ಹೆಲಿಕಾಪ್ಟರ್‌ ಖರೀದಿ ಒಪ್ಪಂದ ರದ್ದು : ಮೇಕ್‌ ಇನ್‌ ಇಂಡಿಯಾಕ್ಕೆ ಉತ್ತೇಜನ ನೀಡಲು ಈ ನಿರ್ಧಾರ

Team Udayavani, Apr 18, 2022, 8:05 AM IST

ಹೊಸದಿಲ್ಲಿ: ರಷ್ಯಾ ಜತೆಗೆ ಮಾಡಿ­ಕೊಳ್ಳಲಾಗಿದ್ದ “ಎಂಐ-47 ವಿ 5′ ಮಾದರಿಯ 48 ಹೆಲಿಕಾಪ್ಟರ್‌ಗಳ ಖರೀದಿ ಒಪ್ಪಂದವನ್ನು ಭಾರತೀಯ ವಾಯುಪಡೆ (ಐಎಎಫ್) ರದ್ದುಗೊಳಿಸಿದೆ.

“ಮೇಕ್‌ ಇನ್‌ ಇಂಡಿಯ’ ಯೋಜ­ನೆ­ಯಡಿ, ಭಾರತದ ರಕ್ಷಣ ಪರಿಕರ ಉತ್ಪಾದನ ವಲಯವನ್ನು ಸಂಪೂರ್ಣವಾಗಿ ಸ್ವಾವಲಂಬಿಯಾ­ಗಿಸುವ ಮಹತ್ವಾಕಾಂಕ್ಷೆಗೆ ಅನುಗುಣ­ವಾಗಿ ಈ ಒಪ್ಪಂದಕ್ಕೆ ತಿಲಾಂಜಲಿ ನೀಡಲಾಗಿದೆ ಎನ್ನಲಾಗಿದೆ.

ಹತ್ತು ವರ್ಷಗಳ ಹಿಂದೆ, ಮಧ್ಯಮ ಕ್ರಮಾಂಕದ ಲಿಫ್ಟರ್‌ಗಳಾಗಿರುವ “ಎಂಐ-47 ವಿ 5′ ಮಾದರಿಯ 80 ಹೆಲಿಕಾಪ್ಟರ್‌ಗಳನ್ನು ಖರೀದಿಸುವ ಒಪ್ಪಂದಕ್ಕೆ ಭಾರತ, ರಷ್ಯಾ ಸಹಿ ಹಾಕಿದ್ದವು. ಅವುಗಳಲ್ಲಿ 32 ಹೆಲಿಕಾಪ್ಟರ್‌ಗಳು ಈಗಾಗಲೇ ಭಾರತಕ್ಕೆ ನಾನಾ ಬ್ಯಾಚ್‌ಗಳಲ್ಲಿ ಆಗಮಿಸಿ ಐಎಎಫ್ಗೆ ಹಸ್ತಾಂತರಗೊಂಡಿವೆ. ಈ ಹೆಲಿಕಾಪ್ಟರ್‌ಗಳನ್ನು ದೇಶೀಯವಾಗಿಯೇ ತಯಾರಿಸಲು ಕೇಂದ್ರ ಉದ್ದೇಶಿಸಿ­ರುವುದರಿಂದ ಇನ್ನುಳಿದ 48 ಹೆಲಿಕಾಪ್ಟರ್‌ಗಳ ಖರೀದಿ ಪ್ರಕ್ರಿಯೆಯನ್ನು ನಿಲ್ಲಿಸಲು ಐಎಎಫ್ ಉದ್ದೇಶಿಸಿದೆ.