Jammu: ಗುಜುರಿ ಅಂಗಡಿಯಲ್ಲಿ ಭೀಕರ ಸ್ಫೋಟ, ಬಾಲಕ ಸೇರಿ 3 ಮಂದಿ ಮೃತ್ಯು, 11 ಮಂದಿಗೆ ಗಾಯ

Team Udayavani, Aug 19, 2023, 9:03 AM IST

ಜಮ್ಮು: ಶುಕ್ರವಾರ ಸಂಜೆ ಕಾರ್ಗಿಲ್ ಜಿಲ್ಲೆಯ ದ್ರಾಸ್‌ನಲ್ಲಿ ಗುಜುರಿ ಅಂಗಡಿಯೊಂದರಲ್ಲಿ ನಡೆದ ನಿಗೂಢ ಸ್ಫೋಟದಲ್ಲಿ ಬಾಲಕ ಸೇರಿ ಮೂರು ಮಂದಿ ಮೃತಪಟ್ಟು 11 ಮಂದಿ ಗಾಯಗೊಂಡಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಶೆಲ್‌ನಿಂದ ಲೋಹವನ್ನು ಹೊರತೆಗೆಯುವಾಗ ಸ್ಫೋಟಗೊಂಡಿರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ. ಅಂಗಡಿಯ ಮಾಲೀಕನ ಮಗ ಮತ್ತು ದಾರಿಹೋಕರು ಸೇರಿದಂತೆ ಇಬ್ಬರು ಸಾವನ್ನಪ್ಪಿದರು ಮತ್ತು ಇತರ 12 ಜನರು ಗಾಯಗೊಂಡಿದ್ದಾರೆ. ಈ ವೇಳೆ ಗಂಭೀರ ಗಾಯಗೊಂಡಿದ್ದ ವ್ಯಕ್ತಿ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದು ಮೃತರ ಸಂಖ್ಯೆ ಮೂರಕ್ಕೆ ಏರಿಕೆಯಾಗಿದೆ.

ಮೃತ ಮೂವರಲ್ಲಿ ಇಬ್ಬರನ್ನು ಖಾಂಡ್ಯಾಲ್‌ನ 30 ರ ಹರೆಯದ ಶಬೀರ್ ಅಹ್ಮದ್ ಮತ್ತು ಜಮ್ಮುವಿನ ನರ್ವಾಲ್‌ನ ಸುಮಾರು 12 ವರ್ಷ ವಯಸ್ಸಿನ ಸ್ಕ್ರ್ಯಾಪ್ ಅಂಗಡಿಯ ಮಾಲೀಕನ ಮಗ ಹನಿ ಎಂದು ಗುರುತಿಸಲಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ದ್ರಾಸ್‌ನ ಮುಖ್ಯ ಮಾರುಕಟ್ಟೆಯಲ್ಲಿ ಸಂಜೆ 6 ಗಂಟೆ ಸುಮಾರಿಗೆ ಈ ಘಟನೆ ನಡೆದಿದೆ. ಪೊಲೀಸರು ತನಿಖೆ ಆರಂಭಿಸಿದ್ದಾರೆ.