ದಾಳಿಗೆ ಸ್ಟೀಲ್ ಬುಲೆಟ್ ಬಳಸುತ್ತಿರುವ ಉಗ್ರರು

Team Udayavani, Jun 21, 2019, 5:17 AM IST

ಶ್ರೀನಗರ:ಕಾಶ್ಮೀರದಲ್ಲಿ ಉಗ್ರರು ಸೇನೆ ಸಿಬಂದಿ ಮೇಲೆ ನಡೆಸುವ ದಾಳಿಗೆ ಚೀನದಲ್ಲಿ ತಯಾರಿಸಿದ ಸ್ಟೀಲ್ ಬುಲೆಟ್‌ಗಳನ್ನು ಬಳಸುತ್ತಿರುವುದು ಭಾರತೀಯ ಸೇನೆಯನ್ನು ಚಿಂತೆಗೀಡು ಮಾಡಿದೆ. ಈ ಸ್ಟೀಲ್ ಬುಲೆಟ್‌ಗಳ ಬುಲೆಟ್ ಪ್ರೂಫ್ ಅನ್ನೂ ಭೇದಿಸಿ ಯೋಧರಿಗೆ ಗಾಯ ಉಂಟು ಮಾಡುತ್ತದೆ. ಇದರಿಂದ ಸಾವು ನೋವಿನ ತೀವ್ರತೆ ಹೆಚ್ಚಾಗುತ್ತದೆ. ಇತ್ತೀಚೆಗೆ ಉಗ್ರ ದಾಳಿ ನಡೆದಾಗ ಉಗ್ರರಿಂದ ಎಕೆ 47 ರೈಫ‌ಲ್ ಹಾಗೂ ಸ್ಟೀಲ್ ಬುಲೆಟ್‌ಗಳನ್ನು ವಶಪಡಿಸಿಕೊಳ್ಳಲಾಗಿತ್ತು.

ಈ ಬಗ್ಗೆ ನಡೆದ ತನಿಖೆಯಲ್ಲಿ ಪಾಕ್‌ನ ಐಎಸ್‌ಐ ಮತ್ತು ಉಗ್ರ ಸಂಘಟನೆ ಜೈಶ್‌ ಎ ಮೊಹಮ್ಮದ್‌ ತಮ್ಮ ಉಗ್ರರಿಗೆ ಸ್ಟೀಲ್ ಬುಲೆಟ್‌ಗಳನ್ನು ನೀಡುತ್ತಿದೆ. ಈ ಸ್ಟೀಲ್ ಬುಲೆಟ್‌ಗಳನ್ನು ಬಳಸುವ ಉದ್ದೇಶವೇ ಬುಲೆಟ್ ಪ್ರೂಫ್ ಜಾಕೆಟ್‌ಗಳನ್ನು ಭೇದಿಸಿ ಗಾಯಗೊಳಿಸುವುದಾಗಿದೆ. ಸೇನಾ ಸಿಬ್ಬಂದಿ ಮತ್ತು ಪೊಲೀಸರನ್ನು ಟಾರ್ಗೆಟ್ ಮಾಡುವುದಕ್ಕೆಂದೇ ಇದನ್ನು ಬಳಸಲಾಗುತ್ತಿದೆ. ಪುಲ್ವಾಮಾ ಮತ್ತು ಟ್ರಾಲ್ನಲ್ಲಿ ನಡೆದ ದಾಳಿಗೂ ಸ್ಟೀಲ್ ಬುಲೆಟ್ ಬಳಸಲಾಗಿತ್ತು. ಜೈಶ್‌ ಉಗ್ರರು ಮೊದಲಿನಿಂದಲೂ ಈ ಸ್ಟೀಲ್ ಬುಲೆಟ್ ಬಳಸುತ್ತಿದ್ದಾರೆ. 2017ರ ಡಿಸೆಂಬರ್‌ನಲ್ಲಿ ಮೊದಲ ಬಾರಿಗೆ ಇದರ ಬಳಕೆ ಗಮನಕ್ಕೆ ಬಂದಿತ್ತು. ಸ್ಟೀಲ್ ಬುಲೆಟ್‌ಗಳಿಗೆ ಜಾಗತಿಕ ನಿಷೇಧ ವಿಧಿಸಲಾಗಿದ್ದರೂ, ಉಗ್ರರಿಗೆ ಇದು ಲಭ್ಯವಾಗುತ್ತಿದೆ.