ಮೀರಾಕುಮಾರ್‌ ವಿರುದ್ಧ ಸುಷ್ಮಾ ವಿಡಿಯೋ ವಾರ್‌

Team Udayavani, Jun 26, 2017, 3:45 AM IST

ಹೊಸದಿಲ್ಲಿ: ವಿಪಕ್ಷಗಳ ರಾಷ್ಟ್ರಪತಿ ಅಭ್ಯರ್ಥಿ ಮೀರಾ ಕುಮಾರ್‌ ವಿರುದ್ಧ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್‌ ವಿಡಿಯೋ ವಾರ್‌ ಸಾರಿದ್ದಾರೆ. ವಿಪಕ್ಷಗಳಿಂದ ರಾಷ್ಟ್ರಪತಿ ಅಭ್ಯರ್ಥಿಯೆಂದು ಆಯ್ಕೆಯಾದ ಬೆನ್ನಲ್ಲೇ ಸಚಿವೆ ಸುಷ್ಮಾ ಅವರು ಹಳೆಯ ವಿಡಿಯೋವೊಂದನ್ನು ಟ್ವೀಟರ್‌ನಲ್ಲಿ ಅಪ್‌ಲೋಡ್‌ ಮಾಡಿದ್ದಾರೆ.

2013ರಲ್ಲಿ ಸುಷ್ಮಾ ವಿಪಕ್ಷ ನಾಯಕಿಯಾಗಿದ್ದಾಗ ಲೋಕಸಭೆಯಲ್ಲಿ ಮಾತನಾಡಲು ಸ್ಪೀಕರ್‌ ಮೀರಾಕುಮಾರ್‌ ಅಡ್ಡಿಪಡಿಸಿದ್ದ ವಿಡಿಯೋ ಇದಾಗಿದೆ. ಅದರಲ್ಲಿ ಸುಷ್ಮಾ ಅವರ 6 ನಿಮಿಷಗಳ ಭಾಷಣಕ್ಕೆ ಮೀರಾ ಅವರು 60 ಬಾರಿ ಅಡ್ಡಿಪಡಿಸಿದ್ದಾರೆ. ಈ ವಿಡಿಯೋ ಅಪ್‌ಲೋಡ್‌ ಮಾಡಿರುವ ಸುಷ್ಮಾ, “ಮೀರಾಕುಮಾರ್‌ ನನ್ನನ್ನು ಈ ರೀತಿ ನಡೆಸಿಕೊಂಡಿದ್ದರು’ ಎಂದಿದ್ದಾರೆ.

ಬೆಂಬಲ ಕೋರಿದ ಕೋವಿಂದ್‌: ಇದೇ ವೇಳೆ, ಎನ್‌ಡಿಎ ರಾಷ್ಟ್ರಪತಿ ಅಭ್ಯರ್ಥಿ ಕೋವಿಂದ್‌ ಅವರು ಲಕ್ನೋದಿಂದ ರವಿವಾರ ರಾಷ್ಟ್ರವ್ಯಾಪಿ ಪ್ರವಾಸ ಆರಂಭಿಸಿದ್ದಾರೆ. ಚುನಾವಣೆಯಲ್ಲಿ ತಮಗೆ ಬೆಂಬಲ ನೀಡುವಂತೆ ಉತ್ತರಪ್ರದೇಶದ ಜನಪ್ರತಿನಿಧಿಗಳನ್ನು ಕೋರಿದ್ದಾರೆ. 

ಆಂತರ್ಯದ ಧ್ವನಿಗೆ ಕಿವಿಯಾಗಿ: ಇನ್ನೊಂದೆಡೆ, ಮೀರಾಕುಮಾರ್‌ ಅವರು ತಮ್ಮನ್ನು ಚುನಾಯಿಸುವಂತೆ ಸಂಸದರು ಮತ್ತು ಶಾಸಕರಿಗೆ ಭಾವನಾತ್ಮಕ ಪತ್ರವನ್ನು ಬರೆದಿದ್ದಾರೆ. “ಇತಿಹಾಸ ನಿರ್ಮಿಸುವ ವಿಶಿಷ್ಟ ಅವಕಾಶವೊಂದು ನಿಮಗೆ ಸಿಕ್ಕಿದೆ. ಎಲ್ಲರೂ ನಿಮ್ಮ ಆಂತರ್ಯದ ಧ್ವನಿಯನ್ನು ಆಲಿಸಿ. ನಾವೆಲ್ಲರೂ ಒಂದಾಗಿ ಈ ಪವಿತ್ರ ಪ್ರಕ್ರಿಯೆಯತ್ತ ಚಲಿಸೋಣ. ನಿಮ್ಮ ಅಮೂಲ್ಯವಾದ ಬೆಂಬಲವನ್ನು ನನಗೆ ನೀಡಿ ಎಂದು ಕೋರಿಕೊಳ್ಳುತ್ತೇನೆ’ ಎಂದು ಪತ್ರದಲ್ಲಿ ಮೀರಾ ಬರೆದಿದ್ದಾರೆ.