ಮಾಯಾವತಿ ಮಾಜಿ ಆಪ್ತನ ಮನೆಯಲ್ಲಿ 50 ಲಕ್ಷದ ಪೆನ್‌!

Team Udayavani, Mar 14, 2019, 12:30 AM IST

ಹೊಸದಿಲ್ಲಿ /ಲಕ್ನೋ: ಬಿಎಸ್‌ಪಿ ನಾಯಕಿ ಮಾಯಾವತಿಯವರ ಮಾಜಿ ಆಪ್ತ ಕಾರ್ಯದರ್ಶಿ ನೇತ್‌ ರಾಮ್‌ ನಿವಾಸದ ಮೇಲೆ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು ನಡೆಸಿದ ದಾಳಿಯಲ್ಲಿ 1.64 ಕೋಟಿ ರೂ. ನಗದು, 50 ಲಕ್ಷ ರೂ. ಮೌಲ್ಯದ ಮೌಂಟ್‌ ಬ್ಲಾಂಕ್‌ ಪೆನ್ನುಗಳು, ನಾಲ್ಕು ಐಶಾರಾಮಿ ಎಸ್‌ಯುವಿ ಕಾರುಗಳು ಹಾಗೂ 300 ಕೋಟಿ ರೂ. ಮೌಲ್ಯದ ಬೇನಾಮಿ ಆಸ್ತಿಯ ದಾಖಲೆಗಳು ಪತ್ತೆಯಾಗಿವೆ.

ಮಾಯಾವತಿ ಮುಖ್ಯಮಂತ್ರಿಯಾಗಿದ್ದ ಅವಧಿಯಲ್ಲಿ ನೇತ್‌ ರಾಮ್‌, ಉತ್ತರ ಪ್ರದೇಶ ಸರಕಾರದಲ್ಲಿ ಅನೇಕ ದೊಡ್ಡ ಹುದ್ದೆಗಳನ್ನು ನಿರ್ವಹಿಸಿದ್ದ ರಾಮ್‌ ವಿರುದ್ಧ ನೋಟು ಅಮಾನ್ಯ ಸಂದರ್ಭದಲ್ಲಿ ಕೋಲ್ಕತಾ ಮೂಲದ ಶೆಲ್‌ ಕಂಪೆನಿಗಳಿಂದ 95 ಕೋಟಿ ರೂ. ಅಕ್ರಮ ವ್ಯವಹಾರ ನಡೆಸಿದ ಆರೋಪ ಅವರ ಮೇಲಿದ್ದರಿಂದ ಈ ದಾಳಿ ನಡೆಸಲಾಗಿದೆ. 26 ಗಂಟೆಗಳ ಕಾಲ ನಡೆದಿ ರೈಡ್‌ನ‌ಲ್ಲಿ, ಬ್ಯಾಂಕ್‌ ಲಾಕರ್‌ ಒಂದರಲ್ಲಿ 50 ಲಕ್ಷ ರೂ. ಹಣ ಇರುವುದು ಬೆಳಕಿಗೆ ಬಂದಿದೆ ಎಂದು ಐಟಿ ಇಲಾಖೆ ಮೂಲಗಳು ತಿಳಿಸಿವೆ. ನಿವೃತ್ತ ಐಎಎಸ್‌ ಅಧಿಕಾರಿಯೂ ಆಗಿರುವ ಅವರು ಪ್ರಸಕ್ತ ಲೋಕಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಲು ಪಕ್ಷವೊಂದರ ಟಿಕೆಟ್‌ಗಾಗಿ ಪ್ರಯತ್ನಿಸುತ್ತಿದ್ದರು.