ಮೆಕ್ಸಿಕೋದಲ್ಲಿ ಸುನಾಮಿ: 35 ಮಂದಿ ಸಾವು

Team Udayavani, Sep 9, 2017, 10:40 AM IST

ಮೆಕ್ಸಿಕೋ: ಮೆಕ್ಸಿಕೋದ ದಕ್ಷಿಣ ಕರಾವಳಿಯಲ್ಲಿ ಗುರುವಾರ ರಾತ್ರಿ ಸಣ್ಣಮಟ್ಟಿನ ಸುನಾಮಿ ಅಪ್ಪಳಿಸಿದೆ. ರಿಕ್ಟರ್‌ ಮಾಪಕದಲ್ಲಿ 8.2ರಷ್ಟು ತೀವ್ರತೆಯ ಪ್ರಬಲ ಭೂಕಂಪ ಸಂಭವಿಸಿದ್ದು, ಕನಿಷ್ಠ 35 ಮಂದಿ ಸಾವನ್ನಪ್ಪಿದ್ದಾರೆ. ಈ ಭೂಕಂಪವನ್ನು 100 ವರ್ಷಗಳಲ್ಲೇ ಅತಿ ಪ್ರಬಲ ಎಂದು ಪರಿಗಣಿಸಲಾಗಿದ್ದು, ಸುನಾಮಿ ಎಚ್ಚರಿಕೆಯನ್ನೂ ನೀಡಲಾಗಿದೆ.

ರಾತ್ರಿ 11:49ಕ್ಕೆ ಪೆಸಿಫಿಕ್‌ ತೀರಕ್ಕೆ 100 ಕಿಮೀ ದೂರದಲ್ಲಿರುವ ಕರಾವಳಿ ನಗರ ತೊನಾಲದಲ್ಲಿ ಈ ಭೂಕಂಪ ಸಂಭವಿಸಿದೆ. ಕೇಂದ್ರ ಸ್ಥಾನದಿಂದ 800 ಕಿಮೀವರೆಗೂ ಭೂಕಂಪದ ಅನುಭವವಾಗಿದೆ. ಪ್ರಾಣ ರಕ್ಷಿಸಿಕೊಳ್ಳಲು ಜನರು ಮನೆ, ಕಚೇರಿಗಳಿಂದ ಕೂಡಲೇ ಹೊರ ಓಡಿದ್ದಾರೆ.  ಅಮೆರಿಕ ಭೂವಿಜ್ಞಾನ ಕೇಂದ್ರ ಈ  ಭೂಕಂಪವನ್ನು 1985ರಲ್ಲಿ ಸಂಭವಿಸಿದ್ದ ಭೂಕಂಪಕ್ಕೆ ಹೋಲಿಸಿದೆ. ಆಗ 8.1ರಷ್ಟು ಕಂಪನಾಂಕದ ಭೂಕಂಪ ಸಂಭವಿಸಿತ್ತು. ಆ ವೇಳೆ ಮೆಕ್ಸಿಕೋದ 10,000 ಮಂದಿ ಸಾವಿಗೀಡಾಗಿದ್ದರು. ಈ ಬಾರಿ ಸಂಭವಿಸಿರುವ ಭೂಕಂಪವೂ ಅಷ್ಟೇ ಪ್ರಬಲವಾಗಿದೆ ಎಂದು ಅವರು ಹೇಳಿದ್ದಾರೆ. ಸಾವಿನ ಸಂಖ್ಯೆಯಲ್ಲಿ ಏರಿಕೆಯಾಗುವ ಸಾಧ್ಯತೆಯಿದೆ ಎಂದೂ ಹೇಳಿದ್ದಾರೆ.