುವಿನಲ್ಲಿ  ಚಲನೆ ಇದ್ದುದು ಕಂಡು ಬಂತು. ಒಡನೆಯೇ ಅವರು ಅದನ್ನು ಸಮೀಪದ ಆಸ್ಪತ್ರೆಗೆ ಒಯ್ದರು. ಅಲ್ಲಿನ ವೈದ್ಯರು ಆ ಮಗು ಜೀವಂತ ಇದೆ ಎಂದು ಹೇಳಿದರು.

ಪೀತಾಂಪುರ ಆಸ್ಪತ್ರೆಗೆ ಸೇರಿಸಲಾದ ಮಗು  ಅನಂತರ ಚಿಕಿತ್ಸೆ ವೇಳೆ ಮೃತಪಟ್ಟಿತು ಎಂದು ವರದಿಗಳು ತಿಳಿಸಿವೆ.